ନୂଆଦିଲ୍ଲୀ: ରାଷ୍ଟ୍ରପତିଙ୍କ ଦ୍ବାରା ନୂଆ ସଂସଦ ଭବନର ଉଦଘାଟନ ଦାବି କରି ଦାୟର ପିଟିସନର ଆଜି ଶୁଣାଣି କରିବେ ସୁପ୍ରିମକୋର୍ଟ । ନୂଆ ସଂସଦ ଭବନର ଉଦଘାଟନକୁ ନେଇ ବିବାଦ ଦିନକୁ ଦିନ ବଢିବାରେ ଲାଗିଛି। ରାଷ୍ଟ୍ରପତିଙ୍କ ବଦଳରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହାକୁ ଉଦଘାଟନ କରୁଥିବାରୁ ବିରୋଧୀ ଆପତ୍ତି ଉଠାଇଛନ୍ତି ଏବଂ ଉଦଘାଟନ ଉତ୍ସବକୁ ବର୍ଜନ କରିବାକୁ ନିଷ୍ପତ୍ତି ନେଇଛନ୍ତି ।
ସିଆର୍ ଜୟା ସୁକିନ୍ ନାମକ ଜଣେ ଓକିଲ ସୁପ୍ରିମକୋର୍ଟରେ ଏକ ଜନସ୍ୱାର୍ଥ ମାମଲା ଦାୟର କରିଛନ୍ତି । ପ୍ରଧାନମନ୍ତ୍ରୀଙ୍କ ବଦଳରେ ରାଷ୍ଟ୍ରପତିଙ୍କ ଦ୍ୱାରା ନୂଆ ସଂସଦ ଭବନର ଉଦଘାଟନ କରାଯାଉ ବୋଲି ସେ ଏଥିରେ ଦାବି କରିଛନ୍ତି । ସେ ଯୁକ୍ତି କରିଛନ୍ତି ଯେ, ରାଷ୍ଟ୍ରପତି ସାମ୍ବିଧାନିକ ମୁଖ୍ୟ। ଏଭଳି ସ୍ଥିତିରେ ମୋଦୀ ସରକାର ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ହାତରେ ନୂଆ ସଂସଦର ଉଦଘାଟନ କାହିଁକି କରୁନାହାନ୍ତି? ଏପରିକି ରାଷ୍ଟ୍ରପତିଙ୍କୁ ଏହି କାର୍ଯ୍ୟ ପାଇଁ ନିମନ୍ତ୍ରଣ ମଧ୍ୟ କରାଯାଇ ନାହିଁ |
ଆବେଦନକାରୀ କହିଛନ୍ତି ଯେ ସମ୍ବିଧାନର ଧାରା ୭୯ ଅନୁଯାୟୀ ରାଷ୍ଟ୍ରପତି ଏବଂ ଦୁଇଟି ଗୃହ ସଂସଦର ଅଭିନ୍ନ ଅଂଶ। ରାଷ୍ଟ୍ରପତି ହେଉଛନ୍ତି ଦେଶର ପ୍ରଥମ ନାଗରିକ। ତାଙ୍କ ଆହ୍ବାନରେ ସଂସଦର ଉଭୟ ଗୃହ କାର୍ଯ୍ୟ ଆରମ୍ଭ ହୋଇଥାଏ। ଏପରିକି ପ୍ରଧାନମନ୍ତ୍ରୀ ଏବଂ ସରକାରଙ୍କ ସମସ୍ତ ମନ୍ତ୍ରୀ ନିଯୁକ୍ତ କରିବାର କାର୍ଯ୍ୟ ମଧ୍ୟ ରାଷ୍ଟ୍ରପତିଙ୍କ ଦାୟିତ୍ବ। । ରାଷ୍ଟ୍ରପତିଙ୍କ ନାମରେ ସରକାର ସମସ୍ତ କାର୍ଯ୍ୟ କରନ୍ତି। ସଂସଦ ଦ୍ବାରା ଗୃହୀତ ହୋଇଥିବା କୌଣସି ବିଲ୍ ରାଷ୍ଟ୍ରପତିଙ୍କ ଦସ୍ତଖତ ବିନା ଆଇନର ରୂପ ନେଇପାରିବ ନାହିଁ। ସାମଗ୍ରିକ ଭାବେ ରାଷ୍ଟ୍ରପତିଙ୍କ ନାମରେ ସରକାର ଚାଲିଥାଏ । ଉଦଘାଟନୀ ସମାରୋହରେ ରାଷ୍ଟ୍ରପତିଙ୍କୁ ନିମନ୍ତ୍ରଣ ନକରିବା ତାଙ୍କ ପ୍ରତି ଅପମାନ। ଏହା ମଧ୍ୟ ଭାରତର ସମ୍ବିଧାନର ପ୍ରତ୍ୟକ୍ଷ ଅବମାନନା |
ରାଷ୍ଟ୍ରପତିଙ୍କୁ ଅଣଦେଖା ପ୍ରତିବାଦରେ ୧୯ ବିରୋଧୀ ଦଳ ସଂସଦର ଉଦଘାଟନୀ ଉତ୍ସବକୁ ବର୍ଜନ କରିବାକୁ ନିଷ୍ପତ୍ତି ନେଇଛନ୍ତି। ସେମାନେ କହିଛନ୍ତି ଯେ ରାଷ୍ଟ୍ରପତିଙ୍କୁ ଆମନ୍ତ୍ରଣ ନ କରିବା ସମ୍ବିଧାନର ଅପମାନ।