ନୂଆଦିଲ୍ଲୀ: ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (ଆରବିଆଇ) କ୍ରମାଗତ ଚତୁର୍ଥ ଥର ପାଇଁ ରେପୋ ରେଟ୍ ବୃଦ୍ଧି କରିଛି। ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ରେପୋ ରେଟରେ ୫୦ ବେସିସ୍ ପଏଣ୍ଟ ବୃଦ୍ଧି ଘୋଷଣା କରିଛନ୍ତି, ଯାହା ତୁରନ୍ତ ଲାଗୁ ହେବ । ଏହା ସହିତ ରେପୋ ରେଟ୍ ୫.୯୦ ପ୍ରତିଶତକୁ ବୃଦ୍ଧି ପାଇଛି, ଯାହା ତିନି ବର୍ଷ ମଧ୍ୟରେ ସର୍ବାଧିକ।
ଆରବିଆଇ ଯେଉଁ ସୁଧ ହାରରେ ବ୍ୟାଙ୍କଗୁଡ଼ିକୁ ଲୋନ୍ ଦେଇଥାଏ ତାହାକୁ ରେପୋ ରେଟ୍ କୁହାଯାଏ । ରେପୋ ରେଟ୍ ବୃଦ୍ଧି ସହିତ ହୋମ୍ ଲୋନ୍, ପର୍ସନାଲ ଲୋନ୍ ମହଙ୍ଗା ହେବ | ଆରବିଆଇ ଗଭର୍ଣ୍ଣର କହିଛନ୍ତି ଯେ ପ୍ରଥମ ତ୍ରୈମାସରେ ଜିଡିପି ଅଭିବୃଦ୍ଧି ଆଶା ପୂରଣ ହୋଇନାହିଁ। ଯଦିଓ ୧୩.୫% ହାର ବିଶ୍ବର ଅନେକ ବଡ ଅର୍ଥନୀତି ଅପେକ୍ଷା ଭଲ ଥିଲା |
କ୍ରମାଗତ ବଢୁଥିବା ଭୌଗୋଳିକ ରାଜନୈତିକ ତିକ୍ତତା ଏବଂ ଦୁର୍ବଳ ବିଶ୍ବ ଅର୍ଥନୀତି କାରଣରୁ ଆଜି ମୁଦ୍ରାସ୍ଫୀତି ପ୍ରାୟ ୭% ରହିଛି । ଆମେ ଆଶା କରୁଛୁ ଯେ ଚଳିତ ବର୍ଷ ଦ୍ୱିତୀୟାର୍ଦ୍ଧରେ ଏହା ପ୍ରାୟ ୬% କୁ ଖସି ଆସିବ ବୋଲି ଶକ୍ତିକାନ୍ତ ଦାସ କହିଛନ୍ତି ।
ଆରବିଆଇ ଗଭର୍ଣ୍ଣର କହିଛନ୍ତି ଯେ ଦ୍ୱିତୀୟ ତ୍ରୈମାସିକ ପାଇଁ ଏହି ଆକଳନରୁ ସଙ୍କେତ ମିଳୁଛି ଯେ ଅର୍ଥନୈତିକ ଗତିବିଧି ଅପେକ୍ଷାକୃତ ଭଲ ରହିବ। ଘରୋଇ କ୍ଷେତ୍ରରେ କାରବାର ବୃଦ୍ଧି ପାଉଛି ଏବଂ ଗ୍ରାମାଞ୍ଚଳରେ ଚାହିଦା ଧୀରେ ଧୀରେ ବଢୁଛି । ପୁଞ୍ଜି ବିନିଯୋଗର ଚାହିଦା ମଧ୍ୟ ବୃଦ୍ଧି ପାଉଛି ଏବଂ କୃଷି କ୍ଷେତ୍ର ମଜବୁତ ରହିଛି |