କାବୁଲ: ଆଫଗାନିସ୍ତାନରେ ହଠାତ୍ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଏହା ଦ୍ୱାରା ଦେଶର ଉତ୍ତର ଭାଗ ଅଧିକ ପ୍ରଭାବିତ ହୋଇଛି। ଗୋଟିଏ ଦିନରେ ୨୦୦ରୁ ଅଧିକ ଲୋକ ପ୍ରାଣ ହରାଇଛନ୍ତି। ମିଳିତ ଜାତିସଂଘ ଶନିବାର ଏକ ବିବୃତ୍ତିରେ ଏହି ସୂଚନା ଦେଇଛି। ମିଳିତ ଜାତିସଂଘର ଅନ୍ତର୍ଜାତୀୟ ସଂଗଠନ ଆଇଓଏମ୍ କହିଛି ଶୁକ୍ରବାର ଦିନ ପ୍ରବଳ ବର୍ଷା ଯୋଗୁଁ ପ୍ରଳୟଙ୍କରୀ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଏହି କାରଣରୁ ବାଘଲାନ ପ୍ରଦେଶରେ ୨୦୦ରୁ ଅଧିକ ଲୋକଙ୍କର ମୃତ୍ୟୁ ଘଟିଥିଲା ଏବଂ ହଜାର ହଜାର ଘର ନଷ୍ଟ ହୋଇଯାଇଥିଲା।
କେବଳ ବାଘଲାନି ଜାଦିଦ୍ ଜିଲ୍ଲାରେ ୧,୫୦୦ ରୁ ଅଧିକ ଘର ନଷ୍ଟ ହୋଇଯାଇଥିଲା ଏବଂ ୧୦୦ରୁ ଅଧିକ ଲୋକ ପ୍ରାଣ ହରାଇଥିଲେ ବୋଲି ଆଇଓଏମ କହିଛି। କହିବାକୁ ଗଲେ ଶୁକ୍ରବାର ରାତିରେ ତାଲିବାନ ସରକାରୀ କର୍ମଚାରୀ କହିଥିଲେ ଯେ ୬୨ ଜଣଙ୍କର ମୃତ୍ୟୁ ହୋଇଛି। ଅପରପକ୍ଷରେ ଶନିବାର ଦିନ ସରକାରୀ ମୁଖପାତ୍ର ଜବିଉଲ୍ଲାହ ମୁଜାହିଦ୍ କହିଛନ୍ତି ବନ୍ୟା ଯୋଗୁଁ ଆମର ଶତାଧିକ ନାଗରିକଙ୍କର ମୃତ୍ୟୁ ହୋଇଛି। ପ୍ରତିରକ୍ଷା ମନ୍ତ୍ରଣାଳୟ ଅନୁଯାୟୀ, ପ୍ରଭାବିତ ଅଞ୍ଚଳରେ ଜରୁରୀକାଳୀନ ଅଧିକାରୀ ନିୟୋଜିତ ହୋଇଛନ୍ତି। ଉଦ୍ଧାର କାର୍ଯ୍ୟ ମଧ୍ୟ ଚାଲିଛି।
ଅଧିକାରୀଙ୍କ କହିବାନୁସାରେ, ଶୁକ୍ରବାରର ବର୍ଷା ଉତ୍ତର-ପୂର୍ବ ବଦଖଶାନ ପ୍ରଦେଶ, କେନ୍ଦ୍ରୀୟ ଘୋର ପ୍ରଦେଶ ଏବଂ ପଶ୍ଚିମ ହେରାଟ ପ୍ରଦେଶରେ ମଧ୍ୟ ବ୍ୟାପକ ଧ୍ୱଂସ ଘଟାଇଛି। ଆଫଗାନିସ୍ତାନରେ ଅପେକ୍ଷାକୃତ ଶୁଷ୍କ ଶୀତ ଋତୁ ରହିଛି । ଏହି କାରଣରୁ, ଏଠାରେ ଥିବା ଜମି ପାଇଁ ବର୍ଷା ଜଳ ଶୋଷିବା ଅତ୍ୟନ୍ତ କଷ୍ଟକର ହୋଇଯାଏ। ଏହି କାରଣରୁ ଜଳବାୟୁ ପରିବର୍ତ୍ତନକୁ ନେଇ ଏହି ଦେଶ ମଧ୍ୟ ଅତ୍ୟନ୍ତ ସମ୍ବେଦନଶୀଳ ଏବଂ ଦୁର୍ବଳ ଅଟେ। ଚାରି ଦଶନ୍ଧିରୁ ଅଧିକ ସମୟ ଧରି ବିବାଦ ଏବଂ ଯୁଦ୍ଧର ସମ୍ମୁଖୀନ ହୋଇଥିବା ଆଫଗାନିସ୍ତାନ ଏବେ ଦୁନିଆର ସବୁଠାରୁ ଗରିବ ଦେଶ ପାଲଟିଛି।