ଧର୍ମଶାଳା : ମଙ୍ଗଳବାର ବିଶ୍ୱକପରେ ଖେଳାଯିବ ୧୫ ତମ ମ୍ୟାଚ୍ । ଧର୍ମଶାଳାର ଷ୍ଟାଡିୟମ୍ରେ ମୁହାଁମୁହିଁ ହେବେ ଦକ୍ଷିଣ ଆଫ୍ରିକା ଏବଂ ନେଦରଲାଣ୍ଡସ୍ । ଅପରାହ୍ନ ୨ଟାରେ ଖେଳାଯିବ ଏହି ମ୍ୟାଚ୍ ।
ତେବେ ଚଳିତ ବିଶ୍ୱକପ୍ରେ ସବୁଠୁ ଦମ୍ଦାର ଟିମ୍ ଭାବେ ଉଭା ହୋଇଛି ଦକ୍ଷିଣ ଆଫ୍ରିକା । ନିଜର ପ୍ରଥମ ଦୁଇଟି ଯାକ ମ୍ୟାଚ୍ ଜିତି ପଏଣ୍ଟ ଟେବୁଲରେ ତୃତୀୟ ସ୍ଥାନରେ ରହିଛି ଦକ୍ଷିଣ ଆଫ୍ରିକା । ଅକ୍ଟୋବର ୭ତାରିଖରେ ବିଶ୍ୱକପ୍ରେ ଶ୍ରୀଲଙ୍କା ସହ ନିଜର ପ୍ରଥମ ମ୍ୟାଚ୍ ଖେଳିଥିବା ଦକ୍ଷିଣ ଆଫ୍ରିକା । ଆଉ ଏହି ମ୍ୟାଚ୍ରେ ହାସଲ କରିଥିଲା ଦମ୍ଦାର ବିଜୟ । ଆଉ ଏହା ପରେ ଅକ୍ଟୋବର ୧୨ତାରିଖରେ ଲକ୍ଷ୍ନୋରେ ଅଷ୍ଟ୍ରେଲିଆ ସହିତ ଥିଲା ମୁକାବିଲା । ଏହି ମ୍ୟାଚ୍ରେ ବି ଅଷ୍ଟ୍ରେଲିଆ ଦଳକୁ ପରାସ୍ତ କରିଥିଲା ଦକ୍ଷିଣ ଆଫ୍ରିକା । ଦଳ ସବୁ ବିଭାଗରେ ଏବେ ଚମତ୍କାର ଫର୍ମରେ ରହିଛି । ତେଣୁ ବିରୋଧୀ ଦଳକୁ ଚକ୍ମା ଦେବାରେ ମାହିର ଏହି ଦଳ ।
ସେପଟେ ଚଳିତ ବିଶ୍ୱକପ୍ରେ ଏବେ ଯାଏଁ ନେଦରଲାଣ୍ଡସ ଦୁଇଟି ମୁକାବିଲା ଖେଳିଛି । ଆଉ ଦୁଇଟି ଯାକ ମ୍ୟାଚ୍ରେ ପରାଜୟର ସାମ୍ନା କରିବାକୁ ପଡିଛି । ପ୍ରଥମ ମ୍ୟାଚ୍ରେ ପାକିସ୍ତାନଠୁ ପରାସ୍ତ ହୋଇଥିବା ବେଳେ ୨ୟ ମ୍ୟାଚ୍ରେ ନ୍ୟୁଜିଲାଣ୍ଡକୁ ହାରିଥିଲା । ଏବେ ବିଶ୍ୱକପ୍ର ପଏଣ୍ଟ ତାଲିକାରେ ଶେଷ ସ୍ଥାନରେ ରହିଛି ନେଦରଲାଣ୍ଡସ୍ ।