ନୂଆଦିଲ୍ଲୀ : ଟି-୨୦ ବିଶ୍ୱକପରେ ଭାରତୀୟ ମହିଳା କ୍ରିକେଟ୍ ଦଳର ଦମଦାର ବିଜୟ। ଦକ୍ଷିଣ ଆଫ୍ରିକାରେ ଖେଳାଯାଉଥିବା ଟି-୨୦ ମହିଳା ବିଶ୍ୱକପରେ ଭାରତୀୟ ଦଳ ସେମିଫାଇନାଲରେ ପ୍ରବେଶ କରିଛି। କେବରହାର ସେଣ୍ଟ ଜର୍ଜ ପାର୍କଠାରେ ସୋମବାରଦିନ ଖେଳାଯାଇଥିବା ବର୍ଷା ବାଧାପ୍ରାପ୍ତ ମ୍ୟାଚରେ ଭାରତ ଆୟର୍ଲାଣ୍ଡକୁ ୫ ରନରେ ପରାସ୍ତ କରି ସେମିଫାଇନାଲରେ ପ୍ରବେଶ କରିଛି।
କ୍ରମାଗତ ୩ୟ ଥର ପାଇଁ ଭାରତ ଟି-୨୦ ବିଶ୍ୱକପ ସେମିରେ ପ୍ରବେଶ କରିଛି । ଏହି ମ୍ୟାଚରେ ଭାରତୀୟ ମହିଳା ଦଳ ଟସ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । ପ୍ରଥମେ ବ୍ୟାଟିଂ କରି ଭାରତ ନିର୍ଦ୍ଧାରିତ ୨୦ ଓଭରରେ ୬ ଓ୍ବିକେଟ ହରାଇ ୧୫୫ ରନ କରିଥିଲା । ଭାରତର ତାରକା ବ୍ୟାଟର ସ୍ମୃତି ମାନ୍ଧାନା ୫୬ ବଲରେ ୮୭ ରନ କରି ଏକ ଭଲ ସ୍କୋର ଛିଡ଼ା କରିବାରେ ସହାୟତା କରିଥିଲେ । ଶେଫାଳି ବର୍ମା ୨୪ ରନ କରିଥିଲେ । ୧୫୬ ରନର ବିଜୟ ଲକ୍ଷ୍ୟ ନେଇ ଆୟର୍ଲାଣ୍ଡ ପଡ଼ିଆକୁ ଓହ୍ଲାଇଥିଲା ।
ତେବେ ଦଳ ୮.୨ ତମ ଓଭରରେ ୨ ଓ୍ବିକେଟ ହରାଇ ୫୪ ରନ କରିଥିବାବେଳେ ବର୍ଷା ହୋଇଥିଲା । ଦଳ ପକ୍ଷରୁ ଗେବି ଲୁଇସ ୩୨ରନ କରିଥିଲେ । ପରେ ଡକଓ୍ବର୍ଥ ଲୁଇସ ମେଥଡ ଅନୁସାରେ ଭାରତକୁ ବିଜୟୀ ଘୋଷଣା କରାଯାଇଥିଲା ।
