କୋଣାର୍କ : ଆସନ୍ତା ଡ଼ିସେମ୍ବର ୧୫ରୁ ଆରମ୍ଭ ହେବ ଚନ୍ଦ୍ରଭାଗା ସ୍ୱର୍ଣ୍ଣାଭ ବେଳାଭୂମିରେ ଇକୋ ରିଟ୍ରିଟ୍ । ଏହା ୩ ମାସ ଧରି ଚାଲିବ। ପର୍ଯ୍ୟଟନ ବିଭାଗ ସୂଚନା ଅନୁଯାୟୀ, ବେଳାଭୂମିରେ ପର୍ଯ୍ୟଟକଙ୍କ ଲାଗି ସ୍ୱତନ୍ତ୍ର ସୁବିଧା ଥିବା ପାଖାପାଖି ୭୦ଟି ତମ୍ବୁ ଘର ପ୍ରସ୍ତୁତ କରାଯିବ। ଏ ନେଇ ପ୍ରସ୍ତୁତି କାର୍ଯ୍ୟ ଆରମ୍ଭ ହୋଇଛି।
ପର୍ଯ୍ୟଟକଙ୍କୁ ଆକୃଷ୍ଟ କରିବା ଲାଗି ମୁଖ୍ୟ ପ୍ରବେଶ ଦ୍ୱାରରେ ତୋରଣ, କନ୍ଫରେନ୍ସ ହଲ, ରିସେପ୍ସନ ହଲ ନିର୍ମାଣ କରାଯିବ। ଇକୋ ରିଟ୍ରିଟର ସ୍ୱତନ୍ତ୍ର ସେଲ୍ଫି ପଏଣ୍ଟ ପ୍ରସ୍ତୁତ କରାଯିବ ବୋଲି ସୂଚନା ମିଳିଛି। ପର୍ଯ୍ୟଟକ ପଞ୍ଚତାରକା ହୋଟେଲ ଭଳି ଏଠାରେ ସମସ୍ତ ସୁବିଧା ସୁଯୋଗ ପାଇବେ। ସେହିପରି ବେଳାଭୂମିରେ ଓପନ ବାର୍, ସାମୁଦ୍ରିକ କ୍ରୀଡ଼ା, ଜଳକ୍ରୀଡ଼ା, ଆକାଶମାର୍ଗରେ କ୍ରୀଡ଼ା ସମେତ ବେଳାଭୂମିରେ ବିଭିନ୍ନ ନାଚ ଗୀତର ଆସର ବ୍ୟବସ୍ଥା ରହିଥିବା ସୂଚନା ମିଳିଛି। ଇକୋ ରିଟ୍ରିଟ୍ ଆରମ୍ଭ ହେବା ପୂର୍ବରୁ ଡିସେମ୍ବର ୧୫ରୁ ଜାନୁୟାରୀ ୫ ପର୍ଯ୍ୟନ୍ତ ସମସ୍ତ କଟେଜ୍ ବୁକିଂ ସରିଥିବା ପର୍ଯ୍ୟଟନ ଅଧିକାରୀ ଅମିୟ କୁମାର ସେଠୀ କହିଛନ୍ତି।