ମୁମ୍ବାଇ: ମନୋରଞ୍ଜନ ଜଗତରୁ ଆସିଛି ଦୁଃଖଦ ଖବର | ଭେଟେରାନ ଅଭିନେତା ଅଖିଳ ମିଶ୍ରାଙ୍କ ପରଲୋକ ହୋଇଯାଇଛି। ବୁଧବାର ଅପରାହ୍ନରେ ମୁମ୍ବାଇର ମିରା ରୋଡ୍ ସ୍ଥିତ ତାଙ୍କ ବାସଭବନରେ ମିଶ୍ରା ପଡ଼ିଯାଇଥିଲେ । ଅଖିଳଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା । ତାଙ୍କୁ ଗୁରୁତର ଅବସ୍ଥାରେ ଡ଼ାକ୍ତରଖାନାରେ ଭର୍ତ୍ତି କରାଯାଇଥିଲା। ତେବେ ସେଠାରେ ତାଙ୍କର ମୃତ୍ୟୁ ହୋଇଥିଲା।
ଅଖିଳ ଅନେକ ଟିଭି ସୋ ଏବଂ ଚଳଚ୍ଚିତ୍ରରେ କାମ କରିଥିଲେ | ସେ ଭଓ୍ବଁର, ଉତ୍ତରଣ, ଉଡାନ୍, ସିଆଇଡି, ଶ୍ରୀମାନ ଶ୍ରୀମତି, ଭାରତ ଏକ୍ ଖୋଜ୍, ରଜନୀ ଭଳି ଟିଭି ସୋ’ କରିଥିଲେ। ଏହାଛଡ଼ା ଅଖିଳ ମିଶ୍ରା ଡନ୍ ଆବା, ହାଜାରୋଁ ଖ୍ବାଇସେ ଐସି, ୩ ଇଡିୟଟ୍ସ ଭଳି ଚଳଚ୍ଚିତ୍ରରେ ମଧ୍ୟ କାମ କରିଥିଲେ | ଅଖିଳ ଅନେକ ବର୍ଷ ଧରି ମନୋରଞ୍ଜନ ଜଗତ ସହ ଜଡ଼ିତ ଥିଲେ । ତେବେ ‘୩ ଇଡିୟଟ୍ସ’ରେ ଲାଇବ୍ରେରିଆନ୍ ଡୁବି ଭୂମିକା ପାଇଁ ସେ ଖ୍ୟାତି ଅର୍ଜନ କରିଥିଲେ | ‘ଉତ୍ତରଣ’ ସିରିଏଲରେ ଉମେଦ ସିଂ ବୁଦେଲା ଭୂମିକାରେ ମଧ୍ୟ ତାଙ୍କୁ ଦର୍ଶକ ବହୁତ ପସନ୍ଦ କରିଥିଲେ ।
ଅଖିଲଙ୍କ ପତ୍ନୀ ସୁଜାନ ବର୍ନେଟ ମଧ୍ୟ ପେସାରେ ଜଣେ ଅଭିନେତ୍ରୀ | ଅଖିଲଙ୍କ ପ୍ରଥମ ପତ୍ନୀ ହେଉଛନ୍ତି ମଞ୍ଜୁ ମିଶ୍ରା । ୧୯୮୩ରେ ବିବାହ ପରେ ୧୯୯୭ରେ ଉଭୟ ପରସ୍ପରଠାରୁ ଅଲଗା ହୋଇଥିଲା । ଏହା ପରେ ଅଖିଳ ୨୦୦୯ରେ ସୁଜାନ ବର୍ନେଟଙ୍କୁ ବିବାହ କରିଥିଲେ।