ମୁମ୍ବାଇ : ରୋଡ ସେଫଟି ଓ୍ୱାର୍ଲଡ ସିରିଜ ଜରିଆରେ ପୁଣି ଥରେ ମୈଦାନକୁ ଓହ୍ଲାଇବେ ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର । ଗତ ବର୍ଷ ଏହି ଟୁର୍ଣ୍ଣାମେଣ୍ଟ ବେଶ ହିଟ୍ ହୋଇଥିଲା ଏବଂ ବହୁ ସଂଖ୍ୟକ ଲୋକ ସେମାନଙ୍କ ପ୍ରିୟ କ୍ରିକେଟର ଖେଳ ଦେଖିବା ପାଇଁ ଷ୍ଟାଡିୟମକୁ ଆସିଥିଲେ। ଗତଥର ଏହି ଟୁର୍ଣ୍ଣାମେଣ୍ଟ ରାୟପୁରରେ ଖେଳାଯାଇଥିଲା। ବର୍ତ୍ତମାନ ଏହାର ଦ୍ୱିତୀୟ ସଂସ୍କରଣ ମଧ୍ୟ ଘୋଷଣା କରାଯାଇଛି। ଆୟୋଜକମାନେ ଏହି ଟୁର୍ଣ୍ଣାମେଣ୍ଟର ତାରିଖ ଘୋଷଣା କରିଥିଲେ। ଚଳିତବର୍ଷ ଟୁର୍ଣ୍ଣାମେଣ୍ଟ ସେପ୍ଟେମ୍ବର ୧୦ରୁ ଆରମ୍ଭ ହୋଇ ୨୨ଦିନ ପର୍ଯ୍ୟନ୍ତ ଚାଲିବ ବୋଲି ଆୟୋଜକଙ୍କ ପକ୍ଷରୁ ସୂଚନା ଦିଆଯାଇଛି।
କାନପୁରରେ ଖେଳାଯିବ ଉଦଘାଟନୀ ମ୍ୟାଚ। କାନପୁର ବ୍ୟତୀତ ଦେଶ ଅନ୍ୟ ଦୁଇଟି ସ୍ଥାନରେ ମଧ୍ୟ ଟୁର୍ଣ୍ଣାମେଣ୍ଟର ମ୍ୟାଚ ଗୁଡ଼ିକ ଖେଳାଯିବ। ଦୁଇଟି ସେମିଫାଇନାଲ ଓ ଫାଇନାଲ ରାୟପୁରରେ ଖେଳାଯିବ। ଆୟୋଜକଙ୍କ ତରଫରୁ କୁହାଯାଇଛି କି ଟୁର୍ଣ୍ଣାମେଣ୍ଟ ଇନ୍ଦୋର ଓ ଡେରାଡୁନରେ ମ୍ୟାଚ ଗୁଡ଼ିକ ଖେଳାଯିବ। ଚଳିତ ବର୍ଷ ଏହି ଟୁର୍ଣ୍ଣାମେଣ୍ଟରେ ୮ଟି ଦଳ ଅଂଶ ଗ୍ରହଣ କରୁଛନ୍ତି। ଏଥିରେ ଭାରତ ବ୍ୟତୀତ ନ୍ୟୁଜିଲାଣ୍ଡ, ଓ୍ୱେଷ୍ଟଇଣ୍ଡିଜ, ଅଷ୍ଟ୍ରେଲିଆ, ଶ୍ରୀଲଙ୍କା, ଦକ୍ଷିଣ ଆଫ୍ରିକା, ବାଂଲାଦେଶ ଓ ଇଂଲଣ୍ଡ ମଧ୍ୟ ଟୁର୍ଣ୍ଣାମେଣ୍ଟରେ ସାମିଲ ହେବେ। ସବୁଠାରୁ ବଡ଼ କଥା ହେଉଛି ଏହି ଟୁର୍ଣ୍ଣାମେଣ୍ଟରେ କେବଳ ଅବସରପ୍ରାପ୍ତ ଖେଳାଳିମାନଙ୍କୁ ନେଇ ଖେଳାଯାଇଥାଏ।
ରୋଡ଼ ସେଫଟି ଓ୍ୱାର୍ଲଡ ସିରିଜ ଦେଶ ଓ ବିଶ୍ୱରେ ସଡ଼କ ସୁରକ୍ଷା ପ୍ରତି ସଚେତନତା ଆଣିବା ଉଦ୍ଦେଶ୍ୟରେ ଖେଳାଯାଇଥାଏ।ଏହାକୁ ଭାରତ ସରକାରଙ୍କ ପରିବହନ ମନ୍ତ୍ରାଳୟ ଓ ସୂଚନା ଏବଂ ପ୍ରସାରଣ ବିଭାଗ, ଖେଳ ମନ୍ତ୍ରାଳୟ ସମର୍ଥନ ଯୋଗାଇ ଦେଇ ଆସୁଛନ୍ତି। ଟୁର୍ଣ୍ଣାମେଣ୍ଟରେ ବହୁ ଦିଗ୍ଗଜ ତଥା ଅଭିଜ୍ଞ ଖେଳାଳି ଏଥିରେ ଅଂଶ ଗ୍ରହଣ କରିଥାନ୍ତି। ବ୍ରାଏନ ଲାରା, ତିଲକରତ୍ନେ ଦିଲଶାନ, ରସ ଟେଲରଙ୍କ ଭଳି ଖେଳାଳି ଅଂଶ ଗ୍ରହଣ କରିଥାନ୍ତି। ଗତ ବର୍ଷ ହୋଇଥିବା ଏହି ଟୁର୍ଣ୍ଣାମେଣ୍ଟରେ ଇଣ୍ଡିଆ ଲିଜେଣ୍ଡସ ଚାମ୍ପିଅନ ହୋଇଥିଲା। ଫାଇନାଲରେ ଶ୍ରୀଲଙ୍କାକୁ ଚାମ୍ପିଅନ ଦଳ ୧୪ ରନରେ ହରାଇଥିଲା।
ଏହି ଟୁର୍ଣ୍ଣାମେଣ୍ଟ ସମ୍ପର୍କରେ ସଡକ ପରିବହନ ଏବଂ ରାଜପଥ ମନ୍ତ୍ରୀ ନୀତିନ ଗଡକରୀ କହିଛନ୍ତି କ୍ରିକେଟ୍ ମାଧ୍ୟମରେ ଲୋକଙ୍କ ମଧ୍ୟରେ ସଡକ ସୁରକ୍ଷା ବିଷୟରେ ସଚେତନତା ସୃଷ୍ଟି କରିବା ପାଇଁ ସଡକ ସୁରକ୍ଷା ବିଶ୍ୱ ସିରିଜ୍ ଏକ ଉତ୍ତମ ପଦକ୍ଷେପ। ଆମେ ଚାହୁଁ ପ୍ରତ୍ୟେକ ବ୍ୟକ୍ତି ସଚେତନ ହୁଅନ୍ତୁ ଏବଂ ରାସ୍ତା ସମ୍ବନ୍ଧୀୟ ସମସ୍ତ ନିୟମ ଏବଂ ନିର୍ଦ୍ଦେଶାବଳୀ ଅନୁସରଣ କରନ୍ତୁ। ମୁଁ ନିଶ୍ଚିତ ଯେ ଏହି ସିରିଜ୍ ଏଥିରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। କ୍ରୀଡ଼ା ମନ୍ତ୍ରୀ ଅନୁରାଗ ଠାକୁର କହିଛନ୍ତି ମୁଁ ନିଶ୍ଚିତ ଯେ ସାମାଜିକ ପରିବର୍ତ୍ତନରେ ସଡକ ସୁରକ୍ଷା ବିଶ୍ୱ ସିରିଜ୍ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। କେବଳ ଏତିକି ନୁହେଁ, ଟ୍ରାଫିକ୍ ନିୟମ ଏବଂ ନିରାପତ୍ତା ପ୍ରତି ଲୋକଙ୍କ ମନୋଭାବକୁ ପରିବର୍ତ୍ତନ କରିବା ପାଇଁ ଏହି ସିରିଜ୍ ଏକ ଆଦର୍ଶ ପ୍ଲାଟଫର୍ମ ବୋଲି ପ୍ରମାଣିତ ହେବ ।