ନୂଆଦିଲ୍ଲୀ : ଜୁନ୍ ୨ରୁ ଆରମ୍ଭ ହେବାକୁ ଥିବା ଟି-୨୦ ବିଶ୍ୱକପ୍ ପୂର୍ବରୁ ଅଧିନାୟକ ରୋହିତ ଶର୍ମାଙ୍କ ସମେତ ଭାରତୀୟ କ୍ରିକେଟରଙ୍କ ପ୍ରଥମ ଦଳ ଆମେରିକା ଅଭିମୁଖେ ଯାତ୍ରା କରିଛି। ରୋହିତଙ୍କ ବ୍ୟତୀତ ଦ୍ରୁତ ବୋଲର ଯଶପ୍ରୀତ ବୁମ୍ରା, ଶୀର୍ଷ ମାନ୍ୟତାପ୍ରାପ୍ତ ଟି-୨୦ ବ୍ୟାଟ୍ସମ୍ୟାନ୍ ସୂର୍ଯ୍ୟକୁମାର ଯାଦବ, ମୁଖ୍ୟ ପ୍ରଶିକ୍ଷକ ରାହୁଲ ଦ୍ରାବିଡ଼ ଏବଂ ବ୍ୟାଟିଂ କୋଚ୍ ବିକ୍ରମ ରାଠୋର ଏବଂ ଅନ୍ୟ କିଛି ଖେଳାଳି ମୁମ୍ବାଇ ବିମାନ ବନ୍ଦରରୁ ଯାତ୍ରା କରୁଛନ୍ତି। ରବୀନ୍ଦ୍ର ଜାଡେଜା, ଶିବମ ଦୁବେ, ମହମ୍ମଦ ସିରାଜ, ଅର୍ଶଦୀପ ସିଂହ, ଖଲିଲ ଅହମ୍ମଦ, କୁଲଦୀପ ଯାଦବ ଓ ଅକ୍ଷର ପଟେଲଙ୍କ ସମେତ ଅନ୍ୟ ଖେଳାଳିମାନେ ଏହି ଦଳରେ ସ୍ଥାନ ପାଇଛନ୍ତି।
ପ୍ଲେ ଅଫରେ ପହଞ୍ଚିଥିବା ଆଇପିଏଲ୍ ଦଳରେ ସ୍ଥାନ ପାଇଥିବା ଷ୍ଟାର ବ୍ୟାଟ୍ସମ୍ୟାନ୍ ବିରାଟ କୋହଲିଙ୍କ ସମେତ କିଛି ଖେଳାଳି ଏପର୍ଯ୍ୟନ୍ତ ଟି-୨୦ ଟୁର୍ଣ୍ଣାମେଣ୍ଟକୁ ଯାଇନାହାନ୍ତି। ତେଣୁ ଯଶସ୍ୱୀ ଜୟସ୍ୱାଲ, ସଞ୍ଜୁ ସାମସନ ଓ ୟୁଜବେନ୍ଦ୍ର ଚହଲଙ୍କ ଭଳି ଖେଳାଳି ଏପର୍ଯ୍ୟନ୍ତ ଦଳରେ ସାମିଲ ହୋଇନାହାନ୍ତି। ଜୁନ୍ ୨ରୁ ୨୯ ତାରିଖ ପର୍ଯ୍ୟନ୍ତ ଆମେରିକା ଓ ୱେଷ୍ଟଇଣ୍ଡିଜ୍ ମିଳିତ ଭାବେ ଟି-୨୦ ବିଶ୍ୱକପ୍ ଆୟୋଜନ କରିବେ। ଭାରତୀୟ କ୍ରିକେଟ୍ ଦଳ ଜୁନ୍ ୫ରେ ନ୍ୟୁୟର୍କର ନବନିର୍ମିତ ନାସାଉ କାଉଣ୍ଟି ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମରେ ଆୟର୍ଲାଣ୍ଡ ବିପକ୍ଷରେ ଅଭିଯାନ ଆରମ୍ଭ କରିବ। ଜୁନ୍ ୯ରେ ଭାରତ ପାକିସ୍ତାନକୁ ଭେଟିବା ପରେ ଗ୍ରୁପ୍ ‘ଏ’ରେ ସହ ଆୟୋଜକ ଆମେରିକା (ଜୁନ୍ ୧୨) ଓ କାନାଡ଼ା (ଜୁନ୍ ୧୫)କୁ ଭେଟିବ। ୨୦୦୭ରେ ଦକ୍ଷିଣ ଆଫ୍ରିକାରେ ଅନୁଷ୍ଠିତ ପ୍ରଥମ ସଂସ୍କରଣରେ ଭାରତ ବିଜୟୀ ହୋଇଥିଲା।