ଜୟପୁର : ରାଜସ୍ଥାନ ସିକର ଲକ୍ଷ୍ମଣଗଡ଼ ଅଞ୍ଚଳରେ ମର୍ମନ୍ତୁଦ ସଡ଼କ ଦୁର୍ଘଟଣା । ବୋଲେରୋ ଏବଂ କାର୍ ମଧ୍ୟରେ ଜୋରଦାର ଧକ୍କା । ଆଉ ଏହି ଦୁର୍ଘଟଣାରେ ଚାଲିଗଲା ୬ଜଣଙ୍କ ଜୀବନ । ବାକି ଅନ୍ୟ ଚାରି ଜଣ ଲୋକ ଆହତ ହୋଇଛନ୍ତି । ସମସ୍ତ ଆହତଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି ।
ଖବର ଅନୁଯାୟୀ, ବୋଲେରୋ ଗାଡିଟି ଲକ୍ଷ୍ମଣଗଡ଼ରୁ ସିକର ଅଭିମୁଖେ ଯାଉଥିଲା । ଏହି ସମୟରେ ସିକର ପଟୁ ଲକ୍ଷ୍ମଣଗଡ଼ ଆସୁଥିଲା ଏକ ଅର୍ଟିଗୋ କାର୍ । ଏହି ସମୟରେ ମଣି ହୋଟେଲ୍ ନିକଟରେ ଅର୍ଟିଗୋ କାର୍ଟି ଭାରସାମ୍ୟ ହରାଇ ଡିଭାଇଡ଼ର ପିଟି ହୋଇଥିଲା । ଏହାପରେ ଅନ୍ୟ ପଟ ରାସ୍ତାରେ ଯାଉଥିବା ବୋଲେରୋ ଉପରେ ପଡିଥିଲା । ଦୁର୍ଘଟଣା ଏତେ ଭୟଙ୍କର ଥିଲା ଯେ ଦୁଇଟି ଗାଡି ଭାଙ୍ଗି ଚୁର୍ମାର ହୋଇଯାଇଛି । ଏହାସହିତ ଗାଡିରେ ଥିବା ଲୋକଙ୍କ ମଧ୍ୟରୁ ୬ଜଣଙ୍କ ମୃତ୍ୟୁ ହୋଇଥିବା ବେଳେ ୪ଜଣ ଗୁରୁତର ହୋଇଛନ୍ତି । ସମସ୍ତ ଗୁରୁତରଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି ।
ତେବେ ମୃତକଙ୍କ ମଧ୍ୟରେ ୩ ଜଣ ମହିଳା ଥିବା ସୂଚନା ମିଳିଛି । ସେହିପରି ଦୁର୍ଘଟଣା ସଂପର୍କରେ ଖବର ପାଇ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ପ୍ରଥମ ଆମ୍ବୁଲାନ୍ସ ଯୋଗେ ସମସ୍ତ ମୃତାହତଙ୍କୁ ଉଦ୍ଧାର କରି ସିକର ମେଡିକାଲରେ ଭର୍ତ୍ତି କରାଯାଇଛି । କିଛି ଆହତଙ୍କ ଅବସ୍ଥା ଗୁରୁତର ଥିବାରୁ ଲକ୍ଷ୍ମଣଗଡ଼ ମେଡିକାଲକୁ ମଧ୍ୟ ସ୍ଥାନାନ୍ତରିତ କରାଯାଇଛି ।
