ଲମତାପୁଟ : କୋରାପୁଟ ଜିଲା ଲମତାପୁଟ ବ୍ଲକ ବଡ଼ପଡ଼ା ଘାଟିରେ ଦୁର୍ଘଟଣା । କାଠ ବୋଝେଇ ଟ୍ରକୁ ପଛରୁ ପିଟିଲା ଏକ ବାଇକ୍ । ଆଉ ଏହି ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ ତିନି ଗୁରୁତର ହୋଇଛନ୍ତି । ସମସ୍ତ ଗୁରୁତରଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି।
ଖବର ଅନୁଯାୟୀ, ବଡ଼ପଡ଼ା ଘାଟିର ମଝି ରାସ୍ତାରେ ଖରାପ ଲାଗି କାଠ ଟ୍ରକ ଛିଡା ହୋଇଥିଲା । ଏହି ସମୟରେ ପଛ ପଟୁ ଏକ ମଟର ସାଇକେଲ ଧକ୍କା ଦେଇଥିଲା । ଯାହାଫଳରେ ଏହି ଦୁର୍ଘଟଣାରେ ୪ଜଣ ଗୁରୁତର ହୋଇଥିଲେ । ଯାହାପରେ ସ୍ଥାନୀୟ ଲୋକେ ସମସ୍ତଙ୍କୁ ଏକ ଘରୋଇ ମେଡିକାଲରେ ଭର୍ତ୍ତି କରିଥିଲେ । ହେଲେ ସେଠାରେ ଡାକ୍ତର ବାଇକ ଆରୋହୀ ଜଗନ୍ନାଥ ମୁଦୁଲିଙ୍କ ମୃତ୍ୟୁ ଘୋଷଣା କରିଥିଲେ । ବାକି ତାଙ୍କ ସ୍ତ୍ରୀ ମଇନା ମୁଦୁଲି, ଦୁଇ ବର୍ଷ ଏବଂ ୪ ବର୍ଷର ଝିଅ ଗୁରୁତର ରହିଛନ୍ତି । ସମସ୍ତ ଗୁରୁତରଙ୍କୁ ପ୍ରାଥମିକ ଚିକିତ୍ସା ପରେ କୋରାପୁଟ ସହିଦ ଲକ୍ଷ୍ମଣ ନାୟକ ମେଡିକାଲକୁ ସ୍ଥାନାନ୍ତରିତ କରାଯାଇଛି । ତେବେ ଜଗନ୍ନାଥ ମଟର ସାଇକେଲ୍ ଯୋଗେ ସ୍ତ୍ରୀ ଏବଂ ଦୁଇ ଝିଅଙ୍କୁ ନେଇ ସଂପର୍କୀୟ ଘର ମାହାଡ଼ା ଗାଁକୁ ଯାଇଥିଲେ । ନିଜ ଘର କଞ୍ଚାଣ ଗାଁକୁ ରାତିରେ ଫେରୁଥିବା ସମୟରେ ଏହି ଦୁର୍ଘଟଣା ଘଟିଛି । ଜଗନ୍ନାଥଙ୍କ ମୃତ୍ୟୁ ଖବର ପାଇଁ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି ।