ନୂଆଦିଲ୍ଲୀ: ଲୋକସଭାରୁ ବହିଷ୍କୃତ ସାଂସଦ ତଥା ଟିଏମସି ନେତ୍ରୀ ମହୁଆ ମୈତ୍ରଙ୍କୁ ସରକାରୀ ବଙ୍ଗଳା ତୁରନ୍ତ ଖାଲି କରିବାକୁ କୁହାଯାଇଛି। ଏ ସମ୍ପର୍କରେ ଇଷ୍ଟେଟ୍ ନିର୍ଦ୍ଦେଶାଳୟ ମହୁଆଙ୍କୁ ନିର୍ଦ୍ଦେଶ ଜାରି କରିଛି। ବଙ୍ଗଳା ଖାଲି କରିବାକୁ ମହୁଆଙ୍କୁ ଏକ ମାସ ସମୟ ଦିଆଯାଇଥିଲା । କୋର୍ଟକୁ ଯିବାକୁ ମଧ୍ୟ ତାଙ୍କୁ ସୁଯୋଗ ମିଳିଥିଲା । କିନ୍ତୁ ତାଙ୍କୁ କୋର୍ଟରୁ କୌଣସି ଆଶ୍ବସ୍ତି ମିଳିନଥିଲା। ଯଦି ଏବେ ସେ ସରକାରୀ ବଙ୍ଗଳା ଖାଲି ନ କରନ୍ତି, ତେବେ ଏହାକୁ ବଳପୂର୍ବକ ଖାଲି କରାଯିବ।
ସରକାରୀ ବଙ୍ଗଳା ଆବଣ୍ଟନ ରଦ୍ଦ ହେବା ପରେ ମହୁଆଙ୍କୁ ଜାନୁଆରୀ ୭ ସୁଦ୍ଧା ଘର ଖାଲି କରିବାକୁ କୁହାଯାଇଥିଲା। କିନ୍ତୁ ସେ ବଙ୍ଗଳା ଖାଲି ନ କରିବାରୁ ଇଷ୍ଟେଟ୍ ନିର୍ଦ୍ଦେଶାଳୟ ଜାନୁୟାରୀ ୮ରେ ମହୁଆଙ୍କୁ କାରଣ ଦର୍ଶାଅ ନୋଟିସ୍ ଜାରି କରି ତିନି ଦିନ ମଧ୍ୟରେ ଉତ୍ତର ତଲବ କରିଥିଲେ । ମାହୁଆଙ୍କ ଠାରୁ କୌଣସି ଉତ୍ତର ନ ମିଳିବା ପରେ ଜାନୁଆରୀ ୧୨ରେ ଟିଏମସି ନେତ୍ରୀଙ୍କ ଏକ ତୃତୀୟ ନୋଟିସ୍ ମଧ୍ୟ ଜାରି କରାଯାଇଥିଲା | ଏହି ବଙ୍ଗଳାକୁ ସାଂସଦ ଭାବରେ ମାହୁଆଙ୍କୁ ଆବଣ୍ଟିତ କରାଯାଇଥିଲା। ତେବେ ପ୍ରଶ୍ନ ପାଇଁ ଟଙ୍କା ମାମଲାରେ ୮ ଡିସେମ୍ବର ୨୦୨୩ରେ ମହୁଆଙ୍କ ସାଂସଦ ପଦ ଯିବା ପରେ ତାଙ୍କୁ ଆବଣ୍ଟିତ ସରକାରୀ ବଙ୍ଗଳା ମଧ୍ୟ ରଦ୍ଦ କରାଯାଇଥିଲା।