ଧର୍ମଶାଳା : ଦିନିକିଆ କିକ୍ରେଟ୍ ବିଶ୍ବକପ୍ ବିଶ୍ବଯୁଦ୍ଧ ଜାରି । ଟାଇଟାଲ୍ ପାଇଁ ଜାରି ରହିଛି ଲିଗ୍ ପର୍ଯ୍ୟାୟ ଲଢ଼େଇ । ତେବେ ମଙ୍ଗଳବାର ବିଶ୍ବକପରେ ଖେଳାଯିବ ସପ୍ତମ ଏବଂ ଅଷ୍ଟମ ମ୍ୟାଚ୍ । ଡିଫେଣ୍ଡିଂ ଚାମ୍ପିଅନ୍ ଇଂଲଣ୍ଡକୁ ଭେଟିବ ବେଙ୍ଗଲ ଟାଇଗର ବାଂଲାଦେଶ । ସେହିପରି ଦ୍ବିତୀୟ ମ୍ୟାଚ୍ ଶ୍ରୀଲଙ୍କା ଓ ପାକିସ୍ତାନ ମଧ୍ୟରେ ହାଇଦ୍ରାବାଦରେ ଖେଳାଯିବ ।
ପ୍ରଥମ ମ୍ୟାଚ୍ ଇଂଲଣ୍ଡ ଓ ବାଂଲାଦେଶ ମଧ୍ୟରେ ସାଢେ ୧୦ଟାରେ ହିମାଚଳପ୍ରଦେଶର ଧର୍ମଶାଳାରେ ଖେଳାଯିବ । ପ୍ରଥମ ମ୍ୟାଚରେ ବ୍ରିଟିଶ୍ ବାହିନୀ ନ୍ୟୁଜିଲାଣ୍ଡ ଠାରୁ ପରାସ୍ତ ହୋଇଛି । ତେଣୁ ଆଜିର ମ୍ୟାଚରୁ ବିଜୟ ଖାତା ଖୋଲିବାକୁ ଆଶା ରଖିଛି ଦଳ । ମାତ୍ର ବାଂଲାଦେଶ ପୂର୍ବ ଭଳି କଡ଼ା ଟକ୍କର ଦେବାକୁ ଅପେକ୍ଷା କରିଛି । ପୂର୍ବରୁ ୨୦୧୧ ଓ ୨୦୧୫ ବିଶ୍ୱକପ୍ରେ ଇଂଲଣ୍ଡକୁ ହରାଇ ସାରିଥିବା ବାଂଲାଦେଶ ଆଜି ଧର୍ମଶାଳାରେ ଦମ୍ ଦେଖାଇବାକୁ ସ୍ବତନ୍ତ୍ର ରଣନୀତି ପ୍ରସ୍ତୁତ କରିଛି । ଇଂଲଣ୍ଡ ଡିଫେଣ୍ଡିଂ ଚାମ୍ପିଅନ୍ ହୋଇଥିଲେ ହେଁ ବାଂଲାଦେଶ କଡ଼ା ଟକ୍କର ଦେବାର କ୍ଷମତା ରଖିଛି ।
ଗତ ୪ଟି ବିଶ୍ୱକପ୍ରେ ଉଭୟ ଦଳ ପରସ୍ପରକୁ ଭେଟିଛନ୍ତି ଓ ୨ଟି ଲେଖାଏଁ ମ୍ୟାଚ୍ ଜିତିଛନ୍ତି । ଇଂଲଣ୍ଡ ୨୦୦୭ ଓ ୨୦୧୯ ବିଶ୍ୱକପ୍ରେ ବିଜୟ ହାସଲ କରିଥିଲା । ବାଂଲାଦେଶ ୨୦୧୧ ଓ ୨୦୧୫ ବିଶ୍ୱକପ୍ରେ ବିଜୟୀ ହୋଇଥିଲା । ଦିନିକିଆରେ ଉଭୟ ଦଳ ପରସ୍ପରକୁ ୨୪ଥର ସାମ୍ନା କରିଛନ୍ତି । ଏଥିରୁ ଇଂଲଣ୍ଡ ୧୯ଟି ଓ ବାଂଲାଦେଶ ୫ଟି ମ୍ୟାଚ୍ ଜିତିଛନ୍ତି । ବାଂଲାଦେଶ ଚୂଡ଼ାନ୍ତ ଏକାଦଶରେ ପରିବର୍ତ୍ତନ କରିବା ଆଶା କରାଯାଇପାରେ । ଭେଟେରାନ ମହମୁଦୁଲ୍ଲାଙ୍କ ସ୍ଥାନରେ ମେହଦି ହାସାନ ଖେଳିପାରନ୍ତି । ୨୦୧୫ ବିଶ୍ୱକପ୍ରେ ଇଂଲଣ୍ଡକୁ ହରାଇବାରେ ମହମୁଦୁଲ୍ଲାଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିଥିଲା ।
ସେପଟେ ଆଜି ଦ୍ବିତୀୟ ମ୍ୟାଚ୍ ବା ବିଶ୍ବକପର ଅଷ୍ଟମ ଲିଗ୍ ମ୍ୟାଚ୍ରେ ପାକିସ୍ତାନ ଓ ଶ୍ରୀଲଙ୍କା ମଧ୍ୟରେ ଖେଳା ଯିବ । ଗତ ଏସିଆ କପ୍ ପରାଜୟକୁ ଭୁଲି ନଥିବା ପାକିସ୍ତାନ ଆଜିର ମ୍ୟାଚରେ ପ୍ରତିଶୋଧ ନେବା ଲକ୍ଷ୍ୟରେ ରହିଛି । ଅନ୍ୟପଟରେ ଦକ୍ଷିଣ ଆଫ୍ରିକା ବିପକ୍ଷ ପରାଜୟ ପରେ ଶ୍ରୀଲଙ୍କା ପୁଣିଥରେ ଏକତ୍ରିତ ହୋଇ ଦଳଗତ ପ୍ରଦର୍ଶନ ସହ ବିଜୟ ଖାତା ଖୋଲିବାକୁ ପ୍ରସ୍ତୁତ । ବିଶ୍ୱକପ୍ରେ ଉଭୟ ଦଳ ପରସ୍ପରକୁ ୭ଥର ଭେଟିଛନ୍ତି । ପାକିସ୍ତାନ ସମସ୍ତ ମ୍ୟାଚ୍ ଜିତିଛି । ୨୦୧୯ ବିଶ୍ୱକପ୍ରେ ଉଭୟ ଦଳ ମଧ୍ୟରେ ହେବାକୁ ଥିବା ମ୍ୟାଚ୍ ବର୍ଷା ଧୋଇ ନେଇଥିଲା ।
ଶ୍ରୀଲଙ୍କା ହାଇଦ୍ରାବାଦରେ ପରାଜୟଧାରା ଭଙ୍ଗ କରିବାକୁ ପ୍ରୟାସ କରିବ । ହାଇଦ୍ରାବାଦ ଜଳବାୟୁ ଶ୍ରୀଲଙ୍କା ଦଳକୁ ସୁହାଇବ । ମାତ୍ର ଏଠାରେ ପାକିସ୍ତାନର ସମର୍ଥକଙ୍କ ସଂଖ୍ୟା ଢେର ଅଧିକ । ପାକିସ୍ତାନ ପ୍ରଥମ ମ୍ୟାଚ୍ରେ ନେଦରଲାଣ୍ଡ୍ସକୁ ହରାଇଥିଲେ ହେଁ ଶ୍ରେଷ୍ଠ ପ୍ରଦର୍ଶନ ଦେବାରେ ବିଫଳ ହୋଇଥିଲା । ବର୍ତ୍ତମାନ ଓପନରମାନଙ୍କ ଫର୍ମ ଦଳ ପାଇଁ ଚିନ୍ତାର କାରଣ ସାଜିଥିଲେ ହେଁ ମଧ୍ୟକ୍ରମରେ ସ୍ଥିରତା କିଛି ମାତ୍ରାରେ ଉତ୍ସାହିତ କରିଛି । ହ୍ୟାରିସ ରୌଫ ଫର୍ମ ଫେରି ପାଇବା ଦଳ ପାଇଁ ଶୁଭ ସଂକେତ । ମ୍ୟାଚ୍ ପରେ ପାକିସ୍ତାନ ସିଧା ଅହମ୍ମଦାବାଦ ଯାତ୍ରା କରିବ ଓ ଭାରତ ବିପକ୍ଷ ହାଇ ଭୋଲଟେଜ ମୁକାବିଲା ପାଇଁ ପ୍ରସ୍ତୁତ ହେବ ।