କେନ୍ଦୁଝର, କେନ୍ଦୁଝର ଜିଲା ତେଲକୋଇ ବ୍ଲକ୍ର ତାଳପଦା ଅଞ୍ଚଳରେ ଛାତ୍ରୀଛାତ୍ର ପାଠ ପାଇଁ ଜୀବନକୁ ବାଜିରେ ଲଗାଉଛନ୍ତି। ପ୍ରତ୍ୟହ ସମାକୋଇ ନଦୀ ପାର ହୋଇ ତାଳପଦା ସ୍କୁଲକୁ ଯାଉଛନ୍ତି। ଅଭିଭାବକ ସ୍କୁଲ ଯିବା ଓ ଛୁଟି ସମୟରେ ଅପେକ୍ଷା କରି ପାର କରୁଥିବା ଦେଖିବାକୁ ମିଳିଛି। ସୂଚନା ଅନୁଯାୟୀ, ତେଲକୋଇ ବ୍ଲକ୍ର ତାଳପଦା ପଞ୍ଚାୟତ ଆଦିବାସୀ ବହୁଳ ଅଞ୍ଚଳ ହୋଇଥିବା ବେଳେ ଏଠାରେ ଗମନାଗମନର ବହୁ ସମସ୍ୟା ଲାଗିରହିଛି। ରାସ୍ତା ସୁବିଧା ନ ଥିବାରୁ ସ୍କୁଲ ଯିବା ପାଇଁ ପିଲାମାନଙ୍କୁ ବିପଦପୂର୍ଣ୍ଣ ଅବସ୍ଥାରେ ଉଛୁଳା ନଦୀ ପାରହେବାକୁ ପଡୁଛି। ପ୍ରତ୍ୟକ ଦିନ ୧୫ରୁ ଊର୍ଦ୍ଧ୍ୱ ଛାତ୍ରୀଛାତ୍ର ୩ କିଲୋମିଟର ବାଟ ପାଦରେ ଚାଲି ସ୍କୁଲକୁ ଆସନ୍ତି। କିନ୍ତୁ ଏମାନଙ୍କ ରାସ୍ତାରେ ବାଟ ଓଗାଳେ ସମାକୋଇ ନଦୀ। ବର୍ଷା ଋତୁ ୪ ମାସ ନଦୀରେ ପାଣି ଅଧିକ ରହୁଥିବାରୁ ଯାତାୟାତ ସମସ୍ୟା ଦେଖାଦେଉଛି। ଅଞ୍ଚଳରେ ଅନ୍ୟ କୌଣସି ସୁବିଧା ନ ଥିବାରୁ ପାଣି ସାମାନ୍ୟ କମିବା ପରେ ଅବିଭାବକମାନେ ପିଲାଙ୍କୁ କାନ୍ଧରେ ବସାଇ ବିପଦଜ୍ଜନକ ଅବସ୍ଥାରେ ନଦୀ ପାର କରାଇ ସ୍କୁଲକୁ ପଠାଇଥାଆନ୍ତି। ଅନୁରୂପ ସମସ୍ତ କାମ ପଛରେ ପକାଇ ପିଲାଙ୍କର ଫେରିବା ବାଟକୁ ଚାହଁି ରହିଥାଆନ୍ତି। ପୁଣି କାନ୍ଧରେ ବସାଇ ନଦୀ ପାରକରାଇ ଘରକୁ ଆଣିଥାଆନ୍ତି। ଏଭଳି ଅବସ୍ଥାରେ ଅନେକ ସମୟରେ ପଥରରେ ଗୋଡ଼ ଖସି ପିଲାମାନେ ପାଣିରେ ପଡ଼ିବାର ନଜିର ମଧ୍ୟ ରହିଛି। ଏଥିରେ ସମଗ୍ର ଅଞ୍ଚଳର ଗୁରୁତର ରୋଗୀଙ୍କ ସହ ଗର୍ଭବତୀ ମହିଳାମାନେ ମଧ୍ୟ ପ୍ରଭାବିତ ହେଉଛନ୍ତି। ଏ ସମ୍ପର୍କରେ ତେଲକୋଇ ବିଡିଓ ସାନ୍ତନୁ ନାଏକ କହିଛନ୍ତି, ସେଠାରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ସ୍ଥାୟୀ ପୋଲ ନିର୍ମାଣ କରିବାକୁ ପ୍ରସ୍ତାବ ରହିଛି। କିନ୍ତୁ ବର୍ତ୍ତମାନ ସମସ୍ୟାକୁ ନଜରରେ ରଖି ସୋମବାର ଘଟଣାର ତଦନ୍ତ କରି ସମାଧାନ ପାଇଁ ପ୍ରୟାସ କରାଯିବ।
