ବ୍ରହ୍ମପୁର : ଗଞ୍ଜାମ ଜିଲା ଗୋପାଳପୁର ଥାନା ଅନ୍ତର୍ଗତ ଶୀତଳାପଲ୍ଲୀ ଠାରେ ଘର ଭିତରୁ ଜଣେ ଯୁବକଙ୍କ ମୃତଦେହ ଉଦ୍ଧାର । ମୃତକ ହେଲେ ଉକ୍ତ ଗ୍ରାମର ପ୍ରଦୀପ ନାୟକ । ମୃତ୍ୟୁର କାରଣ ଅସ୍ପଷ୍ଟ ରହିଥିବା ବେଳେ ହତ୍ୟା ସନ୍ଦେହ କରାଯାଉଛି । ଘଟଣାସ୍ଥଳରେ ଗୋପାଳପୁର ପୋଲିସ ପହଞ୍ଚି ତଦନ୍ତ କରୁଛି । ପୋଲିସ ତଦନ୍ତ ପରେ ମୃତ୍ୟୁର କାରଣ ଜଣାପଡିବ ।
ଶନିବାର ସକାଳୁ ଘରୁ ପ୍ରଦୀପଙ୍କ ମୃତଦେହ ମିଳିଛି। ତାଙ୍କ ପାଟିରୁ ଫେଣ ଓ କାନରୁ ରକ୍ତ ବାହାରୁଥିବା ଦେଖି ତାଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି। ଏଥିରେ ସମ୍ପୃକ୍ତି ସନ୍ଦେହରେ ପୋଲିସ ତାଙ୍କ ଭାଉଜ କାମିନୀ ନାୟକଙ୍କୁ ଅଟକ ରଖିଛି। ପ୍ରଦୀପଙ୍କ ଭାଇ ଓ ସ୍ତ୍ରୀଙ୍କ ମୃତ୍ୟୁ ପରେ କାମିନୀ ସହ ତାଙ୍କର ଦ୍ବିତୀୟ ବିବାହ ପାଇଁ ଧାର୍ଯ୍ୟ ହୋଇଥିଲା। ମାତ୍ର କୌଣସି କାରଣରୁ କାମିନୀ ଦିଅର ସହ ବିବାହରେ ରାଜି ନହେବାରୁ ପରସ୍ପର ମଧ୍ୟରେ ଝଗଡ଼ା ଆରମ୍ଭ ହୋଇଥିଲା। ଶୁକ୍ରବାର ରାତିରେ ମଧ୍ୟ ପ୍ରବଳ ପାଟିତୁଣ୍ଡ ଘଟିଥିଲା। ଏଣୁ ପ୍ରଦୀପଙ୍କ ସନ୍ଦେହଜନକ ମୃତ୍ୟୁ ପଛରେ କାମିନୀ ଙ୍କ ହାତ ଥିବା ସନ୍ଦେହ କରି ପୋଲିସ ତାଙ୍କୁ ଅଟକ ରଖି ପଚରାଉଚରା କରୁଛି।