ନୂଆଦିଲ୍ଲୀ: ବ୍ରାହ୍ମଣମାନଙ୍କ ଉପରେ ଏକ ଫେସବୁକ୍ ପୋଷ୍ଟ ପାଇଁ ବିବାଦରେ ଫସିଛନ୍ତି ଲୋକପ୍ରିୟ ଗାୟକ ଲକି ଅଲି । ସେ ତାଙ୍କର ଏକ ଫେସବୁକ୍ ପୋଷ୍ଟରେ ‘ବ୍ରାହ୍ମଣ’ ଶବ୍ଦ ‘ଇବ୍ରାହିମ’ରୁ ଆସିଛି ବୋଲି ଦାବି କରିଥିଲେ । ତାଙ୍କର ଏହି ପୋଷ୍ଟକୁ ନେଇ ବିବାଦ ଉଠିବା ପରେ ଲକି ଅଲି କ୍ଷମା ମାଗିଛନ୍ତି। ସେ ତାଙ୍କର ସେହି ପୋଷ୍ଟକୁ ମଧ୍ୟ ହଟାଇ ଦେଇଛନ୍ତି ।
ଲକି ଅଲି ଏକ ନୂଆ ଫେସବୁକ ପୋଷ୍ଟରେ ତାଙ୍କ ବୟାନ ପାଇଁ କ୍ଷମା ମାଗିଛନ୍ତି। ସେ ଲେଖିଛନ୍ତି, “ମୋର ଗତ ପୋଷ୍ଟ ଯୋଗୁଁ ହୋଇଥିବା ବିବାଦ ବିଷୟରେ ମୁଁ ଅବଗତ ଅଛି। କୌଣସି ବିବାଦ ସୃଷ୍ଟି କରିବା କିମ୍ବା କାହାକୁ ରଗାଇବା ମୋର ଉଦ୍ଦେଶ୍ୟ ନୁହେଁ | ମୁଁ ଏଥିପାଇଁ ଅନୁତପ୍ତ । ମୋର ଉଦ୍ଦେଶ୍ୟ ଥିଲା ସମସ୍ତଙ୍କୁ ଏକାଠି କରିବା, କିନ୍ତୁ ମୁଁ ଅନୁଭବ କଲି ଯେ ମୁଁ ଯାହା ଚାହୁଁଥିଲି ତାହା ହେଲା ନାହିଁ | ଏଣିକି ମୁଁ ଯାହା ବି ପୋଷ୍ଟ କରିବି, ମୁଁ ମୋର ଶବ୍ଦ ପ୍ରତି ଯତ୍ନବାନ ହେବି । ଯେହେତୁ ଏହି କାରଣରୁ ଅନେକ ହିନ୍ଦୁ ଭାଇ ଓ ଭଉଣୀଙ୍କୁ ସମସ୍ୟା ହୋଇଥିଲା | ମୁଁ ସମସ୍ତଙ୍କୁ କ୍ଷମା ମାଗୁଛି | ମୁଁ ତୁମ ସମସ୍ତଙ୍କୁ ଭଲ ପାଏ।”
ଲକି ଅଲି ୯ ଏପ୍ରିଲ ୨୦୨୩ରେ ଫେସବୁକରେ ଏକ ପୋଷ୍ଟ ସେୟାର କରିଥିଲେ। ଏଥିରେ ସେ ଲେଖିଥିଲେ, ‘ବ୍ରାହ୍ମଣ’ ଶବ୍ଦ ‘ବ୍ରହ୍ମା’ ରୁ ଆସିଛି ଯାହାର ଉତ୍ପତ୍ତି ‘ଅବ୍ରାମ’ରୁ ହୋଇଛି ଏବଂ ‘ଅବ୍ରାମ’ ଶବ୍ଦ ‘ଆବ୍ରାହମ’ ବା ‘ଇବ୍ରାହିମ’ରୁ ଆସିଛି। ତେଣୁ ବ୍ରାହ୍ମଣମାନେ ଇବ୍ରାହିମଙ୍କ ବଂଶଧର। … ସବୁ ଦେଶର ପିତା ଏକ… ତେବେ କାହିଁକି ସମସ୍ତେ ବିନା ବ୍ୟାଖ୍ୟା କରି ପରସ୍ପର ସହ ଯୁକ୍ତିତର୍କ ଓ ଲଢ଼େଇ କରୁଛନ୍ତି?”
ଲକି ଅଲିଙ୍କ ଏହି ପୋଷ୍ଟକୁ ନେଇ ବିବାଦ ଦେଖା ଦେଇଥିଲା। ଲୋକେ ବିଶେଷକରି ହିନ୍ଦୁମାନେ ତାଙ୍କୁ ସମାଲୋଚନା କରିଥିଲେ ।