ନୂଆଦିଲ୍ଲୀ : ଭାରତର କୋଭିଡ୍-୧୯ ଟିକାକରଣ କାର୍ଯ୍ୟକ୍ରମରେ ଭାରତ ବାୟୋଟେକର ଇଣ୍ଟ୍ରାନାଜାଲ ଟିକା ‘ଇନକୋଭାକ୍’କୁ ସାମିଲ କରାଯାଇଛି । ଘରୋଇ ହସ୍ପିଟାଲରେ ଏହି ନାଜାଲ୍ ଟିକା ଡୋଜ୍ ପିଛା ୮୦୦ ଟଙ୍କାରେ ଉପଲବ୍ଧ ହେବ । ଏହା ଉପରେ ୫% ଜିଏସଟି ମଧ୍ୟ ଲାଗିବ । ଅନ୍ୟପଟେ ସରକାରୀ ଟିକାକରଣ କେନ୍ଦ୍ରରେ ଏହି ଟିକା ମୂଲ୍ୟ ୩୨୫ ଟଙ୍କା ଧାର୍ଯ୍ୟ କରାଯାଇଛି। ତେବେ ବର୍ତ୍ତମାନ ପାଇଁ ଏହି ଟିକା କେବଳ ଘରୋଇ କେନ୍ଦ୍ରରେ ଉପଲବ୍ଧ ହେବ। ଏସବୁ ମଧ୍ୟରେ ଦେଶର ଭାକ୍ସିନ୍ ଟାସ୍କଫୋର୍ସର ମୁଖ୍ୟ କହିଛନ୍ତି ଯେ ବୁଷ୍ଟର ଡୋଜ ନେଇଥିବା ଲୋକଙ୍କୁ ଏହି ନାଜାଲ୍ ଟିକା ଦିଆଯାଇପାରିବ ନାହିଁ।
ଦେଶର ଟିକା ଟାସ୍କ ଫୋର୍ସର ମୁଖ୍ୟ ଡକ୍ଟର ଏନ.କେ ଆରୋରା ଗଣମାଧ୍ୟମକୁ ଏକ ସାକ୍ଷାତକାରରେ କହିଛନ୍ତି, ଏହି ଇଣ୍ଟ୍ରାନାଜାଲ ଟିକା ପ୍ରଥମ ବୁଷ୍ଟର ଡୋଜ ଭାବେ ଦିଆଯିବ। ଉଦାହରଣ ସ୍ୱରୂପ, ଯଦି କୌଣସି ବ୍ୟକ୍ତି ପୂର୍ବରୁ ଏକ ବୁଷ୍ଟର୍ ଡୋଜ୍ ପାଇସାରିଛନ୍ତି, ତେବେ ତାଙ୍କୁ ଏହି ନାଜାଲ୍ ଟିକା ଦିଆଯିବ ନାହିଁ । ଏହା ସେହି ଲୋକଙ୍କ ପାଇଁ ଉଦ୍ଦିଷ୍ଟ ଯେଉଁମାନେ ଏପର୍ଯ୍ୟନ୍ତ ବୁଷ୍ଟର ଡୋଜ୍ ନେଇ ନାହାଁନ୍ତି।
ଡ. ଆରୋରା କହିଥିଲେ ଟିକା କାର୍ଯ୍ୟକ୍ରମର ଅଂଶ ଭାବେ କୋ-ଓ୍ବିନ୍ ପୋର୍ଟାଲରେ ଚତୁର୍ଥ ଡୋଜ୍ ବିକଳ୍ପ ରହିବ ନାହିଁ। ଧରାଯାଉ ଆପଣ ଚତୁର୍ଥ ଡୋଜ୍ ନେବାକୁ ଚାହୁଁଛନ୍ତି। ଯଦି କୌଣସି ବ୍ୟକ୍ତିକୁ ଏକ ନିର୍ଦ୍ଦିଷ୍ଟ ପ୍ରକାର ଆଣ୍ଟିଜେନର ବାରମ୍ବାର ଇମ୍ୟୁନିଟି ଦିଆଯାଏ, ତେବେ ଶରୀର ପ୍ରତିକ୍ରିୟାଶୀଳ ହେବା ବନ୍ଦ ହୋଇଯାଏ କିମ୍ବା ନେଗେଟିଭ୍ ରିଆକ୍ସନ ଦେଇଥାଏ । ଏହାକୁ ‘ଆଣ୍ଟିଜେନ୍ ସିଙ୍କ୍’ କୁହାଯାଏ । ଏହି କାରଣରୁ ପ୍ରାରମ୍ଭରେ ଏମଆରଏନଏ ଟିକା ୬ ମାସ ବ୍ୟବଧାନରେ ଦିଆଯାଏ । ପରେ ଲୋକେ ଏହାକୁ ତିନିମାସ ବ୍ୟବଧାନରେ ନେଉଛନ୍ତି । କିନ୍ତୁ ଏହି କ୍ଷେତ୍ରରେ ଏହା ସେଭଳି ଫଳପ୍ରଦ ହୋଇନାହିଁ । ତେଣୁ ଚତୁର୍ଥ ଡୋଜ୍ ଟିକା ନେବାରେ କୌଣସି ଯଥାର୍ଥତା ନାହିଁ ବୋଲି ସେ କହିଛନ୍ତି ।