ତୁରୁଭେକେରେ : ବରିଷ୍ଠ କଂଗ୍ରେସ ନେତା ଦିଗବିଜୟ ସିଂହ ରବିବାର କହିଛନ୍ତି ଯେ ରାହୁଲ ଗାନ୍ଧୀ ‘ଭାରତ ଯୋଡ ଯାତ୍ରା’ର ପ୍ରତୀକ ପାଲଟିଛନ୍ତି ଏବଂ ଏହି ଯାତ୍ରା ପରେ ତାଙ୍କୁ ଏକ ନୂଆ ଅବତାରରେ ଦେଖିବାକୁ ମିଳିବ।
ଦିଗବିଜୟ ସିଂହ କନ୍ୟାକୁମାରୀରୁ ଆରମ୍ଭ ହୋଇଥିବା ‘ଭାରତ ଯୋଡ ଯାତ୍ରା’ରେ ଯୋଗ ଦେଉଛନ୍ତି। ଗଣମାଧ୍ୟମକୁ ଏକ ସାକ୍ଷାତକାରରେ ସେ କହିଛନ୍ତି ଯେ ଏହି ଯାତ୍ରା ନିଶ୍ଚିତ ଭାବେ କଂଗ୍ରେସକୁ ସକରାତ୍ମକ ଭାବେ ପ୍ରଭାବିତ କରିଛି । କାରଣ ବହୁ ବର୍ଷ ପରେ ପ୍ରଥମ ଥର ପାଇଁ ଦୂରଦୂରାନ୍ତ, ଦୁର୍ଗମ ଅଞ୍ଚଳ ତଥା ଗାଁ ଗଣ୍ଡାରେ ଏହି ପୁରାତନ ଦଳ ଉପରେ ଆଲୋଚନା ହେଉଛି। ରାହୁଲ ଗାନ୍ଧୀ ଏହି ପୂରା ପଦଯାତ୍ରାରେ ଯୋଗ ଦେଇଥିବାରୁ ଲୋକମାନେ ବେଶ୍ ପ୍ରଭାବିତ ହୋଇଛନ୍ତି ।
ଏହି ଦଳ ପାର୍ଟିକୁ ମଜବୁତ୍ କରିବାରେ ସହାୟକ ହେବ ବୋଲି ସେ କହିଛନ୍ତି। ସିଂହ କହିଛନ୍ତି ଯେ ବର୍ତ୍ତମାନ କଂଗ୍ରେସରେ ବିଚାରଧାରା ପ୍ରତି ପ୍ରତିବଦ୍ଧତା ଏବଂ ନେତୃତ୍ୱର ଅଭାବ ରହିଛି । କନ୍ୟାକୁମାରୀ ଠାରୁ ଆରମ୍ଭ ହୋଇଥିବା ‘ଭାରତ ଯୋଡ ଯାତ୍ରା’ ଜମ୍ମୁ କାଶ୍ମୀରରେ ଶେଷ ହେବ। ରାହୁଲ ଗାନ୍ଧୀ ଏହି ଯାତ୍ରାର ନେତୃତ୍ବ ନେଉଛନ୍ତି । ଅନେକ କଂଗ୍ରେସ ନେତା ଏହି ଯାତ୍ରା ସମୟରେ ପ୍ରାୟ ୩୫୦୦ କିଲୋମିଟର ପର୍ଯ୍ୟନ୍ତ ଚାଲିବେ ।
ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଦିଗବିଜୟ ସିଂହ କହିଛନ୍ତି ଯେ ଯଦି ଏହି ଦେଶରେ କେହି ‘ତ୍ୟାଗ’ କରନ୍ତି, ତେବେ ସେ ସର୍ବଦା ଆଶୀର୍ବାଦ ପ୍ରାପ୍ତ ହୁଅନ୍ତି। ସୋନିଆ ଗାନ୍ଧୀ ପ୍ରଧାନମନ୍ତ୍ରୀ ପଦ ତ୍ୟାଗ କରିଥିଲେ। ଏବଂ ଏଠାରେ ରାହୁଲ ଗାନ୍ଧୀ ପଦଯାତ୍ରା କରୁଛନ୍ତି, ଗରମରେ ଝାଳ ବୁହାଉଛନ୍ତି, ବର୍ଷାରେ ଛିଡା ହୋଇଛନ୍ତି, ସମସ୍ତ ପ୍ରକାର ମିଥ୍ୟା ଖବର ଏବଂ ବଦନାମ ବିରୋଧରେ ଲଢେଇ କରୁଛନ୍ତି। ସେ ‘ଭାରତ ଯୋଡ’ର ପ୍ରତୀକ ପାଲଟିଛନ୍ତି।
ଏହି ଯାତ୍ରା ରାହୁଲଙ୍କ ପାଇଁ କିପରି ସହାୟକ ହେବ ବୋଲି ପଚରାଯିବାରୁ ସିଂହ କହିଛନ୍ତି, ବର୍ତ୍ତମାନ ଆପଣ ତାଙ୍କୁ ଏକ ନୂଆ ଅବତାରରେ ଦେଖିବେ। ଦିଗବିଜୟ କହିଛନ୍ତି ଯେ ସେ ରାହୁଲଙ୍କୁ ଦୀର୍ଘ ଦିନରୁ ଜାଣିଛନ୍ତି ଏବଂ ଥରେ ଯଦି ସେ କିଛି କରିବାକୁ ନିଷ୍ପତ୍ତି ନିଅନ୍ତି, ତେବେ ତାହା ହାସଲ କରିବାରୁ ତାଙ୍କୁ କେହି ଅଟକାଇ ପାରିବେ ନାହିଁ।
‘ଭାରତ ଯୋଡ ଯାତ୍ରା’ ପରେ ରାହୁଲ ଗାନ୍ଧୀଙ୍କୁ ନୂଆ ଅବତାରରେ ଦେଖିବାକୁ ମିଳିବ: ଦିଗବିଜୟ ସିଂହ
