କୋରାପୁଟ – କୋରାପୁଟ ଜିଲ୍ଲା ନନ୍ଦପୁର ବ୍ଲକ ପାତାଳୀ ନଦୀରେ ଡଙ୍ଗାବୁଡ଼ି ପରେ ନିଖୋଜ ଥିବା ଆଉ ୪ ଜଣଙ୍କ ମୃତଦେହ ଉଦ୍ଧାର ହୋଇଛି। ପାଡୁଆ ଥାନା ପାତାଳି ନଦୀ ତାନସିଂ ଘାଟରୁ ୪ ଜଣଙ୍କର ମୃତଦେହ ଉଦ୍ଧାର କରିଛନ୍ତି ନନ୍ଦପୁର ଅଗ୍ନିଶମ ବାହିନୀ ଓ ଓଡ୍ରାଫ ଟିମ୍ । ଡଙ୍ଗା ବୁଡିଯିବାରୁ ଏଥିରେ ଥିବା ସମସ୍ତ ୫ ଜଣ ଯାତ୍ରୀଙ୍କର ମୃତ୍ୟୁ ହୋଇଛି।
କୋରାପୁଟ ଜିଲ୍ଲା ନନ୍ଦପୁର ବ୍ଲକ ଦେଇ ପ୍ରବାହିତ ପାତାଳୀ ନଦୀରେ ଗତକାଲି ଏକ ଦେଶୀ ଡଙ୍ଗା ବୁଡ଼ିଯିବାରୁ ନିଖୋଜ ଥିବା ୫ ଜଣଙ୍କ ମଧ୍ୟରୁ ଜଣଙ୍କର ମୃତଦେହ ଗତକାଲି ଉଦ୍ଧାର କରାଯାଇଥିଲା । ଆଉ ଚାରିଜଣ ନିଖୋଜ ଥିଲେ । ସେମାନଙ୍କୁ ଆଜି ପୁଣି ଖୋଜିବା ଆରମ୍ଭ କରିଥିଲା ଅଗ୍ନିଶମ ବାହିନୀ ଓ ଓଡ୍ରାଫ ଟିମ୍। ତିନି ନାବାଳିକା ଓ ଦୁଇ ମହିଳା ଡଙ୍ଗା ବୁଡିରେ ପ୍ରାଣ ହରାଇଛନ୍ତି ।
ଏକ ବାହାଘର ଭୋଜିରେ ଯୋଗ ଦେବାକୁ ତାନସିଂ ଗାଁର ୫ ଜଣ ଦେଶୀ ଡଙ୍ଗାରେ ଗତକାଲି ସକାଳେ ବାଡେଲ ଗାଁକୁ ଯାଇ ସଂଧ୍ୟାରେ ନିଜ ଗାଁକୁ ଫେରୁଥିଲା ବେଳେ ଡଙ୍ଗାଟି ବୁଡ଼ି ଯାଇଥିଲା ।