ନୂଆଦିଲ୍ଲୀ: ଦିଲ୍ଲୀର ମହାନଗର ନିଗମ (ଏମସିଡି)ର ମେୟର, ଡେପୁଟି ମେୟର ଏବଂ ଷ୍ଟାଣ୍ଡିଂ କମିଟିର ୬ ଜଣ ସଦସ୍ୟଙ୍କ ନିର୍ବାଚନ ଫେବୃଆରୀ ୧୬ରେ ଅନୁଷ୍ଠିତ ହେବ। ଏନେଇ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ପ୍ରସ୍ତାବକୁ ଦିଲ୍ଲୀ ଉପରାଜ୍ୟପାଳ ଭି.କେ ସକ୍ସେନା ଗ୍ରହଣ କରିଛନ୍ତି। ବିଜେପି ଏବଂ ଆମ୍ ଆଦମୀ ପାର୍ଟି (ଆପ୍) ମଧ୍ୟରେ ବାଦବିବାଦ ଯୋଗୁଁ ପୂର୍ବରୁ ତିନି ଥର ଏମସିଡି ମେୟର ନିର୍ବାଚିତ ସ୍ଥଗିତ ରହିଥିଲା ।
ଉପରାଜ୍ୟପାଳଙ୍କ ଦ୍ୱାରା ମନୋନୀତ ୧୦ ଜଣ କର୍ପୋରେଟରଙ୍କୁ ଭୋଟ୍ ଦେବାକୁ ଅନୁମତି ଦିଆଯିବା ପରେ ବିବାଦ ସୃଷ୍ଟି ହୋଇଥିଲା । ଆପର ତୀବ୍ର ବିରୋଧ ପରେ ଏମସିଡି ବୈଠକ ବାତିଲ କରାଯାଇଥିଲା। ଦିଲ୍ଲୀ ମ୍ୟୁନିସିପାଲିଟି କର୍ପୋରେସନ୍ ଆଇନ ମୁତାବକ ମନୋନୀତ ସଦସ୍ୟ ଗୃହର ବୈଠକରେ ଭୋଟ୍ ଦେଇ ପାରିବେ ନାହିଁ।
ଡିସେମ୍ବରରେ ଅନୁଷ୍ଠିତ ଏମସିଡି ନିର୍ବାଚନରେ ଆମ୍ ଆଦମୀ ପାର୍ଟି ଏକକ ସଂଖ୍ୟାଗରିଷ୍ଠ ଦଳ ଭାବେ ଉଭା ହୋଇଥିଲା । ଆପର ଅଧିକ ଆସନ ଜିତିଥିଲେ ମଧ୍ୟ ଗୁପ୍ତ ମତଦାନ ଏବଂ କ୍ରସ୍ ଭୋଟିଂ ମେୟର ନିର୍ବାଚନର ଫଳାଫଳ ବଦଳାଇ ଦେଇପାରେ |
ଡିସେମ୍ବରରେ ଅନୁଷ୍ଠିତ ଏମସିଡି ନିର୍ବାଚନରେ ଆମ୍ ଆଦମୀ ପାର୍ଟି ୧୩୪ଟି ୱାର୍ଡ ଜିତି ବିଜେପିର ୧୫ ବର୍ଷର ଶାସନର ଅନ୍ତ ଘଟାଇଥିଲା | ଅନ୍ୟପକ୍ଷରେ, ୧୦୪ ୱାର୍ଡ ଜିତି ବିଜେପି ଦ୍ୱିତୀୟ ସ୍ଥାନରେ ରହିଥିଲା । କଂଗ୍ରେସ କେବଳ ୯ଟି ଆସନରେ ସୀମିତ ରହିଥିଲା ।