ନୂଆଦିଲ୍ଲୀ: ଅଶୋକ ଗେହଲୋଟ୍ କଂଗ୍ରେସ ସଭାପତି ହେବେ କି ନାହିଁ ତାହା ଉପରେ ସସପେନ୍ସ ଜାରି ରହିଛି। ସଚିନ ପାଇଲଟ ରାଜସ୍ଥାନରେ ମୁଖ୍ୟମନ୍ତ୍ରୀ ହେବେ କି ନାହିଁ ତାହା ମଧ୍ୟ ସ୍ପଷ୍ଟ ହୋଇନାହିଁ। କିନ୍ତୁ ଏହା ଊଣାଅଧିକେ ସ୍ପଷ୍ଟ ହୋଇସାରିଛି ଯେ ରାଜସ୍ଥାନକୁ ନୂଆ ମୁଖ୍ୟମନ୍ତ୍ରୀ ମିଳିବ। କଂଗ୍ରେସ ହାଇକମାଣ୍ଡଙ୍କ ବିଶ୍ବସ୍ତ ତଥା ସଂଗଠନର ସାଧାରଣ ସମ୍ପାଦକ କେସି ବେଣୁଗୋପାଲ କହିଛନ୍ତି ଯେ ରାଜସ୍ଥାନ ଖୁବ୍ ଶୀଘ୍ର ଏକ ନୂଆ ମୁଖ୍ୟମନ୍ତ୍ରୀ ପାଇବାକୁ ଯାଉଛି। ଦିନେ ଦୁଇ ଦିନ ମଧ୍ୟରେ ସବୁକିଛି ସ୍ପଷ୍ଟ ହୋଇଯିବ ବୋଲି ସେ କହିଛନ୍ତି। ଏହି ସମୟରେ ମୁଖ୍ୟମନ୍ତ୍ରୀ ଅଶୋକ ଗେହଲୋଟ୍ ମଧ୍ୟ ଦିଲ୍ଲୀରେ ପହଞ୍ଚିଛନ୍ତି । ଆଜି ସେ ସଭାପତି ସୋନିଆ ଗାନ୍ଧୀଙ୍କୁ ଭେଟିବେ ।
କେରଳର ମାଲାପୁରାମର ବେଣୁଗୋପାଳ କହିଛନ୍ତି ଯେ ଖୁବ ଶୀଘ୍ର ରାଜସ୍ଥାନ ଜଣେ ନୂଆ ମୁଖ୍ୟମନ୍ତ୍ରୀ ପାଇବ। ରାଜସ୍ଥାନରେ କୌଣସି ଡ୍ରାମା ନାହିଁ। ଗୋଟିଏ କିମ୍ବା ଦୁଇ ଦିନ ମଧ୍ୟରେ ସବୁକିଛି ସ୍ପଷ୍ଟ ହୋଇଯିବ ଏବଂ ଆପଣ ଜାଣିବେ କିଏ ନୂଆ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି। ”ସେ କହିଛନ୍ତି ଯେ କଂଗ୍ରେସ ସଭାପତି ନିର୍ବାଚନ ନାଟକୀୟ ଢଙ୍ଗରେ ଆଗକୁ ବଢ଼ୁଛି।
ସଚିନ ପାଇଲଟ ଦୁଇ ଦିନ ଧରି ଦିଲ୍ଲୀରେ ଡେରା ପକେଇ ଥିବାବେଳେ ମୁଖ୍ୟମନ୍ତ୍ରୀ ଅଶୋକ ଗେହଲୋଟ୍ ମଧ୍ୟ ବୁଧବାର ରାତିରେ ଜାତୀୟ ରାଜଧାନୀରେ ପହଞ୍ଚିଛନ୍ତି। ଗେହଲୋଟ୍ ଆଜି ସୋନିଆ ଗାନ୍ଧୀଙ୍କୁ ଭେଟିବାର କାର୍ଯ୍ୟକ୍ରମ ରହିଛି। କଂଗ୍ରେସ ସଭାପତି ନିର୍ବାଚନ ଲଢ଼ିବା ପାଇଁ ଗେହଲୋଟ୍ ପୁଣି ଥରେ ରେସରେ ସାମିଲ ହୋଇପାରନ୍ତି ବୋଲି ଆଲୋଚନା ହେଉଛି। ସେ ସଭାପତି ନିର୍ବାଚନରେ ଜିତିବା ପରେ ରାଜସ୍ଥାନ ମୁଖ୍ୟମନ୍ତ୍ରୀ ପଦ ଛାଡିବାକୁ ଚାହୁଁଥିଲେ । କିନ୍ତୁ ରବିବାର ଦଳ ଯେପରି ଦୁଇ ପର୍ଯ୍ୟବେକ୍ଷକଙ୍କୁ ପଠାଇ ବିଧାୟକ ଦଳର ବୈଠକ ଡାକିବାକୁ ଏବଂ ହାଇ କମାଣ୍ଡକୁ ସବୁ ନିଷ୍ପତ୍ତି ନେବାକୁ ଅଧିକାର ଦେବାପାଇଁ ସଂକଳ୍ପ ପାରିତ କରିଥିଲା, ସେଥିରୁ ସଙ୍କେତ ମିଳିଛି ଯେ ଯଦି ସେ ସଭାପତି ପଦ ପାଇଁ ପ୍ରତିଦ୍ବନ୍ଦ୍ବିତା କରିବେ, ତେବେ ନାମାଙ୍କନ ଦାଖଲ ପୂର୍ବରୁ ଗେହଲଟଙ୍କୁ ଇସ୍ତଫା ଦେବାକୁ କୁହାଯାଇପାରେ ।