ନୂଆଦିଲ୍ଲୀ : ସଦ୍ୟ ସମାପ୍ତ ପୁରୁଷ ହକି ବିଶ୍ୱକପ୍ରେ ନୈରାଶ୍ୟଜନକ ପ୍ରଦର୍ଶନ ପରେ ଭାରତୀୟ ପୁରୁଷ ହକି ଦଳର ମୁଖ୍ୟ କୋଚ୍ ଗ୍ରାହାମ୍ ରିଡ୍ ଏବଂ ଅନ୍ୟ ଦୁଇଜଣ ସପୋର୍ଟ ଷ୍ଟାଫ୍ ନିଜ ପଦରୁ ଇସ୍ତଫା ଦେଇଛନ୍ତି। ହକି ଇଣ୍ଡିଆ ସେମାନଙ୍କ ଇସ୍ତଫା ଗ୍ରହଣ କରିଛି ।
ରିଡଙ୍କ ତତ୍ତ୍ଵାବଧାନରେ ଟୋକିଓ ଅଲିମ୍ପିକ୍ସରେ ଐତିହାସିକ ବ୍ରୋଞ୍ଜ ପଦକ ଜିତିଥିବା ଭାରତୀୟ ଦଳ ଓଡିଶାରେ ଅନୁଷ୍ଠିତ ହକି ବିଶ୍ୱକପ୍ର କ୍ୱାର୍ଟର ଫାଇନାଲ ଦୌଡ଼ରୁ ବାଦ୍ ପଡିଥିଲା । ଦଳ ନବମ ସ୍ଥାନରେ ରହିଥିଲା । ରିଡଙ୍କ ବ୍ୟତୀତ ବିଶ୍ଳେଷଣ କୋଚ୍ ଗ୍ରେଗ କ୍ଲାର୍କ ଏବଂ ବୈଜ୍ଞାନିକ ପରାମର୍ଶଦାତା ମିଚେଲ ଡେଭିଡ୍ ପେମ୍ବରଟନ୍ ମଧ୍ୟ ଇସ୍ତଫା ଦେଇଛନ୍ତି।
ହକି ଇଣ୍ଡିଆ ତରଫରୁ ଜାରି ଏକ ବିବୃତ୍ତି ଅନୁଯାୟୀ, ବିଶ୍ୱକପ ଶେଷ ହେବାର ଦିନକ ପରେ ରିଡ୍ ହକି ଇଣ୍ଡିଆର ସଭାପତି ଦିଲୀପ ତିର୍କିଙ୍କ ନିକଟକୁ ନିଜ ଇସ୍ତଫା ପତ୍ର ପଠାଇଛନ୍ତି । ତିର୍କି ଏବଂ ହକି ଇଣ୍ଡିଆର ସାଧାରଣ ସମ୍ପାଦକ ଭୋଲାନାଥ ସିଂହ ଦଳର ପ୍ରଦର୍ଶନ ବିଷୟରେ ଆଲୋଚନା କରିବା ପାଇଁ ରିଡ୍ ଏବଂ ଅନ୍ୟ ସହାୟକ କର୍ମଚାରୀଙ୍କୁ ଭେଟିଥିଲେ। ରିଡଙ୍କ ବ୍ୟତୀତ କ୍ଲାର୍କ ଏବଂ ଡେଭିଡ ମଧ୍ୟ ସୋମବାର ସକାଳେ ଇସ୍ତଫା ଦେଇଛନ୍ତି। ଏହି ତିନିଜଣ ଆଗାମୀ ମାସ ଯାଏ ନୋଟିସ୍ ପିରିୟଡରେ ରହିବେ ।
ରିଡ୍ କହିଛନ୍ତି, ମୋର ସମୟ ଶେଷ ହୋଇଛି ଏବଂ ନୂଆ ମ୍ୟାନେଜମେଣ୍ଟକୁ ଦାୟିତ୍ବ ହସ୍ତାନ୍ତର କରିବାର ସମୟ ଆସିଛି। ଏହି ଦଳ ଏବଂ ହକି ଇଣ୍ଡିଆ ସହିତ କାମ କରିବା ଅନୁଭତି ବେଶ୍ ସୁଖଦ ଥିଲା | ମୁଁ ଏହି ଅଦ୍ଭୁତ ଯାତ୍ରାର ପ୍ରତ୍ୟେକ ମୁହୂର୍ତ୍ତକୁ ଉପଭୋଗ କରିଥିଲି | ଭବିଷ୍ୟତ ପାଇଁ ଦଳକୁ ଶୁଭେଚ୍ଛା। ”