ନୂଆଦିଲ୍ଲୀ: କଂଗ୍ରେସର ‘ଭାରତ ଯୋଡ ଯାତ୍ରା’ର ନେତୃତ୍ବ ନେଉଥିବା ରାହୁଲ ଗାନ୍ଧୀଙ୍କ ସୁରକ୍ଷା ବଢ଼ାଇବା ପାଇଁ ଦଳ ତରଫରୁ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ ଚିଠି ଲେଖାଯାଇଛି । ଗୃହ ମନ୍ତ୍ରଣାଳୟକୁ ପଠାଯାଇଥିବା ଏହି ଚିଠିରେ କଂଗ୍ରେସ ଦୁଇ କିମ୍ବା ତିନୋଟି ଘଟଣା ଉଲ୍ଲେଖ କରି ସୁରକ୍ଷା ବୃଦ୍ଧି କରିବାକୁ ଦାବି କରିଛି।
କଂଗ୍ରେସ ନେତା ପୱନ ଖେରା କହିଛନ୍ତି ଯେ ବୁଧବାର ଭାରତ ଯୋଡା ଯାତ୍ରାରେ ରାହୁଲ ଗାନ୍ଧୀଙ୍କ ସୁରକ୍ଷାରେ ଯେଭଳି ତ୍ରୁଟି ହୋଇଥିଲା ତାହା ଚିନ୍ତାଜନକ । ବଦରପୁରରେ ରାହୁଲ ଗାନ୍ଧୀଙ୍କ ଚାରିପାଖରେ ଲୋକଙ୍କ ଭିଡ଼ର ଭିଡ଼ିଓ ଦେଖି ପୱନ ଖେରା କହିଛନ୍ତି ଯେ ରାହୁଲ ଗାନ୍ଧୀଙ୍କ ପାଖରେ ଜେଡ୍ ସୁରକ୍ଷା ରହିଛି। କିନ୍ତୁ ଏହା ସତ୍ତ୍ୱେ ରାହୁଲ ଗାନ୍ଧୀ ଦିଲ୍ଲୀରେ ପ୍ରବେଶ କଲାବେଳେ ତାଙ୍କ ଚାରିପାଖରେ ଦଉଡ଼ି ଘେରା ନଥିଲା।
ଗୃହ ମନ୍ତ୍ରଣାଳୟକୁ କଂଗ୍ରେସ ଲେଖିଥିବା ଚିଠିରେ ଭାରତ ଯୋଡ ଯାତ୍ରା ଦିଲ୍ଲୀରେ ପହଞ୍ଚିବା ପରେ ଦିଲ୍ଲୀ ପୋଲିସର ଅବହେଳା ବିଷୟରେ ମଧ୍ୟ ଉଲ୍ଲେଖ କରିଛି। କଂଗ୍ରେସ ସାଧାରଣ ସମ୍ପାଦକ କେ.ସି ବେଣୁଗୋପାଳ କହିଛନ୍ତି ଯେ ପରିସ୍ଥିତି ଏତେ ଭୟଙ୍କର ଥିଲା ଯେ ରାହୁଲ ଗାନ୍ଧୀଙ୍କ ସହ ଚାଲୁଥିବା କଂଗ୍ରେସ କର୍ମୀ ଏବଂ ଭାରତ ଯୋଡ ଯାତ୍ରୀଙ୍କୁ ଏକ ସୁରକ୍ଷା କର୍ଡନ କରିବାକୁ ପଡ଼ିଥିଲା । ଦିଲ୍ଲୀ ପୋଲିସ କେବଳ ମୂକ ଦର୍ଶକ ସାଜିଥିଲା |
କଂଗ୍ରେସ ମଧ୍ୟ ଅଭିଯୋଗ କରିଛି ଯେ ଯେଉଁ ଲୋକମାନେ ଭାରତ ଯୋଡା ଯାତ୍ରା ସମୟରେ ରାହୁଲ ଗାନ୍ଧୀଙ୍କ ସହ କଥାବାର୍ତ୍ତା କରୁଛନ୍ତି, ସେମାନଙ୍କୁ ଆଇବି ଉଠାଇ ପଚରାଉଚରା କରୁଛି।
