ନୂଆଦିଲ୍ଲୀ : ଦେଶରେ ଆରମ୍ଭ ହୋଇଛି ୫ଜି ମୋବାଇଲ ଫୋନ ସେବା । ପରୀକ୍ଷାମୂଳକ ଭାବେ ଜିଓ ଏବଂ ଏୟାରଟେଲ ଦେଶର କେତୋଟି ସ୍ଥାନରେ ଉକ୍ତ ସେବା ଆରମ୍ଭ କରିଛନ୍ତି। ରିଲାଏନ୍ସ ଜିଓ ଦଶହରାରୁ ଦେଶର ୪ଟି ସହରରେ ୫ଜି ସେବା ଆରମ୍ଭ ଘୋଷଣା କରିଛି। ସେହିପରି ଏୟାରଟେଲ ୮ ଟି ସହରରେ ୫ଜି ପ୍ଲସ ସେବା ଆରମ୍ଭ କରିଛି । ଭାରତର ୮ଟି ସହରରେ ଗୁରୁବାର ଠାରୁ ଏହି ସେବା ଆରମ୍ଭ କରିଛି ଭାରତୀ ଏୟାରଟେଲ୍ । ଏୟାରଟେଲ ୪ଝି ସିମ୍ ବର୍ତ୍ତମାନ ୫ଜି ଭଳି କାର୍ଯ୍ୟକାରୀ ହେବ। ତେଣୁ ଉପଭୋକ୍ତାଙ୍କୁ ସିମ୍ କାର୍ଡ ବଦଳାଇବାକୁ ପଡିବ ନାହିଁ ବୋଲି କମ୍ପାନୀ କହିଛି । ଦିଲ୍ଲୀ, ମୁମ୍ବାଇ, ଚେନ୍ନାଇ, ବେଙ୍ଗାଲୁରୁ, ହାଇଦ୍ରାବାଦ, ସିଲିଗୁରୀ, ନାଗପୁର ଏବଂ ବାରଣାସୀର ଗ୍ରାହକମାନେ ପର୍ଯ୍ୟାୟକ୍ରମେ ଏୟାରଟେଲ ୫ଜି ପ୍ଲସ ସେବାକୁ ଉପଭୋଗ କରିବା ଆରମ୍ଭ କରିବେ ବୋଲି କମ୍ପାନୀ କହିଛି । ଯେଉଁ ଗ୍ରାହକଙ୍କର ୫ଜି ସ୍ମାର୍ଟଫୋନ୍ ଅଛି, ସେବା ଅଧିକ ବ୍ୟାପକ ନହେବା ପର୍ଯ୍ୟନ୍ତ ସେମାନଙ୍କର ଡାଟା ପ୍ଲାନର ହାଇ ସ୍ପିଡ୍ ଏୟାରଟେଲ୍ ୫ଜି ପ୍ଲସ୍ ଉପଭୋଗ କରିବେ ।
ଏୟାରଟେଲ ୫ଜି ପ୍ଲସ୍ ଏକ ଟେକ୍ନୋଲୋଜିରେ ଚାଲିଥାଏ, ଯେଉଁଥିରେ ସବୁଠାରୁ ବିକଶିତ ଇକୋସିଷ୍ଟମ ସହିତ ବିଶ୍ୱରେ ସର୍ବ ବୃହତ ବ୍ୟବହାରକାରୀ ଅଛନ୍ତି । ତେଣୁ ଭାରତର ସମସ୍ତ ୫ଜି ସ୍ମାର୍ଟଫୋନ୍ ଏୟାରଟେଲ ନେଟୱାର୍କରେ ନିରବଚ୍ଛିନ୍ନ ଭାବରେ କାମ କରିବ । ଏୟାରଟେଲ ୫ଜି ପ୍ଲସ୍ ହାଇ-ଡେଫିନେସନ୍ ଭିଡିଓ ଷ୍ଟ୍ରିମିଂ, ଗେମିଂ, ଚାଟିଂ, ଫଟୋ ଅପଲୋଡ୍ ଏବଂ ସୁପରଫାଷ୍ଟ ଆକ୍ସେସ୍ ଅନୁମତି ଦେବ । ଗତ ସପ୍ତାହରେ ଦେଶରେ ୫ଜିର ଆନୁଷ୍ଠାନିକ ଉନ୍ମୋଚନ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସ୍ମାର୍ଟ ଫାର୍ମିଂ ସମାଧାନ ସହିତ ଜରୁରୀକାଳୀନ ପରିସ୍ଥିତିରେ ପ୍ରାଥମିକ ସ୍ୱାସ୍ଥ୍ୟସେବା ଯୋଗାଇବା ପାଇଁ ଭାରତୀ ଏୟାରଟେଲ ଏକ ୫ଜି ସଂଯୁକ୍ତ ଆମ୍ବୁଲାନ୍ସ ପ୍ରଦର୍ଶନ କରିଥିଲା ।