ଭୁବନେଶ୍ୱର – ଓଡ଼ିଶାରେ ଆସନ୍ତାକାଲି ପ୍ରଥମ ପର୍ଯ୍ୟାୟ ନିର୍ବାଚନ । ପ୍ରଥମ ପର୍ଯ୍ୟାୟରେ ମୋଟ ୨୭୧ଜଣ ପ୍ରାର୍ଥୀଙ୍କ ରାଜନୈତିକ ଭାଗ୍ୟ ଇଭିଏମରେ ସିଲ୍ ହୋଇଯିବ ।
ପ୍ରଥମ ପର୍ଯ୍ୟାୟରେ ଭୋଟ ପଡିବାକୁ ଥିବା ୪ଟି ଲୋକସଭା ଆସନରେ ମୋଟ ୩୭ ଜଣ ପ୍ରାର୍ଥୀ ପ୍ରତିଦ୍ବନ୍ଦିତା କରୁଛନ୍ତି। ସେମାନଙ୍କ ମଧ୍ୟରୁ ୩୦ ପୁରୁଷ ଓ ୭ ମହିଳା ପ୍ରାର୍ଥୀ ରହିଛନ୍ତି।
୨୮ଟି ବିଧାନସଭା ଆସନରେ ମୋଟ ୨୪୩ ଜଣ ପ୍ରାର୍ଥୀ ନିଜର ରାଜନୈତିକ ଭାଗ୍ୟ ପରୀକ୍ଷା କରୁଛନ୍ତି। ଏଥିମଧ୍ୟରୁ ପୁରୁଷ ପ୍ରାର୍ଥୀଙ୍କ ସଂଖ୍ୟା ୨୧୪ ଓ ୨୯ ମହିଳା ପ୍ରାର୍ଥୀ ଅଛନ୍ତି। ନବରଙ୍ଗପୁର ଲୋକସଭା ଆସନରେ ୪ଜଣ ପ୍ରାର୍ଥୀ ଥିବାବେଳେ ବ୍ରହ୍ମପୁର, କଳାହାଣ୍ଡି ଓ କୋରାପୁଟ ଲୋକସଭା ଆସନରେ ୧୧ଜଣ ଲେଖାଏଁ ପ୍ରାର୍ଥୀ ଅଛନ୍ତି।
ବ୍ରହ୍ମପୁର ବିଧାନସଭା ଆସନ ପାଇଁ ସର୍ବାଧିକ ୧୭ ଜଣ ପ୍ରାର୍ଥୀ ଥିବାବେଳେ ଝରିଗାଁ, ନବରଙ୍ଗପୁର ଓ ଡାବୁଗାଁ ପାଇଁ ସର୍ବନିମ୍ନ ୩ଜଣ ଲେଖାଏଁ ପ୍ରାର୍ଥୀ ରହିଥିବା ମୁଖ୍ୟ ନିର୍ବାଚନ ଅଧିକାରୀ ନିକୁଞ୍ଜ ବିହାରୀ ଧଳ ସୂଚନା ଦେଇଛନ୍ତି ।