ଭୁବନେଶ୍ୱର : ରାଜ୍ୟ ସରକାରଙ୍କ ବର୍ତ୍ତମାନ କାର୍ଯ୍ୟକାଳର ସଫଳ ଚାରି ବର୍ଷର ଶେଷ ସପ୍ତାହର ପୂର୍ତ୍ତି ଅବସରରେ ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟର ସମସ୍ତ ବିଭାଗର ସମୀକ୍ଷା ବୈଠକ କରିଥିଲେ । ମାନ୍ୟବର ମନ୍ତ୍ରୀ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ବିଭାଗ ତୁଷାରକାନ୍ତ ବେହେରା , ବିଭାଗ ଦ୍ବାରା ନିଆଯାଇଥିବା ଗୁରୁତ୍ବପୂର୍ଣ୍ଣ ପଦକ୍ଷେପ ଏବଂ ଗତ ଦୁଇ ଦଶନ୍ଧି ମଧ୍ୟରେ ଏହି ରୂପାନ୍ତରୀକରଣର ପ୍ରଭାବରେ ଓଡିଶାର ଶାସନ ବ୍ୟବସ୍ଥା ଏବଂ ଜନସାଧାରଣଙ୍କ ଜୀବନଧାରଣର ମାନରେ ଯେଉଁ ସକାରାତ୍ମକ ପରିବର୍ତ୍ତନ ହୋଇଛି ସେ ସଂପର୍କରେ ମାନ୍ୟବର ମୁଖ୍ୟମନ୍ତ୍ରୀଙ୍କୁ ସୂଚନା ଦେଇଛନ୍ତି ।
ମାନ୍ୟବର ମୁଖ୍ୟମନ୍ତ୍ରୀଙ୍କ ସମୀକ୍ଷା ବୈଠକ ପରେ ମାନ୍ୟବର ବିଭାଗୀୟ ମନ୍ତ୍ରୀ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ , ସରକାରଙ୍କ ରୂପାନ୍ତରୀକରଣ କାର୍ଯ୍ୟଧାରାକୁ ସଫଳତାର ସହ ପ୍ରୟୋଗ କରିବା କ୍ଷେତ୍ରରେ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ବିଭାଗର ଗୁରୁତ୍ବପୂର୍ଣ୍ଣ ଅବଦାନ ରଖିଛି । ଏହି ବିଭାଗ ରାଜ୍ୟରେ ଆଇଟି କ୍ଷେତ୍ରରେ ପୁଞ୍ଜି ବିନିଯୋଗକୁ ସୁଗମ କରି ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି କରିଛି । ବୈଷୟିକ ସହାୟତା ପ୍ରଦାନ ମାଧ୍ୟମରେ ପ୍ରଶାସନର କାର୍ଯ୍ୟପ୍ରଣାଳୀକୁ ଏକୀକୃତ ତଥା ବିକେନ୍ଦ୍ରୀକରଣ ଶାସନକୁ ସୁନିଶ୍ଚିତ କରି ସରକାରୀ ସେବା ଜନସାଧାରଣଙ୍କ ପାଖରେ ସହଜ ଉପଲବ୍ଧ କରାଇବାର ପ୍ରକ୍ରିୟାକୁ ବ୍ୟାପକ ରୂପାନ୍ତରଣ କରିପାରିଛି । ଇଣ୍ଟରନେଟ୍ ସେବା ଗାଁ ଗାଁରେ ପହଞ୍ଚାଇବା ପାଇଁ ରାଜ୍ୟରେ ଟେଲିକମ୍ ଭିଭିଭୂମିର ବିକାଶ ସାଧନ କରାଯାଇଛି ।
ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ବିଭାଗ ରାଜ୍ୟରେ ପୁଞ୍ଜିନିବେଶର ଏକ ଅନକୂଳ ବାତାବରଣ ସୃଷ୍ଟି କରି ବ୍ୟାପକ ପୁଞ୍ଜିନିବେଶକୁ ଆକର୍ଷିତ କରିପାରିଛି । ଗତ ଚାରି ବର୍ଷ ମଧ୍ୟରେ, ନୂତନ ପୁଞ୍ଜି ବିନିଯୋଗର ସୁଯୋଗ ସୃଷ୍ଟି ହୋଇ ବିଶ୍ବସ୍ତରୀୟ ତଥା ପ୍ରମୁଖ ଘରୋଇ କମ୍ପାନୀଗୁଡିକ ଓଡିଶାରେ ପୁଞ୍ଜି ବିନିଯୋଗ କରିଅଛନ୍ତି । ସେମାନଙ୍କ ମଧ୍ୟରେ ଡେଲୋଏଟ୍ , ଆଇବିଏମ୍ , ହାପିଷ୍ଟ ମାଇଣ୍ଡସ୍ , ପିଡବ୍ଲୁସି , କନ୍ମେଣ୍ଡ୍ରିକ୍ସ , ଇନଚ୍ୟୁଟର , କଫର୍ , ଓପିଏକ୍ସ ଆମେରିକା , ବ୍ଲାକ୍ ନାଇଟ୍ , ଚକ୍ , ଟେଟ୍ରାସଫ୍ଟ, ୟୋଭାଣ୍ଟ , ଇନୋଭେର , ଆମିନ୍ ସୋଲାର ଏବଂ ୱାରେ ଏନର୍ଜି ଅନ୍ୟତମ । ଆଇଟି ଶିଳ୍ପକୁ ପ୍ରୋତ୍ସାହନ ଯୋଗାଇବା ଉଦ୍ଦେଶ୍ୟରେ ସମ୍ପ୍ରତି ଚାରିଗୋଟି ଉତ୍ସର୍ଗୀକୃତ ନୀତି ଯଥା- ଆଇଟି ପଲିସି , ଇଲେକ୍ଟ୍ରୋନିକ୍ସ ପଲିସି , ଡାଟା ସେଣ୍ଟର ପଲିସି ଏବଂ ବିପିଓ ପଲିସି ବିଭାଗ ଦ୍ବାରା ପ୍ରଣୟନ କରାଯାଇଛି । ଏହି ନୀତିଗୁଡିକ ତୁଳନାତ୍ମକ ଭାବେ ଉତ୍କୃଷ୍ଟ ପ୍ରୋତ୍ସାହନ ଯୋଗାଇବାରେ ଫଳପ୍ରଦ ଭୂମିକା ଗ୍ରହଣ କରି ରାଜ୍ୟରେ ଅଧିକ ପୁଞ୍ଜି ବିନିଯୋଗକୁ ଆକର୍ଷିତ କରୁଛି |
୨୦୨୧ ମସିହାରେ ସରକାରଙ୍କ ଦ୍ବାରା ଶୁଭାରମ୍ଭ ହୋଇଥିବା ଓଡିଶା ୱାନ୍ ପୋର୍ଟାଲରେ ୬୪୦ ରୁ ଅଧିକ ସେବା ଉପଲବ୍ଧ ହେଉଛି । ଓଡିଶା ୱାନ୍ ପୋର୍ଟାଲ ନାଗରିକମାନଙ୍କୁ ସରଳ , ସୁବିଧାଜନକ , ସ୍ବଚ୍ଛ ଏବଂ ନିରନ୍ତର (୨୪/୭) ସରକାରୀ ସେବାର ସୁବିଧା ପ୍ରଦାନ କରୁଅଛି । ଏହା ସମ୍ଭବ ହୋଇପାରିଛି ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ବିଭାଗ ଦ୍ବାରା ପ୍ରଦାନ କରାଯାଇଥିବା ବୈଷୟିକ ସହାୟତା ଯାହାକି ରାଜ୍ୟରେ ଏକୀକୃତ ତଥା ବିକେନ୍ଦ୍ରୀକରଣ ଶାସନ ପ୍ରକ୍ରିୟାକୁ ସୁଗମ କରିଛି ।
ସେହିଭଳି ମୋ ସେବା କେନ୍ଦ୍ର ଜରିଆରେ ସରକାରୀ ସେବା ନାଗରିକଙ୍କ ଘର ପାଖରେ ଉପଲବ୍ଧ ହୋଇପାରିଛି । ଏହାଦ୍ବାରା ଗ୍ରାମାଞ୍ଚଳର ଯୁବକ ଏବଂ ମିଶନ ଶକ୍ତି ଅଧୀନରେ ପରିଚାଳିତ ମହିଳା ସ୍ବୟଂ ସହାୟକ ଗୋଷ୍ଠୀମାନଙ୍କୁ ଉଦ୍ୟୋଗ ସ୍ଥାପନର ଏକ ମାର୍ଗ ପ୍ରଶସ୍ତ କରିଛି । ଏଯାବତ୍ ରାଜ୍ୟରେ ୬୯୦୦ ରୁ ଅଧିକ ମୋ ସେବା କେନ୍ଦ୍ର ସ୍ଥାପିତ ହୋଇସାରିଛି ଏବଂ ନିକଟ ଭବିଷ୍ୟତରେ ଏହି ସଂଖ୍ୟା ୮,୦୦୦କୁ ଅଧିକ ବୃଦ୍ଧି ପାଇବ ।
ସରକାରୀ କଳର କାର୍ଯ୍ୟ ଦକ୍ଷତାକୁ ବହୁଗୁଣିତ କରିବା ଓ ଉତ୍ପାଦିକା ଶକ୍ତିକୁ ବୃଦ୍ଧି କରିବାରେ ଏହି ବିଭାଗର ପଦକ୍ଷେପ ଉଲ୍ଲେଖନୀୟ ଅଟେ । ଓଡିଶା ରାଜ୍ୟ ୱାର୍କଫ୍ଲୋ ଅଟୋମେସନ୍ ସିଷ୍ଟମ୍ ର ପରିସର ସଚିବାଳୟର ସମସ୍ତ ବିଭାଗ , ସମସ୍ତ ନିର୍ଦ୍ଦେଶାଳୟ / ବିଭାଗୀୟ ମୁଖ୍ୟ କାର୍ଯ୍ୟାଳୟ , ସମସ୍ତ ଜିଲ୍ଲାପାଳଙ୍କ କାର୍ଯ୍ୟାଳୟ , ଓଡିଶାର ପୋଲିସ ମୁଖ୍ୟାଳୟ ଏବଂ ଜିଲ୍ଲା ଆରକ୍ଷୀ ଅଧ୍ୟକ୍ଷକଙ୍କ କାର୍ଯ୍ୟାଳୟଗୁଡ଼ିକର ପ୍ରାୟ ୧୫,୦୦୦ ବ୍ୟବହାରୀଙ୍କ ପର୍ଯ୍ୟନ୍ତ ପରିବ୍ୟାପ୍ତ ହୋଇଅଛି ଓ ଏହା ତୁରନ୍ତ ନିଷ୍ପଭି ଗ୍ରହଣରେ ସହାୟକ ହୋଇଛି । ୨୦୧୩ ମସିହାରେ ଏହାର ବ୍ୟବହାରକାରୀ ୧୩୦୦ ଥିବାବେଳେ ୨୦୨୦୨ ମସିହାରେ ଆନୁମାନିକ ୭୦୦୦କୁ ବୃଦ୍ଧି ପାଇଛି । ରାଜ୍ୟ ମୁଖ୍ୟାଳୟ ଏବଂ ଜିଲ୍ଲା ମୁଖ୍ୟାଳୟ ଗୁଡିକ ଓଡିଶା ରାଜ୍ୟସ୍ତରୀୟ କ୍ଷେତ୍ର ନେଟୱାର୍କ ମାଧ୍ୟମରେ ସଂଯୋଗୀକରଣ କରାଯାଇଛି । ସଚିବାଳୟ ସ୍ତରରୁ ବ୍ଲକ ସ୍ତର ପର୍ଯ୍ୟନ୍ତ ଆଭାସୀ ବୈଠକର ସୁବିଧା ମଧ୍ୟ ଉପଲବ୍ଧ କରାଯାଇଛି ।
ସମସ୍ତ ଗ୍ରାମପଞ୍ଚାୟତମାନଙ୍କୁ ଅପ୍ଟିକାଲ୍ ଫାଇବର୍ ସଂଯୋଗ ଯୋଗାଇ ଦିଆଯାଇଛି , ଯାହାଦ୍ବାରା ଡିଜିଟାଲ୍ ବ୍ୟବହାରୀକରଣରେ ଜନସାଧାରଣଙ୍କ ଭାଗିଦାରୀକୁ ସୁନିଶ୍ଚିତ କରାଯାଇପାରିଛି ।
୨୦୧୯ ମସିହାରୁ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ବିଭାଗ ମୋ ସରକାର ବ୍ୟବସ୍ଥା ପ୍ରଚଳନ କରୁଛନ୍ତି । ଆନ୍ତଃରାଜ୍ୟ ତଥା ଆନ୍ତର୍ଜାତୀୟ ସ୍ତରରେ ଏହା ଏପ୍ରକାରର ପ୍ରଥମ ପଦକ୍ଷେପ – ଯାହା ନାଗରିକଙ୍କ ଠାରୁ ସ୍ବତଃସ୍ଫୁର୍ତ୍ତ ଭାବେ ସରକାରଙ୍କ ପଦାଧିକାରୀମାନଙ୍କ ନାଗରିକମାନଙ୍କୁ କାର୍ଯ୍ୟ ନିଷ୍ପାଦନ ସମୟର ବ୍ୟବହାର ସଂର୍ପକିତ ମତାମତ ଗ୍ରହଣ କରୁଛି । ଏହି ଯୋଜନା ନାଗରିକମାନଙ୍କୁ ଶାସନରେ ପ୍ରତ୍ୟକ୍ଷ ଅଂଶୀଦାର କରିଛି ଏବଂ ନାଗରିକମାନଙ୍କ ମତାମତ ଆଧାରରେ ବିଭିନ୍ନ ବିଭାଗ ଦ୍ବାରା ଯୋଜନାର କାର୍ଯ୍ୟାନ୍ଵୟନରେ ବିଳମ୍ବ ତଥା ବାଧା ଉପୁଯାଉଥିବା ଅଧିକାରୀଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ପାରୁଛି । ଏହି ପ୍ରକ୍ରିୟା ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଠାରୁ ଆରମ୍ଭ କରି ସରକାରଙ୍କ ସମସ୍ତ କାର୍ଯ୍ୟାଳୟ ସ୍ତରକୁ ପରିବ୍ୟାପ୍ତ । ନାଗରିକ ମାନଙ୍କ ମତାମତ ଏହି ପ୍ରକ୍ରିୟାରେ ଗୁରୁତ୍ବ ବହନ କରେ ।
ସରକାରଙ୍କ ଅନ୍ୟାନ୍ୟ ପ୍ରମୁଖ ଯୋଜନାର ସଫଳ କାର୍ଯ୍ୟାନ୍ଵୟନରେ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ବିଭାଗର ସହଯୋଗ ଦୃଷ୍ଟାନ୍ତମୂଳକ ଅଟେ । ୨୦୨୧ ମସିହାରେ ଆରମ୍ଭ ହୋଇଥିବା ଜନ ଶୁଣାଣି ( ପବ୍ଲିକ୍ ଅଭିଯୋଗ ରିଡ୍ରେସାଲ୍ ) ପୋର୍ଟାଲ୍ ମାଧ୍ୟମରେ ନାଗରିକମାନେ ସହଜରେ ସେମାନଙ୍କ ଅଭିଯୋଗ ପଞ୍ଜିକରଣ କରିବାରେ ସକ୍ଷମ ହୋଇଛନ୍ତି । ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗ ଦ୍ବାରା ପରିଚାଳିତ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ଅଧୀନରେ ୯୯ ଲକ୍ଷରୁ ଅଧିକ ପରିବାରର ୩.୫୬ କୋଟିରୁ ଅଧିକ ଲୋକଙ୍କୁ ସ୍ମାର୍ଟ ସ୍ବାସ୍ଥ୍ୟ କାର୍ଡ ପ୍ରଦାନ କରାଯାଇଛି । ଏଥିମଧ୍ୟରେ ୪୯ % ମହିଳା କାର୍ଡଧାରୀ ଅଛନ୍ତି ।
ରାଜ୍ୟର ସମସ୍ତ କଲେଜ ତଥା ଧନ୍ଦାମୂଳକ , କ୍ରୀଡା ଭିତ୍ତିକ ଏବଂ ଆଇ.ଟି.ଆଇ ଗୁଡିକରେ ଷ୍ଟୁଡେଣ୍ଟ ଏକାଡେମିକ୍ ମ୍ୟାନେଜମେଣ୍ଟ ସିଷ୍ଟମ୍ ମାଧ୍ୟମରେ ଅନଲାଇନ୍ ନାମଲେଖା ହୋଇପାରୁଛି । ଏଥିପାଇଁ ଗୋଟିଏ ମାତ୍ର ଆବେଦନ ପତ୍ର ପୂରଣ କରି ଯେକୌଣସି କଲେଜରେ ନାମଲେଖା ଯାଇପାରିବ । ଏହି ପ୍ରକ୍ରିୟା ସରଳ ଓ ଛାତ୍ର ଅନୁକୂଳ ହୋଇପାରିଛି । ଆହୁରି ମଧ୍ୟ , ସାମସ୍ ମାଧ୍ୟମରେ ନାମ ଲେଖାଯାଉଥିବା କଲେଜ ସଂଖ୍ୟା ୨୦୧୨-୧୩ ରେ ପ୍ରାୟ ୨୧୦୦ ଥିବାବେଳେ ଏହା ଦ୍ବିଗୁଣିତ ହୋଇ ୨୦୨୧-୨୨ ରେ ୪୪୦୦ ସଂଖ୍ୟାରେ ପହଞ୍ଚିଛି ।
ରାଜ୍ୟର ଦ୍ରୁତ ରୂପାନ୍ତରୀକରଣ ପ୍ରକ୍ରିୟାରେ ଏହି ବିଭାଗର ଅବଦାନ ଅଧିକ ଦୃଶ୍ୟମାନ ହୋଇଛି | ୨୦୧୪ ପରଠାରୁ , ଆଇଟି ରପ୍ତାନି ପ୍ରାୟ ଅଢେଇ ଗୁଣ ବୃଦ୍ଧି ପାଇଛି । ୨୦୧୩-୧୪ ଆର୍ଥିକ ବର୍ଷରେ ୨୩୧୭ କୋଟିରୁ ୨୦୨୧-୨୨ ମସିହାରେ ଏହା ୫୫୦୦ କୋଟିରେ ପହଞ୍ଚିଛି । ଇତିମଧ୍ୟରେ ଆଇଟି କର୍ମଜୀବୀଙ୍କ ସଂଖ୍ୟା ଚାରି ଗୁଣ ବୃଦ୍ଧି ପାଇ ୨୦୧୩-୧୪ରେ ୯,୮୦୦ ରୁ ୨୦୨୨-୨୩ରେ ପ୍ରାୟ ୪୦,୦୦୦ ରେ ପହଞ୍ଚିଛି । ସବୁଠାରୁ ଉଲ୍ଲେଖନୀୟ କଥା ହେଉଛି , ଆଇଟି ସାମର୍ଥ୍ୟ ପାଇଁ ବ୍ୟୟଭାର ବିଗତ ୧୦ ବର୍ଷ ମଧ୍ୟରେ ପ୍ରାୟ ୩୦ ଗୁଣ ବୃଦ୍ଧି ପାଇ ସରକାରୀ ପ୍ରକ୍ରିୟାର ପୁନଃସଂରଚନା ଏବଂ ସେବାପ୍ରଦାନ କ୍ଷେତ୍ର ଗୁଡିକ ୨୦୧୨-୧୩ ଆର୍ଥିକ ବର୍ଷରେ ୪୩.୯୭ କୋଟିରୁ ୨୦୨୨-୨୩ ଆର୍ଥିକ ବର୍ଷରେ ୧,୨୯୦ କୋଟିରେ ପହଞ୍ଚିପାରିଛି ।
ସୂଚନା ପ୍ରଯୁକ୍ତି ସଶକ୍ତିକରଣ ହେତୁ ସରକାରୀ ସହାୟତା ସିଧାସଳଖ ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟକୁ ସ୍ଥାନାନ୍ତରିତ ହୋଇପାରୁଛି । ୨୦୧୭-୧୮ ଆର୍ଥିକ ବର୍ଷରେ ଏହି ସହାୟତା ରାଶିର ସ୍ଥାନାନ୍ତରୀକରଣ ୧୦,୮୮୧କୋଟି ଟଙ୍କା ରହିଥିବା ସ୍ଥଳେ, ୨୦୨୨-୨୩ ବର୍ଷରେ ଏହା ୨୫,୮୭୮ କୋଟି ଟଙ୍କାରେ ପହଞ୍ଚିଛି ।
ଏହି ପରିବର୍ତ୍ତନଗୁଡ଼ିକ ଓଡ଼ିଶାର ନାଗରିକମାନଙ୍କୁ ଡିଜିଟାଲ୍ ବ୍ୟବହାରକାରୀ ଭାବେ ପ୍ରସ୍ତୁତ କରିପାରିଛି , ଯେଉଁମାନେ ସ୍ମାର୍ଟ କାର୍ଡ ମାଧ୍ୟମରେ ସ୍ବାସ୍ଥ୍ୟ ସେବାକୁ ପ୍ରବେଶ କରନ୍ତି ଏବଂ ଏକ କେନ୍ଦ୍ରୀୟ ନାମଲେଖା ପଦ୍ଧତି ମାଧ୍ୟମରେ କଲେଜରେ ଆବେଦନ କରନ୍ତି ।
ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ବିଭାଗର ଆଗାମୀ ପଦକ୍ଷେପ ଓଡିଶାର ରୂପାନ୍ତରୀକରଣକୁ ଆହୁରି ଅନୁକୂଳ କରିବ । ସୁନ୍ଦରଗଡ ଏବଂ ଜୟପୁରରେ ଜିଲ୍ଲା ଡାଟା କେନ୍ଦ୍ର ସ୍ଥାପନ ପାଇଁ ଯୋଜନା କରାଯାଇଛି । ସମସ୍ତ ଗ୍ରାମ ପଞ୍ଚାୟତରେ ପାଇଁ ମୋ ସେବା କେନ୍ଦ୍ର ଏବଂ ଆଭାସୀ ବୈଠକ ସୁବିଧା ସମ୍ପ୍ରସାରିତ ହେବା ସହିତ ସମସ୍ତ ବ୍ଲକ୍ ମୁଖ୍ୟାଳୟରେ ସ୍ମାର୍ଟ ମୋ ସେବା କେନ୍ଦ୍ର ପ୍ରତିଷ୍ଠା ହେବ । ପୁରୀ ଠାରେ ଏକ କେବୁଲ ଲ୍ୟାଣ୍ଟିଂ ଷ୍ଟେସନ ପ୍ରତିଷ୍ଠା ହେବାକୁ ଯାଉଛି । ସେମିକଣ୍ଡକ୍ଟର ଡିଜାଇନ୍ କରୁଥିବା ଷ୍ଟାର୍ଟ ଅପ୍ ଏବଂ ମଧ୍ୟମ ଓ କ୍ଷୁଦ୍ର ଉଦ୍ୟୋଗୀମାନଙ୍କୁ ଓ – ଚିପ୍ କାର୍ଯ୍ୟକ୍ରମ ଜରିଆରେ ଭିଭିଭୂମି ଓ ପୁଞ୍ଜିନିବେଶ ପାଇଁ ସହାୟତା ଯୋଗାଇ ଦିଆଯିବ । ପ୍ରଯୁକ୍ତିର ସମ୍ଭାବିତ କ୍ଷେତ୍ରରେ ଉତ୍କର୍ଷ କେନ୍ଦ୍ର ମାନ ପ୍ରତିଷ୍ଠା କରାଯାଇ ୩୦୦୦ ବ୍ୟକ୍ତିବିଶେଷଙ୍କୁ ପ୍ରଶିକ୍ଷଣ ଦିଆଯିବ । ଖୁବ୍ ଶୀଘ୍ର ଫାବ୍ ଏବଂ ଫାବ୍ ରହିତ ନୀତି ପ୍ରଣୟନ କରାଯିବ । ମହାବିଦ୍ୟାଳୟ ଓ ବିଶ୍ବବିଦ୍ୟାଳୟ ମାନଙ୍କୁ ୱାଇଫାଇ ସଂଯୋଗକୁ ବିସ୍ତାର ଫଳରେ ପ୍ରାୟ ସାତ ଲକ୍ଷ ଛାତ୍ରଛାତ୍ରୀମାନଙ୍କର ଶିକ୍ଷାର ମାନକୁ ସକାରାତ୍ମକ ପ୍ରଭାବିତ କରିପାରିବ ।
ରାଜ୍ୟବାସୀଙ୍କୁ ଦେଇଥିବା ପ୍ରତିଶ୍ରୁତି ପୂରଣ କରିବା ପାଇଁ ଓଡିଶା ସରକାର ଏଯାବତ୍ କାର୍ଯ୍ୟକାରୀ କରିଥିବା ସମସ୍ତ ଯୋଜନା ତଥା ଆଗାମୀ ଦିନରେ କାର୍ଯ୍ୟକାରୀ ହେବାକୁ ଥିବା ଯୋଜନାଗୁଡିକ ମାଧ୍ୟମରେ ବ୍ୟାପକ ପଦକ୍ଷେପ ଗ୍ରହଣ କରିଛନ୍ତି ଏବଂ ଏହି ପ୍ରୟାସରେ ରାଜ୍ୟର ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ବିଭାଗ ଏକ ପ୍ରମୁଖ ଭୂମିକା ଗ୍ରହଣ କରିଅଛି ।
ଏହିସବୁ ଅଭିନବ ପ୍ରୟାସ ପାଇଁ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ବିଭାଗକୁ ଅନେକ ସମୟରେ ପୁରସ୍କୃତ କରାଯାଇଛି । ସେଗୁଡିକ ମଧ୍ୟରେ ‘ ଡିଜିଟାଲ୍ ଟ୍ରାନ୍ସଫର୍ମେସନ୍ ପାଇଁ ସରକାରୀ ପ୍ରକ୍ରିୟାର ପୁନଃସଂରଚନା ‘ ଶ୍ରେଣୀରେ ଜାତୀୟ ଇ – ଗଭର୍ନାନ୍ସ ସିଲଭର ଆୱାର୍ଡ ୨୦୧୯-୨୦ , ଓଡିଶାର ଏକକ ୱିଣ୍ଡୋ ନିବେଶ ପୋର୍ଟାଲ୍ ଗୋସ୍ଵିଫ୍ଟ ପାଇଁ ଭାରତ ସରକାରଙ୍କ ଦ୍ବାରା , ଭୁବନେଶ୍ବର ଜମି ବ୍ୟବହାର ଇଣ୍ଟେଲିଜେନ୍ସ ସିଷ୍ଟମ ପାଇଁ ଜାତୀୟ ଇ – ଗଭର୍ନାନ୍ସ ପୁରସ୍କାର ୨୦୨୧, କମ୍ପ୍ୟୁଟର ସୋସାଇଟି ଅଫ୍ ଇଣ୍ଡିଆ ଦ୍ବାରା ପ୍ରଦତ୍ତ ରାଜ୍ୟ ଶ୍ରେଣୀ ପୁରସ୍କାର ଏବଂ ପ୍ୟାଡି ପ୍ରୋକ୍ୟୁରମେଣ୍ଟ ଆପ୍ଲିକେସନ ସିଷ୍ଟମ ପାଇଁ ଜାତୀୟ ଇ – ଗଭର୍ନାନ୍ସ ପୁରସ୍କାର ୨୦୧୬ ଅନ୍ତର୍ଭୁକ୍ତ ।