ନୂଆଦିଲ୍ଲୀ : ବର୍ଷ ବର୍ଷ ଅପେକ୍ଷାର ଘଟିଲା ଅନ୍ତ । ଭାରତରେ ପହଞ୍ଚିଲେ ୮ ଆଫ୍ରିକୀୟ ଚିତା । ଆଜି ନାମିବ୍ୟାରୁ ୮ଟି ଚିତାବାଘ ଭାରତ ଆସିଛନ୍ତି । ସ୍ବତନ୍ତ୍ର ବିମାନରେ ଆସି ସେମାନେ ମଧ୍ୟପ୍ରଦେଶ ଗ୍ବାଲିୟର ସ୍ଥିତ ଏୟାରଫୋର୍ସ ଷ୍ଟେସନରେ ପହଞ୍ଚିଛନ୍ତି । ଏଠାରୁ ହେଲିକପ୍ଟର ଯୋଗେ ଚିତାବାଘଙ୍କୁ କୁନୋ ଜାତୀୟ ଉଦ୍ୟାନ ନିଆଯିବ । ଆଜି ନିଜ ଜନ୍ମଦିନ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜାତୀୟ ଉଦ୍ୟାନକୁ ଚିତାମାନଙ୍କୁ ସମର୍ପଣ କରିବେ । ଦୀର୍ଘ ୭୦ ବର୍ଷ ପରେ ଭାରତର ଜଙ୍ଗଲରେ ଚିତାବାଘ ଦେଖିବାକୁ ମିଳିବେ ।
ସୂଚନାଯୋଗ୍ୟ, ଶୁକ୍ରବାର ରାତି ପ୍ରାୟ ସାଢେ ୮ଟା(ଭାରତୀୟ ସମୟ)ରେ ନାମିବ୍ୟାର ରାଜଧାନୀରୁ ୮ ଚିତାଙ୍କୁ ନେଇ ସ୍ବତନ୍ତ୍ର ବିମାନ ଭାରତ ଅଭିମୁଖେ ଉଡାଣ ଭରିଥିଲା । ଶନିବାର ଅର୍ଥାତ ଆଜି ସକାଳ ୬ଟା ସୁଦ୍ଧା ଏହା ଗ୍ବାଲିୟରରେ ପହଞ୍ଚିବ ବୋଲି ଅନୁମାନ କରାଯାଉଥିବା ମଧ୍ୟପ୍ରଦେଶ ଚିଫ୍ କନଜରଭେଟର ଅଫ୍ ଫରେଷ୍ଟ(ବନ୍ୟପ୍ରାଣୀ) ଜେ ଏସ ଚୌହାନ ଜଣାଇଥିଲେ । ଶେଷରେ ଆଜି ସକାଳେ ୮ ଚିତାଙ୍କୁ ନେଇ ସ୍ବତନ୍ତ୍ର ବିମାନ ଭାରତରେ ପହଞ୍ଚିଛି । ଆଜି ଦିନ ପ୍ରାୟ ୧୦ଟା ୪୫ ମିନିଟ ବେଳେ ପ୍ରଧାନମନ୍ତ୍ରୀ ଚିତାକୁ କୁନୋ ଜାତୀୟ ଉଦ୍ୟାନ ଭିତରକୁ ଛାଡିବେ ।
୧୯୫୨ ମସିହାରେ ଭାରତରୁ ଚିତା ଲୋପ ପାଇଯାଇଥିବା ଘୋଷଣା କରାଯାଇଥିଲା । ଛଡାଯିବାକୁ ଥିବା ଚିତାଗୁଡିକୁ ଚଳିତ ବର୍ଷ ପ୍ରାରମ୍ଭରେ ସ୍ବାକ୍ଷରିତ ଏକ ବୁଝାମଣାପତ୍ର ଆଧାରରେ ନାମିବ୍ୟାରୁ ଅଣାଯାଇଛି । ଚିତା ପ୍ରକଳ୍ପ ଅଧୀନରେ ଭାରତରେ ଚିତାଙ୍କୁ ପୁଣି ଛଡାଯାଉଛି । ପ୍ରଥମ ପର୍ଯ୍ୟାୟରେ ୮ଟି ଚିତା ଆସିଥିବା ବେଳେ ଆସନ୍ତା ୫ ବର୍ଷରେ ମୋଟ ୫୦ ବାଘ ଭାରତ ଆଣିବାକୁ ସରକାର ଲକ୍ଷ୍ୟ ରଖିଛନ୍ତି । ଚିତା ଛଡାଯିବା ଦ୍ବାରା ଏହା ଭାରତର ଉନ୍ମୁକ୍ତ ଜଙ୍ଗଲ ଓ ତୃଣଭୂମି ବାତାବରଣ ପୁନରୁଦ୍ଧାରରେ ସହାୟକ ହେବ । ଏହା ଜୈବ ବିବିଧତାର ସଂରକ୍ଷଣ କରିବା ସହ ବାତାବରଣରେ ଜଳ ସୁରକ୍ଷା, ଅଙ୍ଗାରକାମ୍ଳ ବର୍ଜନ ଓ ମାଟିର ଆର୍ଦ୍ରତା ସଂରକ୍ଷଣ କରି ସମାଜ ପାଇଁ ହିତକାରକ ହେବ ।