ମୁମ୍ବାଇ : ଦିନିକିଆ ବିଶ୍ୱକପ୍ ୨୦୨୩ କୁ ଆଉ କିଛି ମାସର ଅପେକ୍ଷା । ଏଥିପାଇଁ ପ୍ରସ୍ତୁତି ଜୋରଦାର ଚାଲିଛି । ଉଭୟ ବିସିସିଆଇ ଏବଂ ଆଇସିସି ପ୍ରସ୍ତୁତି ଚଳାଇଛନ୍ତି । ଏହିକ୍ରମରେ ୨୦୨୩ କ୍ରିକେଟ୍ ମହାକୁମ୍ଭ ଆସିଛି ନୂଆ ଅପ୍ଡେଟ୍ ।
ଅକ୍ଟୋବର ମାସରେ ଭାରତରେ ହିଁ ଖେଳାଯିବ ଆଗାମୀ ଦିନିକିଆ ବିଶ୍ୱକପ୍ । ଏହି ବିଶ୍ୱକପ୍ ପୂର୍ବରୁ ଆୟୋଜକ ବିସିସିଆଇ ଏବଂ ଆଇସିସି ମୁମ୍ବାଇରେ କାର୍ଯ୍ୟକ୍ରମର ଆୟୋଜନ କରିବାକୁ ଯାଉଛନ୍ତି । ଯେଉଁଥିରେ ୨୦୨୩ ବିଶ୍ୱକପ୍ର ଖେଳସୂଚୀ ଘୋଷଣା କରାଯିବ । ମୁମ୍ବାଇ ଓ୍ୱାଙ୍ଖେଡେ ଷ୍ଟାଡିୟମ୍ରେ ଏହି କାର୍ଯ୍ୟକ୍ରମର ଆୟୋଜନା ହେବାର ସୂଚନା ମିଳିଛି । ହେଲେ ଏବେ ଯାଏଁ ଆଇସିସି ଏବଂ ବିସିସିଆଇ ପକ୍ଷରୁ କୌଣସି ଅଧିକାରୀକ ବୟାନ ଆସିନାହିଁ ।ସେହିପରି ପୂର୍ବରୁ ବିସିସିଆଇ ଆଇସିସିକୁ ଏକ ସୂଚୀ ପଠାଇଛି । ଯେଉଁଥିରେ ଦେଶର ୯ଟି ଯାକ ଭେନ୍ୟୁରେ ଲିଗ୍ ମ୍ୟାଚ୍ ଖେଳାଯିବ । ମୁମ୍ବାଇ, ଚେନ୍ନାଇ, ଅହମ୍ମଦାବାଦ, ବେଙ୍ଗାଲୁରୁ, କୋଲକାତା , ଧର୍ମଶାଳା, ଲକ୍ଷ୍ନୌ, ପୁନେ ଆଦି ସ୍ଥାନରେ ମ୍ୟାଚ୍ ଖେଳାଯିବ ନେଇ ଆୟୋଜକ ଦେଶ ସ୍ଥିର କରିଛି । ବିଶ୍ୱକପରେ ଖେଳିବାକୁ ଥିବା ସମସ୍ତ ଦେଶଙ୍କ ଆଲୋଚନା ପରେ ଆଇସିସି ଏଥିରେ ମୋହର ମାରିବ । ହୁଏତ ମୁମ୍ବାଇରେ ହେବାକୁ ଥିବା କାର୍ଯ୍ୟକ୍ରମରେ ଏହି କ୍ରୀଡାସୂଚୀର ଘୋଷଣା ହୋଇପାରେ ।
ସୂଚନା ଯେ, ଭାରତରେ ହିଁ ଖେଳାଯିବ ଦିନିକିଆ ବିଶ୍ୱକପ୍ ୨୦୨୩ । ଅକ୍ଟୋବର ୫ରୁ ବିଶ୍ୱକପ୍ ଆରମ୍ଭ ହେବାକୁ ଥିବା ବେଳେ ୧୯ ନଭେମ୍ବରରେ ଫାଇନାଲ ମ୍ୟାଚ୍ ଖେଳାଯିବ । ଏହି ଟୁର୍ଣ୍ଣାମେଣ୍ଟରେ ମୋଟ ୧୦ଟି ଟିମ୍ ଭାଗ ନେବେ । ବିଶ୍ୱକପ୍ ୨୦୨୩ରେ ମୋଟ ୪୮ଟି ମ୍ୟାଚ୍ ଖେଳାଯିବ।