ନୂଆଦିଲ୍ଲୀ: ନିର୍ବାଚନରେ ସମସ୍ତ ‘ଭିଭିପାଟ୍’ ସ୍ଲିପ୍ ଗଣନା କରିବାକୁ ଏକ ଆବେଦନ ଉପରେ ସୁପ୍ରିମକୋର୍ଟ ନିର୍ବାଚନ କମିଶନ ଓ କେନ୍ଦ୍ରକୁ ଜବାବ ତଲବ କରିଛନ୍ତି । ସମ୍ପ୍ରତି ଭିଭିପାଟ୍ ସ୍ଲିପ୍ ମାଧ୍ୟମରେ କେବଳ ପାଞ୍ଚଟି ମନୋନୀତ ଇଭିଏମ୍ (ଇଲେକ୍ଟ୍ରୋନିକ୍ ଭୋଟିଂ ମେସିନ୍)ର ଯାଞ୍ଚ କରାଯାଉଛି ।
‘ଭୋଟର ଭେରିଫାଏବଲ୍ ପେପର ଅଡିଟ୍ ଟ୍ରେଲ୍’ (ଭିଭିପିଏଟି) ହେଉଛି ଏକ ଭୋଟ୍ ଯାଞ୍ଚ ପ୍ରଣାଳୀ ।
ଏହାଦ୍ବାରା ଜଣେ ଭୋଟର ତାଙ୍କ ଭୋଟ୍ ସଠିକ୍ ପ୍ରାର୍ଥୀଙ୍କୁ ଯାଇଛି କି ନାହିଁ ଜାଣିପାରିବେ ।
ଭିଭିପାଟ୍ ମାଧ୍ୟମରେ ମେସିନରୁ ଏକ କାଗଜ ସ୍ଲିପ୍ ବାହାରିଥାଏ, ଯାହାକୁ ଭୋଟର ଦେଖିପାରିବେ । ଏହି ସ୍ଲିପ୍ ଏକ ସିଲ୍ ବକ୍ସରେ ରଖାଯାଇଥାଏ । ବିବାଦ ହେଲେ ଏହା ଖୋଲାଯାଇପାରେ |
ଜଷ୍ଟିସ୍ ବିଆର୍ ଗଭାଇ ଏବଂ ସନ୍ଦୀପ ମେହେଟ୍ଟାଙ୍କ ଏକ ଖଣ୍ଡପୀଠ ସାମାଜିକ କର୍ମୀ ଅରୁଣ କୁମାର ଅଗ୍ରୱାଲଙ୍କ ଆବେଦନ ଉପରେ ନିର୍ବାଚନ କମିଶନ ଓ କେନ୍ଦ୍ର ସରକାରଙ୍କୁ ନୋଟିସ ଜାରି କରିଛନ୍ତି। ମେ ୧୭ରେ ଏହି ମାମଲାର ପରବର୍ତ୍ତୀ ଶୁଣାଣି ହୋଇପାରେ |
ଏହି ଆବେଦନରେ କୁହାଯାଇଛି ଯେ, ସରକାର ୨୪ ଲକ୍ଷ ଭିଭିପାଟ୍ ମେସିନ୍ କିଣିବା ପାଇଁ ପ୍ରାୟ ୫୦୦୦ କୋଟି ଟଙ୍କା ଖର୍ଚ୍ଚ କରିଛନ୍ତି । ହେଲେ ବର୍ତ୍ତମାନ ପ୍ରାୟ ୨୦,୦୦୦ ଭିଭିପାଟ୍ ସ୍ଲିପ୍ ହିଁ ଯାଞ୍ଚ କରାଯାଉଛି। କ୍ରମାନ୍ୱୟରେ ଭିଭିପାଟ୍ ଗଣିବା ନେଇ ନିର୍ବାଚନ କମିଶନଙ୍କ ନୀତିକୁ ମଧ୍ୟ ଆବେଦନରେ ଚ୍ୟାଲେଞ୍ଜ କରାଯାଇଛି। ଏହାଦ୍ବାରା ଅଯଥା ବିଳମ୍ବ ହେବ ବୋଲି ଆବେଦନକାରୀ କହିଛନ୍ତି । ଯଦି ଏକାସାଙ୍ଗରେ ସମସ୍ତ ଭିଭପାଟ୍ ଗଣିବାକୁ ଅନୁମତି ଦିଆଯାଏ ଓ ଗଣନା ପାଇଁ ପ୍ରତ୍ୟେକ ନିର୍ବାଚନମଣ୍ଡଳୀରେ ଅଧିକ ଅଧିକାରୀ ନିଯୁକ୍ତ ହୁଅନ୍ତି, ତେବେ ସମସ୍ତ ଭିଭିପାଟ୍ ସ୍ଲିପର ଗଣନା ମାତ୍ର ୫-୬ ଘଣ୍ଟା ମଧ୍ୟରେ ହୋଇପାରିବ ବୋଲି ଆବେଦନରେ କୁହାଯାଇଛି।
ଗତି କିଛି ନିର୍ବାଚନରେ ଭିଭପାଟ୍ ଗଣନା ଏବଂ ଇଭିଏମ୍ ଫଳାଫଳ ମଧ୍ୟରେ ଅସଙ୍ଗତି ରହିଥିବା ଅଭିଯୋଗ ହୋଇଥିଲା । ଅତଏବ ଭିଭିପାଟ୍ ସ୍ଲିପ ଗୁଡ଼ିକର ଶତ ପ୍ରତିଶତ ଗଣନା କରାଯାଇ ଭୋଟରଙ୍କୁ ତାଙ୍କ ଭୋଟ୍ ସଠିକ୍ ପ୍ରାର୍ଥୀଙ୍କୁ ଯାଇଛି କି ନାହିଁ ନିଶ୍ଚିତ କରିବାକୁ ସୁଯୋଗ ଦିଆଯିବା ଉଚିତ | ଏଥିପାଇଁ ଭୋଟରମାନଙ୍କୁ ଭିଭିପାଟ୍ ସ୍ଲିପକୁ ନିଜେ ବକ୍ସରେ ରଖିବାକୁ ଅନୁମତି ଦିଆଯାଉ ବୋଲି ଆବେଦନକାରୀ ଦାବି କରିଛନ୍ତିି ।
ବର୍ତ୍ତମାନ ଭୋଟର କେବଳ ୭ ସେକେଣ୍ଡ ପାଇଁ ଭିଭିପାଟ୍ ସ୍ଲିପ୍ ଦେଖିପାରୁଛନ୍ତି । ଇଭିଏମରେ ଭୋଟ୍ ଦିଆଯିବା ପରେ ମେସିନ୍ ଭିତରେ ଦେଖାଯାଉଥିବା ଭିଭିପାଟ୍ ସ୍ଲିପ୍ ୱିଣ୍ଡୋକୁ ଦେଖି ଭୋଟରମାନେ ନିଜ ଭୋଟ୍ ନିଶ୍ଚିତ କରିପାରୁଛନ୍ତି | ୭ ସେକେଣ୍ଡ ପରେ ଭିଭିପାଟ୍ ସ୍ଲିପ୍ ଆପେ ଆପେ ତଳେ ଥିବା ବକ୍ସରେ ପଡ଼ିବ ।