ନୂଆଦିଲ୍ଲୀ: ଜର୍ମାନ ଚାନସେଲର ଓଲାଫ ସ୍କୋଲଜ୍ ଦୁଇ ଦିନିଆ ଗସ୍ତରେ ଶନିବାର ଭାରତରେ ପହଞ୍ଚିଛନ୍ତି । ସ୍କୋଲଜଙ୍କ ଏହି ଗସ୍ତ ଅବସରରେ ବିଭିନ୍ନ କ୍ଷେତ୍ରରେ ଦ୍ୱିପାକ୍ଷିକ ସମ୍ପର୍କ ଆହୁରି ବ୍ଯାପକ କରିବା ଦିଗରେ ଗୁରୁତ୍ବପୂର୍ଣ୍ଣ ନିଷ୍ପତ୍ତି ହୋଇପାରେ ।
ୟୁକ୍ରେନ ଯୁଦ୍ଧ, ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳର ସ୍ଥିତି ଏବଂ ଦ୍ୱିପାକ୍ଷିକ ସମ୍ପର୍କକୁ ମଜବୁତ କରିବା ଉପରେ ସ୍କୋଲଜ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ଆଜି ବୈଠକ କରିବେ। ଆଞ୍ଜେଲା ମର୍କେଲଙ୍କ ୧୬ ବର୍ଷର ଐତିହାସିକ କାର୍ଯ୍ୟକାଳ ପରେ ଡିସେମ୍ବର ୨୦୨୧ରେ ଜର୍ମାନର ଚାନ୍ସେଲର ହେବା ପରେ ଏହା ସ୍କୋଲଜଙ୍କ ପ୍ରଥମ ଭାରତ ଗସ୍ତ ।
ବାଣିଜ୍ୟ, ପ୍ରତିରକ୍ଷା, ବିଶୁଦ୍ଧ ଶକ୍ତି, ଜଳବାୟୁ ପରିବର୍ତ୍ତନ ଏବଂ ପ୍ରଯୁକ୍ତିବିଦ୍ୟା କ୍ଷେତ୍ରରେ ସହଯୋଗକୁ ପ୍ରୋତ୍ସାହିତ କରିବା ଉପରେ ଆଲୋଚନା ହେବା ସମ୍ଭାବନା ରହିଛି । ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ସାମଗ୍ରିକ ପରିସ୍ଥିତି ଉପରେ ବି ଉଭୟ ନେତା ଆଲୋଚନା କରିବେ ବୋଲି ଆଶା କରାଯାଉଛି। ଗତ କିଛି ବର୍ଷ ମଧ୍ୟରେ ଏହି ଅଞ୍ଚଳରେ ଚାଇନାର ପ୍ରଭାବ ବୃଦ୍ଧି ପାଇଛି।
ଗତ ବର୍ଷ ନଭେମ୍ବର ୧୬ରେ ଇଣ୍ଡୋନେସିଆର ବାଲିରେ ମୋଦୀ ଏବଂ ସ୍କୋଲଜଙ୍କ ମଧ୍ୟରେ ଦ୍ୱିପାକ୍ଷିକ ଆଲୋଚନା ହୋଇଥିଲା । ଦୁଇ ନେତାଙ୍କ ମଧ୍ୟରେ ପ୍ରଥମ ବୈଠକ ଗତ ବର୍ଷ ମେ ୨ରେ ହୋଇଥିଲା ଯେତେବେଳେ ମୋଦି ଷଷ୍ଠ ଇଣ୍ଡୋ-ଜର୍ମାନ ଆନ୍ତଃ ସରକାରୀ ପରାମର୍ଶ (ଆଇଜିସି)ରେ ଯୋଗ ଦେବାକୁ ବର୍ଲିନ୍ ଯାଇଥିଲେ ।
ସୂଚନା ଯେ, ଜର୍ମାନୀ ଏବଂ ଭାରତ ମଧ୍ୟରେ ଦ୍ୱିପାକ୍ଷିକ ସମ୍ପର୍କ ଗତ କିଛି ବର୍ଷ ମଧ୍ୟରେ ଅନେକ କ୍ଷେତ୍ରରେ ବୃଦ୍ଧି ପାଇଛି। ସ୍କୋଲଜ ରବିବାର ସକାଳେ ବେଙ୍ଗାଲୁରୁ ଯିବେ, ଯେଉଁଠାରୁ ସେ ସନ୍ଧ୍ୟା ୫ଟା ୩୦ରେ ସ୍ବଦେଶ ଫେରିଯିବେ ।
