ମୁମ୍ବାଇ: ଜମି ଦୁର୍ନୀତି ମାମଲାରେ ୬ ଘଣ୍ଟାରୁ ଅଧିକ ସମୟ ଜେରା ପରେ ଇଡି ଶିବସେନା ସାଂସଦ ସଞ୍ଜୟ ରାଉତଙ୍କୁ ରବିବାର ମଧ୍ୟରାତ୍ରିରେ ଗିରଫ କରିଛି। ଅଧିକାରୀମାନେ କହିଛନ୍ତି ଯେ ସେ ତଦନ୍ତରେ ସହଯୋଗ କରିବାକୁ ମନା କରିବାରୁ ତାଙ୍କୁ ଗିରଫ କରାଯାଇଥିଲା । ଉଲ୍ଲେଖଯୋଗ୍ୟ ଯେ ରବିବାର ସକାଳ ପ୍ରାୟ ୭ ଟା ସମୟରେ ଇଡି ଅଧିକାରୀମାନେ ରାଉତଙ୍କ ବାସଭବନରେ ପହଞ୍ଚିଥିଲେ। ପାତ୍ରା ଚଲ୍ ଜମି ଦୁର୍ନୀତି ମାମଲାରେ ରାଉତଙ୍କୁ ପଚରାଉଚରା କରାଯାଇଥିଲା। ଏହି ସମୟରେ ଅନୁସନ୍ଧାନକାରୀ ସଂସ୍ଥାର ଟିମ୍ ସହିତ ସିଆରପିଏଫ୍ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ। ପରେ ତାଙ୍କୁ ଅଟକ ରଖାଯାଇଥିଲା । ଶିବସେନାର ରାଜ୍ୟସଭା ସଦସ୍ୟ ରାଉତଙ୍କୁ ଆଜି ମୁମ୍ବାଇର ଏକ ସ୍ୱତନ୍ତ୍ର ପିଏମ୍ଏଲ୍ଏ କୋର୍ଟରେ ହାଜର କରାଯିବ । ଇଡି ତାଙ୍କୁ ରିମାଣ୍ଡରେ ନେବାକୁ ଆବେଦନ କରିବ ।
ଉଲ୍ଲେଖଯୋଗ୍ୟ, ରାଉତ ଏହି ମାମଲାରେ ନିଜର ବୟାନ ରେକର୍ଡ କରିବା ପାଇଁ ଜୁଲାଇ ୧ରେ ଇଡି ସମ୍ମୁଖରେ ହାଜର ହୋଇଥିଲେ। ଏହା ପରେ ଏଜେନ୍ସି ତାଙ୍କୁ ଦୁଇଥର ସମନ ଜାରି କରିଥିଲା, କିନ୍ତୁ ସଂସଦର ମୌସୁମୀ ଅଧିବେଶନରେ ବ୍ୟସ୍ତ ଥିବା ଦର୍ଶାଇ ସେ ହାଜର ହୋଇନଥିଲେ। ରାଜ୍ୟସଭା ସଦସ୍ୟ ରାଉତ ସେ କୌଣସି ଭୁଲ୍ କରିଥିବା କଥାକୁ ଅସ୍ୱୀକାର କରିଆସିଛନ୍ତି । ରାଜନୈତକ ପ୍ରତିଶୋଧ ନେବାକୁ ତାଙ୍କୁ ଟାର୍ଗେଟ କରାଯାଉଥିବା ରାଉତ ଅଭିଯୋଗ କରିଛନ୍ତି।
ଇଡି ଚଢ଼ାଉର କିଛି ସମୟ ପରେ ସେ ଟୁଇଟ୍ କରି କହିଥିଲେ, “ମୁଁ ସ୍ୱର୍ଗତ ବାଲାସାହେବ ଠାକରେଙ୍କ ରାଣ ନେଇ କହୁଛି ଯେ ମୋର କୌଣସି ଘୋଟାଲା ସହିତ ମୋର କୌଣସି ସମ୍ପର୍କ ନାହିଁ। ସେ ଲେଖିଥିଲେ,” ମୁଁ ମରିଯିବି, କିନ୍ତୁ ଶିବସେନା ଛାଡିବି ନାହିଁ। ଇଡି ରେଡ୍ ସମୟରେ ବହୁ ସଂଖ୍ୟାରେ ଶିବ ସେନା ସମର୍ଥକମାନେ ରାଉତଙ୍କ ବାସଭବନ ବାହାରେ ଏକତ୍ରିତ ହୋଇ ଏହି କେନ୍ଦ୍ରୀୟ ଏଜେନ୍ସିର କାର୍ଯ୍ୟାନୁଷ୍ଠାନକୁ ବିରୋଧ କରିଥିଲେ। ସମର୍ଥକମାନେ ହାତରେ ଗେରୁଆ ରଙ୍ଗର ପତାକା ଏବଂ ବ୍ୟାନର ଧରି ଏଜେନ୍ସି ବିରୋଧରେ ସ୍ଲୋଗାନ ଦେଇଥିଲେ।
ଘରର ଝରକା ଦେଇ ରାଉତ ସମର୍ଥକଙ୍କୁ ହାତ ହଲାଇଥିଲେ। ତାଙ୍କ ସାନଭାଇ ତଥା ବିଧାୟକ ସୁନୀଲ ରାଉତ ଇଡିଙ୍କ କାର୍ଯ୍ୟକଳାପକୁ ନେଇ ପୋଲିସ ସହ ଯୁକ୍ତିତର୍କ କରୁଥିବା ଦେଖିବାକୁ ମିଳିଥିଲା। ରାଉତଙ୍କ ବଙ୍ଗଳା ବାହାରେ ଠିଆ ହୋଇଥିବା ଜଣେ ମହିଳା ଶିବ ସୈନିକ ପଚାରିଥିଲେ, ଆମେ ଗତ ୩୦ ବର୍ଷ ଧରି ଶିବସେନାଙ୍କ ସହ ଅଛୁ। ସଞ୍ଜୟ ରାଉତ ଆମର ନେତା ଏବଂ ଆମେ ତାଙ୍କ ସହିତ ଛିଡ଼ା ହୋଇଛୁ | ଯାହା ଜଣାପଡୁଛି ଇଡି ପାଖରେ କେବଳ ଶିବସେନା ନେତାଙ୍କ ବିରୋଧରେ ହିଁ ପ୍ରମାଣ ରହିଛି, ଅନ୍ୟ କୌଣସି ରାଜନୈତିକ ଦଳ ବିରୁଦ୍ଧରେ ନୁହେଁ। ମୁଁ ଜାଣିବାକୁ ଚାହୁଁଛି ବିଜେପି ନେତାଙ୍କ ପାଖରେ କୌଣସି ସମ୍ପତ୍ତି ନାହିଁ କି?