ପାନଜୀ: ଗୋଆ ବିଜେପି ମୁଖପାତ୍ର ସାଭିଓ ରଡ୍ରିଗସ୍ ଫିଫା ବିଶ୍ୱକପକୁ ବର୍ଜନ କରିବାକୁ କେନ୍ଦ୍ର ସରକାର ଏବଂ ଭାରତୀୟ ଫୁଟବଲ ସଂଘକୁ ଅପିଲ କରିଛନ୍ତି। ଭାରତ ସରକାରଙ୍କ ଦ୍ୱାରା ପଳାତକ ଘୋଷିତ ହୋଇଥିବା ବିବାଦୀୟ ଇସଲାମ ପ୍ରଚାରକ ଜାକିର ନାଏକଙ୍କୁ କତାର ଫିଫା ବିଶ୍ୱକପକୁ ନିମନ୍ତ୍ରଣ କରିଥିବାରୁ ରଡ୍ରିଗସ୍ ଏଭଳି ଦାବି କରିଛନ୍ତି। ନାଏକ ୨୦୧୬ରେ ଭାରତ ଛାଡ଼ି ମାଲେସିଆ ପଳାୟନ କରିଥିଲେ, ଯେଉଁଠାରେ ତାଙ୍କୁ ସ୍ଥାୟୀ ଆବାସ ପ୍ରଦାନ କରାଯାଇଥିଲା। ତାଙ୍କ ପ୍ରତ୍ୟର୍ପଣ ପାଇଁ ଭାରତ ମାଲେସିଆ ସରକାରଙ୍କୁ ଅନୁରୋଧ କରିଛି ।
ରଡ୍ରିଗସ୍ ମଙ୍ଗଳବାର ଏକ ବିବୃତ୍ତିରେ କହିଛନ୍ତି, “ଜାକିର ନାଏକ ଭାରତୀୟ ଆଇନ ଅନୁଯାୟୀ ଜଣେ ଓ୍ବାଣ୍ଟେଡ୍ ବ୍ୟକ୍ତି । ତାଙ୍କ ବିରୋଧରେ ମନି ଲଣ୍ଡରିଂ ଓ ଘୃଣା ଭାଷଣ ଦେବା ଭଳି ଗୁରୁତର ଅଭିଯୋଗ ରହିଛି । ସେ କହିଛନ୍ତି ଯେ ଜାକିର ନାଏକ ଆତଙ୍କବାଦୀଙ୍କ ସମର୍ଥକ। ସେ ନିଜେ କୌଣସି ଆତଙ୍କବାଦୀଠାରୁ କମ୍ ନୁହଁନ୍ତି | ଜାକିର ଆତଙ୍କବାଦୀ ଓସାମା ବିନ୍ ଲାଦେନକୁ ଖୋଲାଖୋଲି ସମର୍ଥନ କରିଛି ଏବଂ ଭାରତରେ ଇସଲାମିକ ଚରମପନ୍ଥୀ ବିଚାର ଏବଂ ଘୃଣା ପ୍ରସାର କରିବାରେ ପ୍ରମୁଖ ଭୂମିକା ଗ୍ରହଣ କରିଛନ୍ତି ।
ବିଜେପି ମୁଖପାତ୍ର କେନ୍ଦ୍ର ସରକାର, ଭାରତୀୟ ଫୁଟବଲ୍ ସଂଘ, କାତାରରେ ରହୁଥିବା ଭାରତୀୟ ଏବଂ ଫିଫା ବିଶ୍ୱକପ ପାଇଁ ଆରବ ଦେଶକୁ ଯାତ୍ରା କରିବାକୁ ଯୋଜନା କରୁଥିବା ଫୁଟବଲ ପ୍ରେମୀଙ୍କୁ ଏହି ବିଶ୍ବକପକୁ ବର୍ଜନ କରିବା ପାଇଁ ଅନୁରୋଧ କରିଛନ୍ତି। ସେ କହିଛନ୍ତି ଯେ ଫିଫା ବିଶ୍ୱକପ ଏକ ବିଶ୍ୱସ୍ତରୀୟ ଇଭେଣ୍ଟ ଏବଂ ଏହି ଚମତ୍କାର କ୍ରୀଡା ଇଭେଣ୍ଟକୁ ଉପଭୋଗ କରିବାକୁ ସାରା ବିଶ୍ୱରୁ ବହୁ ସଂଖ୍ୟାରେ ଲୋକ ଆସିଥାନ୍ତି। ଟେଲିଭିଜନ ଏବଂ ଇଣ୍ଟରନେଟରେ କୋଟି କୋଟି ଦର୍ଶକ ଏହି ମ୍ୟାଚ୍ ଦେଖନ୍ତି | ରଡ୍ରିଗୁସ୍ ଦାବି କରିଛନ୍ତି ଯେ ଯେତେବେଳେ ବିଶ୍ୱ ଆତଙ୍କବାଦ ସହ ଲଢୁଛି, ନାଏକଙ୍କୁ ଏକ ପ୍ଲାଟଫର୍ମ ଦେବା ଆତଙ୍କବାଦୀଙ୍କୁ ଚରମପନ୍ଥୀ ବିଚାର ଏବଂ ଘୃଣା ପ୍ରସାର ପାଇଁ ପ୍ଲାଟଫର୍ମ ପ୍ରଦାନ କରିବା ସହିତ ସମାନ।