ନୂଆଦିଲ୍ଲୀ : ମଙ୍କିପକ୍ସ (ଏମ୍ପକ୍ସ) ଭୂତାଣୁ ସଂକ୍ରମଣ ଚିହ୍ନଟ କରିବା ଲାଗି ସ୍ବଦେଶୀ ଆରଟି-ପିସିଆର କିଟ୍ ବିକଶିତ ହୋଇଛି। ସିମେନ୍ସ ହେଲ୍ଥନିୟର୍ସ ପ୍ରାଇଭେଟ୍ ଲିମିଟେଡ ପକ୍ଷରୁ ଏହି ଆରଟି-ପିସିଆର କିଟ୍ ପ୍ରସ୍ତୁତ କରାଯାଇଛି। ଏହି କିଟ୍ର ନାମ ରହିଛି ଆଇଏମଡିଏକ୍ସ ମଙ୍କିପକ୍ସ। ଏହି କିଟ୍ ପ୍ରସ୍ତୁତ କରିବା ଲାଗି ସିମେନ୍ସ ହେଲଥନିୟର୍ସକୁ ସେଣ୍ଟ୍ରାଲ ଡ୍ରଗ୍ସ ଷ୍ଟାଣ୍ଡାର୍ଡ କଣ୍ଟୋଲ ଅର୍ଗାନାଇଜେସନ୍ (ସିଡିଏସ୍ସିଓ) ଅନୁମତି ପ୍ରଦାନ କରିଛି। ଏହା ସହିତ ଏହି କିଟ୍ ମାଧ୍ୟମରେ ହେଉଥିବା ପରୀକ୍ଷାର ବୈଧତାକୁ ଆଇସିଏମଆର, ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଭିରୋଲୋଜି, ପୁଣେ ଅନୁମୋଦନ କରିଛି।
ଆଇସିଏମଆର କହିଛି ଯେ କିଟ୍ର ପରୀକ୍ଷା ୧୦୦ ପ୍ରତିଶତ ଠିକ୍। କମ୍ପାନୀ କହିଛି ଯେ ପ୍ରସ୍ତୁତ ଆରଟି-ପିସିଆର କିଟ୍ ଦ୍ବାରା ମଙ୍କିପକ୍ସ ଭୂତାଣୁ ସଂକ୍ରମଣକୁ ୪୦ମିନିଟ୍ରେ ଚିହ୍ନଟ କରାଯାଇପାରିବ। ପୂର୍ବରୁ ପାରମ୍ପରିକ ପ୍ରକ୍ରିୟାରେ ଭୂତାଣୁ ସଂକ୍ରମଣକୁ ଚିହ୍ନଟ ଲାଗି ୧ରୁ ୨ଘଣ୍ଟା ଲାଗୁଥିଲା। କମ୍ପାନୀ ବାର୍ଷିକ ୧୦ଲକ୍ଷ କିଟ୍ ପ୍ରସ୍ତୁତ କରିପାରିବ। ମଙ୍କିପକ୍ସକୁ ବିଶ୍ବ ସ୍ବାସ୍ଥ୍ୟ ସଂଗଠନ (ହୁ) ଜରୁରୀ ସ୍ବାସ୍ଥ୍ୟ ସତର୍କତା ଜାରି କରିଛି। କରୋନା ପରେ ଏହା ବିଶ୍ବର ଦ୍ବିତୀୟ ବଡ ମହାମାରୀ ହେବ ବୋଲି ହୁ କହିଛି।
