ନୂଆଦିଲ୍ଲୀ : କେନ୍ଦ୍ର ସଡ଼କ, ପରିବହନ ଏବଂ ରାଜପଥ ମନ୍ତ୍ରୀ ନୀତିନ ଗଡ଼କରୀ କହିଛନ୍ତି ଯେ ସଡ଼କ ସୁରକ୍ଷା ଇକୋସିଷ୍ଟମରେ କୃତ୍ରିମ ବୁଦ୍ଧିମତାର ବ୍ୟବହାର ଭଳି ସମସ୍ତ ପ୍ରକାରର ଉନ୍ନତ ଜ୍ଞାନକୌଶଳକୁ ସରକାର କାର୍ଯ୍ୟକାରୀ କରୁଛନ୍ତି। ଆଜି ନୂଆଦିଲ୍ଲୀରେ ଟ୍ରାଫିକ ଇନଫ୍ରାଟେକ୍ ଏକ୍ସପୋର ଦ୍ୱାଦଶ ସଂସ୍କରଣକୁ ସମ୍ବୋଧିତ କରି ସେ ସଡ଼କ ନିର୍ମାଣରେ ଅତ୍ୟାଧୁନିକ ଜ୍ଞାନକୌଶଳ ଅବଲମ୍ବନ ଉପରେ ଗୁରୁତ୍ୱାରୋପ କରିଥିଲେ। ସେ ଆହୁରି ମଧ୍ୟ କହିଛନ୍ତି ଯେ ଗାଡି ଚାଳକଙ୍କ ପାଇଁ ରାସ୍ତାକୁ ଅଧିକ ସୁରକ୍ଷିତ କରିବା ପାଇଁ ସରକାର ପ୍ରତିଭାବାନ ଇଞ୍ଜିନିୟରମାନଙ୍କୁ ରାସ୍ତା ନିର୍ମାଣରେ ସେମାନଙ୍କର ସର୍ବୋତ୍ତମ ଜ୍ଞାନ ବ୍ୟବହାର ଲାଗି ଉତ୍ସାହିତ କରୁଛନ୍ତି।
ଶ୍ରୀ ଗଡ଼କରୀ କହିଛନ୍ତି ଯେ ଭାରତୀୟ ଜାତୀୟ ରାଜପଥ ପ୍ରାଧିକରଣ ଅନେକ ଏକ୍ସପ୍ରେସ ୱେ ଏବଂଏକ୍ସଆଇଏସ ନିୟନ୍ତ୍ରିତ ରାସ୍ତା ନିର୍ମାଣ କରୁଛି ଯାହା ଦୁର୍ଘଟଣା ସଂଖ୍ୟାକୁ ହ୍ରାସ କରିବ। ସଡ଼କ ନିରାପତ୍ତା ପାଇଁ ମନ୍ତ୍ରଣାଳୟ ଘରୋଇ କ୍ଷେତ୍ରର ବିଶେଷଜ୍ଞମାନଙ୍କୁ ନିଯୁକ୍ତ କରୁଛି ବୋଲି ସେ କହିଛନ୍ତି। ଆଇନ ପ୍ରଣୟନ, ଟୋଲ୍ ପରିଚାଳନା ଏବଂ ରାସ୍ତାର ଗୁଣବତ୍ତା ଉପରେ ନଜର ରଖିବା ଭଳି ଏକ ବ୍ୟବସ୍ଥା ବିକଶିତ ଓ କାର୍ଯ୍ୟକାରୀ କରିବା ଉପରେ ସେ ଗୁରୁତ୍ୱ ପ୍ରଦାନ କରିଛନ୍ତି। ଶ୍ରୀ ଗଡ଼କରୀ କହିଛନ୍ତି ଯେ ଆସନ୍ତା ତିନି ମାସ ମଧ୍ୟରେ ଏହି ପ୍ରକଳ୍ପ ଚୂଡ଼ାନ୍ତ ହେବ ଏବଂ ମୁଖ୍ୟ ରାଜପଥଗୁଡ଼ିକରେ ପୂର୍ବରୁ କାର୍ଯ୍ୟକାରୀ ହେବ ଏବଂ ପରେ ସମ୍ପୃକ୍ତ ରାଜ୍ୟ ସରକାରମାନେ ଏହାର ଲାଭ ଉଠାଇପାରିବେ।