ଲାହୋର: ବିଶ୍ୱକପ ମଝିରେ ପାକିସ୍ତାନ କ୍ରିକେଟ୍ ବୋର୍ଡ (ପିସିବି)ର ମୁଖ୍ୟ ଚୟନକର୍ତ୍ତା ଇଞ୍ଜାମାମ୍-ଉଲ-ହକ୍ ସୋମବାର ତାଙ୍କ ପଦରୁ ଇସ୍ତଫା ଦେଇଛନ୍ତି।
ପିସିବି ସୂତ୍ରରୁ ପ୍ରକାଶ ଯେ ଇଞ୍ଜାମାମ୍-ଉଲ-ହକଙ୍କ ବିରୋଧରେ ‘ସ୍ୱାର୍ଥ ଜନିତ ଦ୍ୱନ୍ଦ୍ୱ’ ଅଭିଯୋଗ ଆସିଥିଲା । ଏହି କାରଣରୁ ସେ ଇସ୍ତଫା ଦେଇଥିବା କୁହାଯାଇଛି ।
ଇଞ୍ଜାମାମ୍-ଉଲ-ହକ୍ ପାକିସ୍ତାନୀ ନ୍ୟୁଜ ଚ୍ୟାନେଲ ସମା ଟିଭିକୁ କହିଛନ୍ତି, “ମୋ ବିରୋଧରେ ଆସିଥିବା ଅଭିଯୋଗ ସମ୍ପର୍କରେ ମୁଁ ବୋର୍ଡ ସହିତ କଥାବାର୍ତ୍ତା କରିଥିଲି। ସେମାନେ ପାକିସ୍ତାନୀ ଦଳ ଚୟନ ସମ୍ପର୍କରେ ଅନୁସନ୍ଧାନ ପାଇଁ ଏକ ପାଞ୍ଚ ଣିଆ କମିଟି ଗଠନ କରିଛନ୍ତି। ମୋ ବିରୋଧରେ ତଦନ୍ତ ଚାଲିଥିବାରୁ ମୁଁ ଏହି ପଦରୁ ଇସ୍ତଫା ଦେବା ଉଚିତ୍ ବୋଲି ଠିକ୍ ମନେ କଲି। ”
ସେ କହିଛନ୍ତି ଯେ ଯଦି ମୋ ଉପରେ କୌଣସି ପ୍ରଶ୍ନ ଉଠେ, ମୁଁ ସବୁର ଉତ୍ତର ଦେବାକୁ ପ୍ରସ୍ତୁତ ଅଛି। ମୁଁ ମଧ୍ୟ ଏହି ପ୍ରସଙ୍ଗରେ ପିସିବି ସହ ଆଲୋଚନା ପାଇଁ ପ୍ରସ୍ତୁତ |
ଦଳ ଚୟନ ପ୍ରକ୍ରିୟାରେ ଉପୁଜୁଥିବା ପ୍ରଶ୍ନର ତଦନ୍ତ ପାଇଁ ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ଏକ ପାଞ୍ଚ ଜଣିଆ ଫ୍ୟାକ୍ଟ ଫାଇଣ୍ଡିଂ ଟିମ୍ ଗଠନ କରିଛି। ଏହି କମିଟି ଯଥାଶୀଘ୍ର ପିସିବି ମ୍ୟାନେଜମେଣ୍ଟକୁ ଏହାର ରିପୋର୍ଟ ଦାଖଲ କରିବ |
ଖେଳାଳିଙ୍କ ସହ ଜଡ଼ିତ ଏକ ମ୍ୟାନେଜମେଣ୍ଟ କମ୍ପାନୀରେ ଇଞ୍ଜାମାମ୍-ଉଲ-ହକଙ୍କ ଅଂଶଧନ ରହିଥିବା ଅଭିଯୋଗ ହୋଇଛି । ଏବଂ ଏହି କମ୍ପାନୀ ସହିତ ପିସିବିର ଚୁକ୍ତି ବି ଅଛି | ଏକ ମିଡ଼ିଆ ରିପୋର୍ଟରେ ଦାବି ହୋଇଛି ଯେ ମହମ୍ମଦ ରିଜୱାନ୍ ଏବଂ ବାବର ଆଜମଙ୍କ ଭଳି ପାକିସ୍ତାନ କ୍ରିକେଟ୍ ଦଳର କିଛି ପ୍ରମୁଖ ଖେଳାଳି ଏହି କମ୍ପାନୀ ସହ ଜଡିତ ଅଛନ୍ତି ।