ନୂଆଦିଲ୍ଲୀ: ପନିପରିବା ଓ ଅତ୍ୟାବଶ୍ୟକ ସାମଗ୍ରୀର ଦରଦାମ୍ ବୃଦ୍ଧି ନେଇ କଂଗ୍ରେସ ମଙ୍ଗଳବାର କେନ୍ଦ୍ରର ବିଜେପି ସରକାର ଉପରେ ତୀବ୍ର ଆକ୍ରମଣ କରିଛି । କେନ୍ଦ୍ର ସରକାରଙ୍କ ଲୋକ ବିରୋଧୀ ନୀତି ଯୋଗୁଁ ଦରଦାମ୍ ଆକାଶଛୁଆଁ ହୋଇଛି ବୋଲି ଅଭିଯୋଗ କରିଛି କଂଗ୍ରେସ । କିନ୍ତୁ କେନ୍ଦ୍ର ସରକାର ଦରଦାମ୍ ନିୟନ୍ତ୍ରଣ କରିବା ପରିବର୍ତ୍ତେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଭାବମୂର୍ତ୍ତି ରକ୍ଷା କରିବା ଓ ନିଜ ପୁଞ୍ଜିପତି ବନ୍ଧୁମାନଙ୍କୁ ଉପକୃତ କରିବା ଉପରେ ଧ୍ୟାନ ଦେଉଛନ୍ତି । ଲୋକେ ଏହା ଜାଣି ସାରିଲେଣି ବୋଲି କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ କହିଛନ୍ତି ।
ଦରଦାମ୍ ବୃଦ୍ଧି ସମ୍ପର୍କିତ ଏକ ଖବର ପୋଷ୍ଟ କରି ରମେଶ ‘ଏକ୍ସ’ (ପୂର୍ବରୁ ଟ୍ୱିଟର) ରେ ଲେଖିଛନ୍ତି, ‘ମୋଦୀ ସରକାରଙ୍କ ଲୋକ ବିରୋଧୀ ନୀତି ଯୋଗୁଁ ଦରଦାମ୍ ଆକାଶଛୁଆଁ ହୋଇଛି। ପନିପରିବା, ଅଟା, ଚାଉଳ, ଡାଲି ସହ ସମସ୍ତ ଅତ୍ୟାବଶ୍ୟକ ଦ୍ରବ୍ୟର ମୂଲ୍ୟ କ୍ରମାଗତ ଭାବେ ବୃଦ୍ଧି ପାଉଛି। ଦେଢ ମାସ ମଧ୍ୟରେ ଥାଳି ୨୮ ପ୍ରତିଶତ ମହଙ୍ଗା ହୋଇଛି ।
ସେ କହିଛନ୍ତି, ‘ଗୋଟିଏ ପଟେ ଦରଦାମ୍ ବୃଦ୍ଧି ପାଉଛି, ଅନ୍ୟପଟେ କୃଷକମାନେ ସେମାନଙ୍କ ଉତ୍ପାଦର ଉପଯୁକ୍ତ ମୂଲ୍ୟ ପାଉନାହାଁନ୍ତି । ସର୍ବନିମ୍ନ ସହାୟକ ମୂଲ୍ୟର ପ୍ରତିଶ୍ରୁତି ଆଜି ପର୍ଯ୍ୟନ୍ତ ପୂରଣ ହୋଇନାହିଁ। କୃଷକମାନେ କମ୍ ମୂଲ୍ୟରେ ଶସ୍ୟ ବିକିବାକୁ ବାଧ୍ୟ ହେଉଛନ୍ତି । କିନ୍ତୁ ପୁଞ୍ଜିପତିଙ୍କ ଗୋଦାମରେ ପହଞ୍ଚିବା ପରେ କୃଷିଜାତ ଦ୍ରବ୍ୟ ମୂଲ୍ୟ ହଠାତ୍ ବୃଦ୍ଧି ପାଉଛି । କଂଗ୍ରେସର ସାଧାରଣ ସମ୍ପାଦକ ଆହୁରି ମଧ୍ୟ କହିଛନ୍ତି ଯେ ପିଆଜ ଉପରେ ରପ୍ତାନି ଶୁଳ୍କ ୪୦% ବୃଦ୍ଧି ଯୋଗୁଁ ନାସିକରେ ଏସିଆର ସବୁଠୁ ବଡ଼ ପିଆଜ ବଜାର ବନ୍ଦ ରହିଛି । ରମେଶ ଦାବି କରିଛନ୍ତି, ‘ଲୋକେ ଏବେ ବୁଝି ସାରିଲେଣି ଯେ ଏହି ସରକାରଙ୍କ ସମ୍ପୂର୍ଣ୍ଣ ଧ୍ୟାନ କେବଳ ପ୍ରଧାନମନ୍ତ୍ରୀଙ୍କ ଭାବମୂର୍ତ୍ତି ରକ୍ଷା କରିବା ଓ ଏହାର ପୁଞ୍ଜିପତି ବନ୍ଧୁମାନଙ୍କ ଉପକାର କରିବା ।’