ବାଙ୍କୀ : ବାଙ୍କୀ ଥାନା ନିସ୍ତିପୁର ଗାଁରେ ପୂର୍ବତନ ସରପଞ୍ଚଙ୍କ ଘର ଉପରକୁ ବୋମାମାଡ଼ । ସିସିଟିଭିରେ କଏଦ ହୋଇଛି ସମସ୍ତ ଦୃଶ୍ୟ । ଏବେ ଯାଏଁ ବୋମାମାଡ଼ର କାରଣ ଅସ୍ପଷ୍ଟ ରହିଛି । ତେଣୁ ଘଟଣାର ପୁରା ତଦନ୍ତ ପରେ ପ୍ରକୃତ ତଥ୍ୟ ପଦାରୁ ଆସିବ ବୋଲି ପୋଲିସ କହିଛି।
ସୂଚନା ଯେ, ଦୁଇ ଜଣ ଦୁର୍ବୃତ୍ତ ବାଇକ୍ରେ ଆସି ନିସ୍ତିପୁର ଗ୍ରାମର ପୂର୍ବତନ ସରପଞ୍ଚଙ୍କ ଘର ଉପରକୁ ଦୁର୍ବୃତ୍ତଙ୍କ ବୋମା ମାଡ଼ କରିଛନ୍ତି । ଫଳରେ ବଡ଼ ଅଘଟଣରୁ ପରିବାର ଲୋକ ଅଳ୍ପକେ ବର୍ତ୍ତିଯାଇଛନ୍ତି । କିନ୍ତୁ ଘର ବାହାରେ ଥିବା ବୋଲେରୋଟି ସାମାନ୍ୟ କ୍ଷତିଗ୍ରସ୍ତ ହୋଇଛି । ତେବେ ଅନ୍ୟ କୌଣସି କ୍ଷତି ଘଟି ନଥିବାର ଜଣାପଡ଼ିଛି ।
ଖବର ପାଇ ବାଙ୍କୀ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଘଟଣାସ୍ଥଳରୁ ୫ଟି ଅଫୁଟା ବୋମା ଓ ଗାମୁଛା ଜବତ ହୋଇଛି । ଦୁର୍ବୃତ୍ତମାନେ ଦୂରରେ ରହି ୬ଟି ବୋମା ଫିଙ୍ଗିଥିବା ଅନୁମାନ କରାଯାଉଛି ।
