ନୂଆଦିଲ୍ଲୀ: ସମଲିଙ୍ଗୀ ବିବାହକୁ ଆଇନଗତ ସ୍ୱୀକୃତି ନେଇ ଆଜି ସୁପ୍ରିମକୋର୍ଟର ପାଞ୍ଚ ଜଣିଆ ସାମ୍ବିଧାନିକ ଖଣ୍ଡପୀଠ ଶୁଣାଣି କରିବ। ସମଲିଙ୍ଗୀ ବିବାହକୁ ଏକ ସହରୀ ଆଭିଜାତ୍ୟ ଚିନ୍ତାଧାରା କହି କେନ୍ଦ୍ର ବିରୋଧ କରିଛି । କୋର୍ଟ ତାଙ୍କ ତରଫରୁ ବିବାହର ଏକ ନୂଆ ଅନୁଷ୍ଠାନ ସୃଷ୍ଟି କରିପାରିବେ ନାହିଁ। ସମଲିଙ୍ଗୀ ବିବାହକୁ ଆଇନଗତ ସ୍ୱୀକୃତି ନିଷ୍ପତ୍ତି ନେବା କୋର୍ଟଙ୍କ ନୁହେଁ ବରଂ ସଂସଦର କାମ ବୋଲି କେନ୍ଦ୍ର ନିଜ ଜବାବରେ କହିଛି |
ପ୍ରଧାନ ବିଚାରପତି ଜଷ୍ଟିସ ଡିଓ୍ବାଇ ଚନ୍ଦ୍ରଚୂଡଙ୍କ ନେତୃତ୍ୱରେ ଏକ ଖଣ୍ଡପୀଠ ମାର୍ଚ୍ଚ ୧୩ରେ ପାଞ୍ଚ ଜଣିଆ ସାମ୍ବିଧାନିକ ପୀଠକୁ ଏହି ମାମଲା ହସ୍ତାନ୍ତର କରିଥିଲେ । ପ୍ରଧାନ ବିଚାରପତି ଜଷ୍ଟିସ ଚନ୍ଦ୍ରଚୂଡ଼ଙ୍କ ସମେତ ଏହି ସାମ୍ବିଧାନିକ ପୀଠର ଅନ୍ୟ ଚାରି ବିଚାରପତି ହେଲେ ଜଷ୍ଟିସ ଏସକେ କୌଲ୍, ଜଷ୍ଟିସ ହିମା କୋହଲି, ଜଷ୍ଟିସ ରବିନ୍ଦ୍ର ଭଟ୍ଟ ଏବଂ ଜଷ୍ଟିସ ପିଏସ ନରସିଂହ।