ନୂଆଦିଲ୍ଲୀ : ରେପୋ ରେଟ ଅପରିବର୍ତ୍ତିତ ରଖିଛି ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ)। ଚଳିତ ମୁଦ୍ରା ନୀତି କମିଟି (ଏମପିସି) ବୈଠକରେ ଏହି ନିଷ୍ପତ୍ତି ହୋଇଛି। ଫଳରେ ରେପୋରେଟ୍ ପୂର୍ବପରି ୬.୫ ପ୍ରତିଶତ ରହିବ। ରେପୋରେଟ୍ ସହିତ ବ୍ୟାଙ୍କ ଇଏମଆଇର ସମ୍ପର୍କ ରହିଥିବାରୁ ବିଭିନ୍ନ ଋଣ ଉପରେ ସୁଧ ହାର ମଧ୍ୟ ପୂର୍ବପରି ଅପରିବର୍ତ୍ତିତ ରହିବ। ଯାହା ଦ୍ୱାରା ମାସିକ କିସ୍ତିରେ କୌଣସି ହ୍ରାସ ହେବ ନାହିଁ।
ସେହିପରି ୨୦୨୫ ଆର୍ଥିକ ବର୍ଷରେ ଦେଶର ଜିଡିପି ଅଭିବୃଦ୍ଧି ୭.୨ ପ୍ରତିଶତ ରହିବ ବୋଲି ଅନୁମାନ କରାଯାଇଛି। ଯାହା ଗତ ଆର୍ଥିକ ବର୍ଷ ତୁଳନାରେ ଅଧିକ। ଗତ ଆର୍ଥିକ ବର୍ଷରେ ଏହା ୭ ପ୍ରତିଶତ ରହିଥିଲା। ଏହା ବ୍ୟତୀତ ମୁଦ୍ରାସ୍ଫୀତି ହାର ୪ ପ୍ରତିଶତକୁ ଫେରାଇ ଆଣିବା ଲାଗି ଆରବିଆଇ ପ୍ରତିଶ୍ରୁତିବଦ୍ଧ ବୋଲି ଶକ୍ତିକାନ୍ତ ଦାସ କହିଛନ୍ତି।
ନିର୍ବାଚନ ଶେଷ ହେବା ପରେ ପ୍ରଥମ ଥର ପାଇଁ ଭାରତୀୟ ରିଜର୍ଭ ବ୍ୟାଙ୍କ(ଆରବିଆଇ)ର ମୁଦ୍ରା ନୀତି କମିଟି (ଏମପିସି) ବୈଠକ ଅନୁଷ୍ଠିତ ହୋଇଯାଇଛି। ଜୁନ ୫ରୁ ୭ ତାରିଖ ପର୍ଯ୍ୟନ୍ତ ଆରବିଆଇ ଗଭର୍ନର ଶକ୍ତିକାନ୍ତ ଦାସଙ୍କ ନେତୃତ୍ୱରେ ଏହି ବୈଠକ ଚାଲିଥିଲା। ନିର୍ବାଚନ ପରେ ରେପୋରେଟ୍ କମିପାରେ ବୋଲି ଅନୁମାନ କରାଯାଉଥିଲା। କିନ୍ତୁ ତାହାକୁ ୬.୫ ପ୍ରତିଶତରେ ସ୍ଥିର ରଖାଯାଇଛି। ୨୦୨୩ ଫେବୃୟାରୀରେ ଆରବିଆଇ ପକ୍ଷରୁ ରେପୋରେଟ୍ ୨୫୦ ବେସିସ ପଏଣ୍ଟ ବୃଦ୍ଧି କରାଯାଇ ୬.୫ ପ୍ରତିଶତ ଧାର୍ଯ୍ୟ ହୋଇଥିଲା। ସେବେଠାରୁ ତାହା ଅପରିବର୍ତ୍ତିତ ରହିଛି।