ନୂଆଦିଲ୍ଲୀ : ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍-୨୦୨୩)ରେ ଶୁକ୍ରବାର ଟୁର୍ଣ୍ଣାମେଣ୍ଟର ଦଶମ ମ୍ୟାଚ୍ରେ ମୁହାଁମୁହିଁ ହେବେ ସନରାଇଜର୍ସ ହାଇଦ୍ରାବାଦ ଓ ଲକ୍ଷ୍ନୌ ସୁପରଜାଏଣ୍ଟ୍ସ । ଏହି ମ୍ୟାଚ ସନରାଇଜର୍ସର ଘରୋଇ ଗ୍ରାଉଣ୍ଡ୍ରେ ସନ୍ଧ୍ୟା ୭ଟା ୩୦ ମିନିଟ ସମୟରେ ଖେଳାଯିବ ।
ନୂଆ ଅଧିନାୟକ ଆଡେନ ମାରକ୍ରମ ଯୋଗ ଦେଇସାରି ଥବାରୁ ସନରାଇଜର୍ସର ମନୋବଳ ବଢିଛି । ପ୍ରଥମ ମ୍ୟାଚ୍ ହାରିବା ପରେ ବିଜୟ ପାଇଁ ମୈଦାନକୁ ଓହ୍ଲାଇବ ସନରାଇଜର୍ସ । ତଥାପି ମ୍ୟାଚ୍ ପୂର୍ବରୁ ଦଳକୁ ଅନେକ ତ୍ରୁଟି ସୁଧାରିବାକୁ ହେବ । ଅଭିଜ୍ଞ ମୟଙ୍କ ଅଗ୍ରୱାଲ ଦାୟିତ୍ୱପୂର୍ଣ୍ଣ ବ୍ୟାଟିଂ କରିବା ଜରୁରି । ବହୁ ଚର୍ଚ୍ଚିତ ହ୍ୟାରୀ ବ୍ରୁକଙ୍କ ବ୍ୟାଟ୍ରୁ ବଡ ଇନିଂସ ଦେଖିବାକୁ ଦର୍ଶକ ଉତ୍ସୁକତାର ସହ ଅପେକ୍ଷା କରିଛନ୍ତି ।
ସୁପର ଜାଏଣ୍ଟ୍ସ ଦଳରେ ମଧ୍ୟ ଏକାଦଶ ଚୟନକୁ ନେଇ ଅନେକ ଆଲୋଚନା ହେବ । କ୍ୱିଣ୍ଟନ ଡି କକ୍ ଦଳରେ ଯୋଗ ଦେଇଛନ୍ତି । ଗତ ସିଜନରେ ସେ ଓପନ୍ କରିଥିଲେ । ତେଣୁ କେଲି ମେୟର୍ସଙ୍କୁ ଏକାଦଶରେ ସୁଯୋଗ ମିଳି ନଥିଲା । ଏଥର ଡି କକ୍ଙ୍କ ଅନୁପସ୍ଥିତରେ ମେୟର୍ସ ୨ଟି ଅର୍ଦ୍ଧଶତକ ଅର୍ଜନ କରିସାରିଛନ୍ତି । ତେଣୁ ତାଙ୍କୁ ଏକାଦଶରୁ ବାଦ ଦେବା ମୁର୍ଖାମୀ ହେବ । ଡି କକ୍ ମଧ୍ୟ ନେଦରଲାଣ୍ଡ୍ସ ବିପକ୍ଷରେ ୪୪ଟି ବଲ୍ର ଶତକ ଅର୍ଜନ କରିଥିଲେ । ତେଣୁ ତାଙ୍କ ଫର୍ମକୁ ପ୍ରାଥମିକତା ଦେବାକୁ ପଡ଼ିବ । ତେଣୁ ମାର୍କସ ଷ୍ଟଇନିସଙ୍କ ସ୍ଥାନରେ ଡି କକ୍ ଖେଳିପାରନ୍ତି । ଆୟୁଷ ବାଦୋନି ଏକାଦଶରେ ରହିବେ । ଜୟଦେବ ଉନାକାତ କିମ୍ବା ୟଶ ଠାକୁରଙ୍କ ମଧ୍ୟରୁ ଜଣେ ଇମ୍ପାକ୍ଟ ଖେଳାଳି ଭାବେ ପ୍ରବେଶ କରିପାରିବେ ।