କେନ୍ଦୁଝର, ୨୭ା୪ (ବ୍ରଜକିଶୋର ରାୟ) ଦୀର୍ଘ ଦିନ ପରେ ବିଜେପି ଆଜି ଚମ୍ପୁଆ ଓ ତେଲକୋଇ ନିର୍ବାଚନ ମଣ୍ଡଳୀ ପାଇଁ ପ୍ରାର୍ଥୀ ଘୋଷଣା କରିଛି । ଏହି ଦୁଇ ସିଟ ପାଇଁ ବିଜେଡି ଓ କଂଗ୍ରେସ ପ୍ରାର୍ଥୀ ଘୋଷଣା କରି ସାରିଛି । ଭାଜପା ଦଳ ଚମ୍ପୁଆ ନିର୍ବାଚନ ମଣ୍ଡଳୀ ପାଇଁ ଡକ୍ଟର ମୂରଲୀ ଶର୍ମାଙ୍କ ଉପରେ ପୁଣି ଥରେ ଭରସା ରଖି ପ୍ରାର୍ଥୀ ଘୋଷଣା କରିଛି । ମୂରଲୀ ପୂର୍ବରୁ ନିର୍ବାଚନ ଲଢିଥିବା ବେଳେ ୨୦୧୯ ମସିହାରେ ଦଳର ପ୍ରାର୍ଥୀ ହୋଇ କଡଡା ମୁକାବିଲା କରିଥିଲେ । ତାଙ୍କ ନାମ ଘୋଷଣା ପରେ ଭାଜପା ଶିବିର ଓ ତାଙ୍କ ସମର୍ଥକ ଙ୍କ ମଧ୍ୟରେ ଖୁସି ଖେଳିଯାଇଛି। ବିଜେଡି ଜଣେ ଟାଣୁଆ ନେତା ପୂର୍ବତନ ବିଧାୟକ ସନାତନ ମହାକୁଡ ଓ କଂଗ୍ରେସ ଜଣେ ପୂର୍ବତନ ସାଂସଦ ଯଶୋବନ୍ତ ନାରାୟଣ ସିଂ ଲାଗୁରୀ ସହିତ ତାଙ୍କର କଡା ମୁକାବିଲା ହେବ। ସେହିପରି ଭାଜପା ଦଳ ତେଲକୋଇ ନିର୍ବାଚନ ମଣ୍ଡଳୀ ରେ ଡାକ୍ତର ଫକୀରମୋହନ ନାଏକ ଙ୍କୁ ପ୍ରାର୍ଥୀ ଘୋଷଣା କରିଛି । କିଛି ମାସ ତଳେ ସେ ଡାକ୍ତର ଚାକିରୀ ଛାଡି ଭାଜପାରେ ଯୋଗଦେଇ ଗାଁ ଗଣ୍ଡା ବୁଲି ଲୋକଙ୍କ ସେବା କରିବା ସହ ନିଜର ସମର୍ଥନ ସଂଗ୍ରହ କରିଆସୁଥିଲେ । ଡାକ୍ତର ନାଏକ ପୂର୍ବରୁ କଂଗ୍ରେସ ଟିକଟ ରୁ ଲୋକସଭା ପାଇଁ ପ୍ରାର୍ଥୀ ହୋଇଥିଲେ । ବିଜେଡି ଛାଡି ବିଧାୟକ ପ୍ରେମାନନ୍ଦ ନାୟକ, ପୂର୍ବତନ ବିଧାୟକ ବେଦବ୍ୟାସ ନାୟକ ଭାଜପାରେ ଯୋଗ ଦେବା ଫଳରେ କିଏ ଟିକଟ ପାଇବ ସେ ନେଇ ନା ନା କଳ୍ପନା ଜଳ୍ପନା ଆରମ୍ଭ ହୋଇଥିଲା । ବିଜେଡି ଦଳର ପୂର୍ବତନ ଜିଲା ସଭାପତି ତଥା ଜଣେ ଦକ୍ଷ ସଂଗଠକ ତଥା ପୂର୍ବତନ ସାଂସଦ ମାଧବ ସର୍ଦ୍ଦାର ଙ୍କୁ ପ୍ରାର୍ଥୀ କରିଥିବା ବେଳେ କଂଗ୍ରେସ ଜଣେ ନବାଗତ ତଥା ପୂର୍ବତନ ବିଧାୟକ ପ୍ରାଣବଲ୍ଲଭ ନାୟକଙ୍କ ପୁଅ ନିର୍ମଳ ନାୟକ ଙ୍କୁ ପ୍ରାର୍ଥୀ କରିଛି । ଫଳରେ ଏଠାରେ ତ୍ରିମୁଖୀ ଲଢେଇ ହେବାକୁ ଯାଉଛି ।
