ଢେଙ୍କାନାଳ : ଭିଜିଲାନ୍ସ ଜାଲରେ ଧରା ପଡ଼ିଲେ ଢେଙ୍କାନାଳ ସଦର ଥାନା ଅଧିକାରୀ ଅଭିନବ ଡାଳୁଆ । ଜଣେ କୋଇଲା ଟ୍ରକ ମାଲିକଙ୍କ ଠାରୁ ୩୦ ହଜାର ଟଙ୍କା ଲାଞ୍ଚ ନେଉଥିବା ବେଳେ ତାଙ୍କୁ ଭିଜିଲାନ୍ସ ଧରିଥିବା ସୂଚନା ମିଳିଛି । କିଛି ଦିନ ତଳେ ଡାଳୁଆ ଇନ୍ସପେକ୍ଟରରୁ ଡିଏସ୍ପି ପାହ୍ୟାକୁ ପଦୋନ୍ନତି ପାଇଥିଲେ । ତାଙ୍କର ରାଉରକେଲାରେ ପୋଷ୍ଟିଂ ପାଇଁ ଅର୍ଡର ବି ବାହାରି ସାରିଥିଲା । ଭିଜିଲାନ୍ସ ସେଲର ଡିଏସପି ପ୍ରଦ୍ୟୁମ୍ନ କୁମାର ଦିବେଦୀଙ୍କ ନେତୃତ୍ଵରେ ଏକ ୧୧ ଜଣିଆ ଦଳ ସଦର ଥାନା ଓ ଅମଲାପଡାସ୍ଥିତ ସରକାରୀ ବାସଭବନରେ ଚଢ଼ାଉ ଜାରି ରଖିଛି ।
ସୂଚନା ଯେ, କୋଇଲା ବୋଝେଇ ଟ୍ରକ ପାର କରିବାକୁ ଅଭିନବ ଟ୍ରକ ମାଲିକମାନଙ୍କୁ ଧମକାଇବା ସହିତ, ଜଣେ ମାଲିକଙ୍କ ନିକଟରୁ ଏଥିପାଇଁ ୩୦ ହଜାର ଟଙ୍କା ନେବା ବେଳେ ଭିଜିଲାନ୍ସ ସେଲ ହାତରେ ଧରାପଡ଼ିଛନ୍ତି । ୩ଟି କୋଇଲା ବୋଝେଇ ଗାଡ଼ି ମଧ୍ୟରୁ କିଛିଦିନ ତଳେ ଗୋଟିଏ ଟ୍ରକ ପାଇଁ ୧୫ ହଜାର ଟଙ୍କା ନେଇଥିବା ଅଭିଯୋଗ ହୋଇଛି। ମଙ୍ଗଳବାର ଆଉ ୨ଟି ଟ୍ରକ ପାଇଁ ୩୦ ହଜାର ଟଙ୍କା ନେବା ବେଳେ ସେ ଧରାପଡ଼ିଛନ୍ତି।