ଲାହୋର : ଦୀର୍ଘ ୧୭ ବର୍ଷ ପରେ ପାକିସ୍ତାନ ଗସ୍ତ କରିବ ଇଂଲଣ୍ଡ କ୍ରିକେଟ୍ ଦଳ । ପାକିସ୍ତାନରେ ମୋଟ ୭ଟି ଟି-୨୦ ଖେଳିବ ଇଂଲଣ୍ଡ। ଆସନ୍ତା ସେପ୍ଟେମ୍ବର ୨୦ରୁ ଅକ୍ଟୋବର ୨ ତାରିଖ ମଧ୍ୟରେ ଉଭୟ କରାଚି ଓ ଲାହୋରରେ ଏହି ଶୃଙ୍ଖଳା ଖେଳି ଅଷ୍ଟ୍ରେଲିଆରେ ଆୟାଜିତ ହେବାକୁ ଥିବା ଆଗାମୀ ଟି-୨୦ ବିଶ୍ବକପ୍ ପାଇଁ ପ୍ରସ୍ତୁତି କରିବ।
କରାଚିର ନ୍ୟାସ୍ନାଲ ଷ୍ଟାଡିୟମ୍ରେ ପ୍ରଥମ ୪ ମ୍ୟାଚ୍ (ସେପ୍ଟେମ୍ବର ୨୦, ୨୨, ୨୩ ଓ ୨୫ ତାରିଖ) ଖେଳାଯିବା ପରେ ଲାହୋରର ଗଦାଫି ଷ୍ଟାଡିୟମରେ ଅବଶିଷ୍ଟ ୩ (ସେପ୍ଟେମ୍ବର ୨୮, ୩୦ ଓ ଅକ୍ଟୋବର ୨ ତାରିଖ) ମ୍ୟାଚ୍ ଖେଳାଯିବ। ଇଂଲଣ୍ଡ ଦଳର ଲମ୍ବା ପାକିସ୍ତାନ ଗସ୍ତର ଏହା ହେବ ପ୍ରଥମ ଚରଣ। ଟ୍ବେଣ୍ଟି-୨୦ ଶୃଙ୍ଖଳା ଖେଳି ବିଶ୍ବକପ୍ ପାଇଁ ଅଷ୍ଟ୍ରେଲିଆ ଗସ୍ତ କରିବ ଇଂଲଣ୍ଡ। ପୁଣି ବିଶ୍ବକପ୍ ଖେଳିସାରି ୩ ମ୍ୟାଚ୍ ବିଶିଷ୍ଟ ଟେଷ୍ଟ୍ ଶୃଙ୍ଖଳା ଖେଳିବା ପାଇଁ ପାକିସ୍ତାନ ଫେରିବ ବୋଲି ଆୟୋଜକ ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ଡାଇରେକ୍ଟର ଅଫ୍ ଇଣ୍ଟରନ୍ୟାସ୍ନାଲ କ୍ରିକେଟ୍ ଜାକିର ଖାନ୍ କହିଛନ୍ତି। ଟେଷ୍ଟ୍ ଶୃଙ୍ଖଳା ଡିସେମ୍ବରରେ ଖେଳାଯିବ ବୋଲି ସେ କହିଛନ୍ତି।