ଭଦ୍ରକ : ଭଦ୍ରକର ଅଧିଷ୍ଠାତ୍ରୀ ଦେବୀ ବିଷ୍ଣୁ ମାତା ଆଦ୍ୟାଶକ୍ତି ମା’ ଭଦ୍ରକାଳୀ ଆଜି ସପ୍ତ ମାତୃକା ବେଶର ପଞ୍ଚମ ଦିବସରେ ଜଗଦ୍ଧାତ୍ରୀ ବେଶରେ ପୂଜା ପାଇଛନ୍ତି। ମା’ଙ୍କର ଜଗଦ୍ଧାତ୍ରୀ ବେଶକୁ ଦର୍ଶନ କରିବା ପାଇଁ ପୀଠରେ ଭକ୍ତ ମାନଙ୍କର ଗହଳି ଲାଗିଥିଲା। ଜଗଦ୍ଧାତ୍ରୀ ବେଶରେ ମା’ଙ୍କର ମୁଖ ମଣ୍ଡଳ କୃଷ୍ଣ ବର୍ଣ୍ଣ ଥିବା ବେଳେ ମା’ ନାଲି ପାଟ ବସ୍ତ୍ର ପରିଧାନ କରିଥିଲେ। ଦକ୍ଷିଣ ହସ୍ତ ଯୁଗଳରେ ଶଙ୍ଖ, ଚକ୍ର ଧାରଣ କରିଥିବା ବେଳେ ବାମ ହସ୍ତ ଯୁଗଳରେ ତ୍ରିଶୂଳ ଓ ଗଦା ଧାରଣ କରିଥିଲେ।
ବ୍ୟାଘ୍ର ବାହନରେ ବିରାଜମାନ କରି ମା’ ଭକ୍ତମାନଙ୍କୁ ଚତୁର୍ଦ୍ଧା ମୂର୍ତ୍ତିରେ ଦର୍ଶନ ଦେଇଥିଲେ। ମା’ ଜଗତକୁ ଧାରଣ କରିଛନ୍ତି, ସେ ପୋଷଣ କରୁଛନ୍ତି ପୁଣି ପାଳନ ମଧ୍ୟ କରୁଛନ୍ତି । ସେ ଆଦି ପୁଣି ସେ ଅନାଦି, ସେ ଆରମ୍ଭ ପୁଣି ସେ ଅନନ୍ତ। ସୃଷ୍ଟିର ଜୀବ ଜଗତ, ପ୍ରାଣୀ ଜଗତ, ଉଦ୍ଭିଦ ଜଗତ ସବୁଠି ତାଙ୍କର ଶକ୍ତି ଓ ସତ୍ତା ଅନୁଭୂତ ହୁଏ। ଜଗଦ୍ଧାତ୍ରି ବେଶରେ ମା’ ଙ୍କୁ ଦର୍ଶନ କଲେ ଭକ୍ତର ସମସ୍ତ ମନସ୍କାମନା ପୂର୍ଣ୍ଣ ହେବା ସହ ଭକ୍ତ ବହୁ ଶକ୍ତିର ଅଧିକାରୀ ହୋଇଥାଏ ବୋଲି ବିଶ୍ବାସ ରହିଛି ।
ଶାସ୍ତ୍ର ମତାନୁସାରେ ଦେବତାମାନେ ମଧ୍ୟ ମାଙ୍କୁ ଜଗଦ୍ଧାତ୍ରୀ ରୂପରେ ପୂଜା କରି ଶକ୍ତି ପ୍ରାପ୍ତ ହୋଇଥାନ୍ତି। ମହାଯଜ୍ଞର ପଞ୍ଚମ ଦିବସରେ ପୀଠରେ ନମଃ ଭଗବତେ ବାସୁଦେବାୟଃ ମନ୍ତ୍ର ରେ ଆହୂତି ସହିତ ଗୀତା ପାଠ, ଶତ ଚଣ୍ଡିପାଠ, ବେଦ ପାଠ ରେ ମା’ଙ୍କ ପୀଠ ପ୍ରକମ୍ପିତ ହେଉଛି।ସନ୍ଧ୍ୟା ଆଳତି ପରେ ଆରମ୍ଭ ହୋଇଥିଲା ସାଂସ୍କୃତିକ କାର୍ଯ୍ୟକ୍ରମ। ଭଜନ ସନ୍ଧ୍ୟା ରେ ଆଧ୍ୟାତ୍ମିକ ଭଜନ ଶ୍ରୋତା ମାନଙ୍କ ମନ ମୋହିଥିଲା। ମଙ୍ଗଳ ବାର ମା ଭକ୍ତ ମାନଙ୍କୁ ମହସରସ୍ଵତି ବେଶରେ ଦର୍ଶନ ଦେବାକୁ ଥିବା ବେଳେ ବୁଧବାର ମା’ ଙ୍କର୍ ମହାଲକ୍ଷ୍ମୀ ବେଶ ସହ ମହାଯଜ୍ଞ ର ପୂର୍ଣ୍ଣାହୁତି ହେବ।
