ବେଙ୍ଗାଲୁରୁ : ବିଧାନସଭା ନିର୍ବାଚନ ପୂର୍ବରୁ କର୍ଣ୍ଣାଟକ ବିଜେପିରୁ ଇସ୍ତଫା ଧାରା ଜାରି ରହିଛି । ଏବେ ଆଉ ଜଣେ ପ୍ରଭାବଶାଳୀ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ଜଗଦୀଶ ଶେଟ୍ଟର ମଧ୍ୟ ଦଳ ଛାଡିଛନ୍ତି । ଆସନ୍ତା ୧୦ ତାରିଖ ବିଧାନସଭା ନିର୍ବାଚନ ପାଇଁ ଟିକେଟ୍ ନ ପାଇବା ପରେ ଶେଟ୍ଟର ବିଜେପିରୁ ଇସ୍ତଫା ଘୋଷଣା କରିଛନ୍ତି। ସେ ବିଧାନସଭାରୁ ମଧ୍ୟ ଇସ୍ତଫା ଦେବେ ବୋଲି ୬୭ ବର୍ଷୀୟ ଶେଟ୍ଟର କହିଛନ୍ତି ।
ରାଜ୍ୟରେ କଂଗ୍ରେସ କ୍ଷମତାରେ ଥିବାବେଳେ ବିଧାନସଭାରେ ବିରୋଧୀ ଦଳର ନେତା ଥିବା ଶେଟ୍ଟର ମଧ୍ୟ କହିଛନ୍ତି ଯେ ଆଗାମୀ ବିଧାନସଭା ନିର୍ବାଚନରେ ସେ ନିଶ୍ଚିତ ଲଢ଼ିବେ । ସେ କଂଗ୍ରେସରେ ସାମିଲ ହେବା ସମ୍ଭାବନା ରହିଛି ।
ଦଳକୁ ତାଙ୍କର ଅବଦାନ ତଥା ରାଜ୍ୟର ପ୍ରମୁଖ ପଦବୀରେ ଥିବା ଦାୟିତ୍ଵକୁ ମନେ ପକାଇ ଶେଟ୍ଟର କହିଛନ୍ତି, “ମୋତେ ଯେଉଁଭଳି ଅପମାନିତ କରାଗଲା ସେଥିରେ ମୁଁ ଆହତ ହୋଇଥିଲି । ମୁଁ ଭାବିଲି ମୁଁ ସେମାନଙ୍କୁ ଚ୍ୟାଲେଞ୍ଜ କରିବା ଉଚିତ୍ । ସେଥିପାଇଁ ମୁଁ ନିର୍ବାଚନ ଲଢ଼ିବାକୁ ନିଷ୍ପତ୍ତି ନେଇଛି। ମୁଁ ବିଧାନସଭାରୁ ମଧ୍ୟ ଇସ୍ତଫା ଦେବି। ”
ତାଙ୍କ ବିରୋଧରେ ଏକ ସୁଚିନ୍ତିତ ଷଡ଼ଯନ୍ତ୍ର ରଚାଯାଇଛି ବୋଲି ମଧ୍ୟ ଏହି ଲିଙ୍ଗାୟତ ନେତା ଅଭିଯୋଗ କରିଛନ୍ତି।ଏହାପୂର୍ବରୁ ଶନିବାର ରାତିରେ କର୍ଣ୍ଣାଟକର ମୁଖ୍ୟମନ୍ତ୍ରୀ ବାସବରାଜ ବମ୍ମାଇ, କେନ୍ଦ୍ର ମନ୍ତ୍ରୀ ପ୍ରହଲ୍ଲାଦ ଯୋଶୀ ଏବଂ ଧର୍ମେନ୍ଦ୍ର ପ୍ରଧାନ ତାଙ୍କ ବାସଭବନରେ ଶେଟ୍ଟରଙ୍କୁ ଭେଟିଥିଲେ। ଯୁବ ପ୍ରାର୍ଥୀଙ୍କୁ ସୁଯୋଗ ଦେବା ପାଇଁ ମେ’ ୧୦ ବିଧାନସଭା ନିର୍ବାଚନ ନ ଲଢ଼ିବାକୁ ପୂର୍ବତନ ମୁଖ୍ୟମନ୍ତ୍ରୀ ଶେଟ୍ଟରଙ୍କୁ ବିଜେପି ଅନୁରୋଧ କରିଥିଲା । ହେଲେ ସେ ରାଜି ହୋଇନଥିଲେ । ବମ୍ମାଇ, ଯୋଶୀ ଏବଂ ପ୍ରଧାନଙ୍କ ସହ ସାକ୍ଷାତ ପୂର୍ବରୁ ଶେଟ୍ଟର ଗଣମାଧ୍ୟମକୁ କହିଥିଲେ ଯେ ତାଙ୍କ ପରିବାରର କୌଣସି ସଦସ୍ୟ ନିର୍ବାଚନ ଲଢ଼ିବା ନେଇ ପ୍ରସ୍ତାବ ଦିଆଯାଇଥିଲା, କିନ୍ତୁ ସେ ଏଥିରେ ସହମତ ନଥିଲେ ।
ଶେଟ୍ଟାରଙ୍କ ପୂର୍ବରୁ ଟିକେଟରୁ ବଞ୍ଚିତ ପୂର୍ବତନ ଉପମୁଖ୍ୟମନ୍ତ୍ରୀ ଲକ୍ଷ୍ମଣ ସାବଦି, ବିଧାୟକ ଏମପି କୁମାରସ୍ୱାମୀ ଓ ବିଏମ୍ ମଲ୍ଲିକାର୍ଜୁନ ଓରଫ୍ ଫାଇଟର ରବି ବିଜେପିରୁ ଇସ୍ତଫା ଦେଇଥିଲେ । ବିଜେପି ଛାଡ଼ିବା ପରେ ଲକ୍ଷ୍ମଣ ସାବଦି କଂଗ୍ରେସରେ ସାମିଲ ହୋଇଥିଲେ। ତାଙ୍କୁ ମଧ୍ୟ ଆଗାମୀ ବିଧାନସଭା ନିର୍ବାଚନ ପାଇଁ କଂଗ୍ରେସ ପ୍ରାର୍ଥୀ କରିଛି ।
