ଭୁବନେଶ୍ୱର : ପୁରୀ ନୂଆଦିଲ୍ଲୀ ନନ୍ଦନକାନନ ସୁପରଫାଷ୍ଟ ଟ୍ରେନ ଉପରକୁ ଗୁଳିମାଡ଼ ଘଟଣାରେ ତଦନ୍ତ ଜାରି ରହିଛି। ଏହି ଘଟଣାରେ ରେଲଓ୍ବେ ଅଧିକ୍ଷକ ସୁରେଶ କୁମାର ନାୟକ କହିଛନ୍ତି, ଟ୍ରେନର ଗାର୍ଡ ମହେନ୍ଦ୍ର ବେହେରାଙ୍କ ଅଭିଯୋଗକ୍ରମେ ମାମଲା ରୁଜୁ ହୋଇଛି। ଭଦ୍ରକ ଜିଆରପିରେ ମାମଲା ରୁଜୁ ହୋଇଛି। ବାଲାଷ୍ଟିକ ଏକ୍ସପର୍ଟଙ୍କ ଯାଞ୍ଚ ରିପୋର୍ଟକୁ ଅପେକ୍ଷା ରହିଛି। ଖୁବଶୀଘ୍ର ଯାଞ୍ଚ ରିପୋର୍ଟ ଆସିବ। ବାଲାଷ୍ଟିକ ଏକ୍ସପର୍ଟଙ୍କ ରିପୋର୍ଟ ପରେ ହିଁ କିଛି ସ୍ପଷ୍ଟ ହେବ ବୋଲି ରେଲଓ୍ବେ ଏସପି କହିଛନ୍ତି।
ସୂଚନାଯୋଗ୍ୟ, ଗତକାଲି ଚଳନ୍ତା ଟ୍ରେନ ଉପରକୁ କିଛି ଦୁର୍ବୃତ୍ତ ଗୁଳିମାଡ କରିଥିଲେ। ଗୁଳିମାଡରେ ଗାର୍ଡ ବଗିର ଝରକା କାଚ ଭାଙ୍ଗିଥିଲା। ଭଦ୍ରକ-ବାଉଦପୁର ମଝିରେ ଚରମ୍ପା ରେଳ ଷ୍ଟେସନର ୧୧୯ ନମ୍ବର ଗେଟ ନିକଟରେ ନନ୍ଦନକାନନ ଏକ୍ସପ୍ରେସ ଉପରକୁ ଗୁଳି ମାଡ଼ ହୋଇଥିଲା। ଟ୍ରେନଟି ନୂଆଦିଲ୍ଲୀରୁ ପୁରୀ ଅଭିମୁଖେ ଆସୁଥିବା ସମୟରେ ଗୁଳିମାଡ ହୋଇଥିଲା। ଟ୍ରେନ ଉପରକୁ କିଏ ଏବଂ କାହିଁକି ଗୁଳି ମାଡ଼ କଲା, ଏନେଇ ଅଧିକ ତଦନ୍ତ କରୁଛି ବାଲାଷ୍ଟିକ ଏକ୍ସପର୍ଟ ଟିମ୍। ଗତକାଲି ପୁରୀ ଜିଆରପି ଥାନା ଅଧିକାରୀ ସନ୍ତୋଷ ବାହିନୀପତି କହିଥିଲେ, ପୁରୀ ରେଳୱେ ଷ୍ଟେସନରେ ନନ୍ଦନକାନନ ଏକ୍ସପ୍ରେସ ପହଞ୍ଚିବା ପରେ ଘଟଣାକୁ ନେଇ ତଦନ୍ତ ଜାରି ରହିଛି। ସାଇଣ୍ଟିଫିକ୍ ଟିମ୍, ଜିଆରପି, ଆରପିଏଫ୍ ଓ ରେଳୱେ ମେକାନିକାଲ ଟିମ୍ ମିଳିତ ଭାବରେ ତଦନ୍ତ କରୁଛନ୍ତି। ଟ୍ରେନ୍ ଭିତରେ ଥିବା ଗାର୍ଡମାନଙ୍କ ବୟାନକୁ ରେକର୍ଡ କରାଯାଇ ତର୍ଜମା କରାଯାଉଛି।
