ବୈପାରୀଗୁଡା : କୋରାପୁଟ ଜିଲା ବୈପାରୀଗୁଡା ବ୍ଲକ ଅନ୍ତର୍ଗତ ବୋଦାପୁଟ ଗ୍ରାମରେ ଅଘଟଣ । ଶୌଚ ପାଇଁ ଯାଇ ପୋଖରୀରେ ବୁଡ଼ି ମହିଳାଙ୍କ ମୃତ୍ୟୁ । ମୃତ ମହିଳା ବୈପାରୀଗୁଡା ବ୍ଲକ ଅନ୍ତର୍ଗତ ବୋଦାପୁଟ ଗ୍ରାମର ୫୫ ବର୍ଷ ବୟସ୍କ ଦଉନା ନାୟକ ବୋଲି ଜଣାପଡିଛି ।
ସୂଚନା ଯେ,ବୋଦାପୁଟ ଗ୍ରାମର ଦଉନା ନାୟକ ମଙ୍ଗଳବାର ନିଜ ଘର କାମ ସାରିବା ପରେ ଗାଁ ନିକଟସ୍ଥ ପୋଖରୀକୁ ଶୌଚ ହେବା ପାଇଁ ଯାଇଥିଲେ । ଦୀର୍ଘ ସମୟ ପରେ ମଧ୍ୟ ଘରକୁ ନ ଫେରିବାରୁ ପରିବାର ଲୋକେ ରାତି ତମାମ ଖୋଜାଖୋଜି କରିଥିଲେ । ପରେ ମଧ୍ୟ କୌଣସି ସନ୍ଧାନ ପାଇ ନଥିଲେ । କିନ୍ତୁ ବୁଧବାର ପୂର୍ବାହ୍ନରେ ଗାଁର କିଛି ଲୋକ ଗାଧୋଇବା ପାଇଁ ଯିବାବେଳେ ପୋଖରୀରେ ଦଉନାଙ୍କ ମୃତଦେହ ଭାସୁଥିବା ଦେଖି ତାଙ୍କ ପରିବାର ଲୋକଙ୍କୁ ଖବର ଦେଇଥିଲେ । ପରିବାର ଲୋକେ ଶବକୁ ଚିହ୍ନଟ କରିବା ପରେ ବୈପାରୀଗୁଡା ପୋଲିସ ବିଭାଗକୁ ସୂଚନା ଦେଇଥିଲେ । ଘଟଣାସ୍ଥଳରେ ଅଗ୍ନିଶମ କର୍ମଚାରୀ ଶବ ଉଦ୍ଧାର କରିବା ପରେ ମୃତଦେହ ପୋଲିସକୁ ହସ୍ତାନ୍ତର କରିଛି ।