ନୂଆଦିଲ୍ଲୀ : ଚନ୍ଦ୍ର ଏବଂ ସୂର୍ଯ୍ୟ ମିଶନର ଐତିହାସିକ ସଫଳତା ପରେ ଏବେ ‘ଶୁକ୍ର ମିଶନ୍’ ପାଇଁ ପ୍ରସ୍ତୁତି ଜୋରଦାର ହୋଇଛି। ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ)ର ଅଧ୍ୟକ୍ଷ ଏସ୍ ସୋମନାଥ କହିଛନ୍ତି ଯେ ସୌର ମଣ୍ଡଳର ସବୁଠାରୁ ଉଜ୍ଜ୍ୱଳତମ ଗ୍ରହ ‘ଶୁକ୍ର’ ପାଇଁ ଏହି ମିଶନ ପୂର୍ବରୁ ହିଁ ପ୍ରସ୍ତୁତ ହୋଇସାରିଛି। ପେଲୋଡ୍ ମଧ୍ୟ ବିକଶିତ କରାଯାଇଛି। ଦିଲ୍ଲୀର ଭାରତୀୟ ଜାତୀୟ ବିଜ୍ଞାନ ଏକାଡେମୀକୁ ସମ୍ବୋଧିତ କରିବା ବେଳେ ଇସ୍ରୋ ମୁଖ୍ୟ ଏହା କହିଛନ୍ତି।
ଏସ୍ ସୋମନାଥ ଆହୁରି କହିଛନ୍ତି ଯେ ଆମ ପାଖରେ ଅନେକ ମିଶନ ଅଛି। ଶୁକ୍ରଙ୍କ ମିଶନ ପୂର୍ବରୁ ହିଁ ପ୍ରସ୍ତୁତ ହୋଇସାରିଛି। ଶୁକ୍ର ଏକ କୌତୁହଳ ଗ୍ରହ ଏବଂ ଏହାର ଆବିଷ୍କାର ଦ୍ୱାରା ମହାକାଶ ବିଜ୍ଞାନ କ୍ଷେତ୍ରରେ ଅନେକ ସମସ୍ୟାର ସମାଧାନ ହୋଇପାରିବ। ଶୁକ୍ରର ଏକ ବାୟୁମଣ୍ଡଳ ମଧ୍ୟ ରହିଛି। ଏହାର ପରିବେଶ ବହୁତ ଘନ। ବାୟୁମଣ୍ଡଳୀୟ ଚାପ ପୃଥିବୀର ୧୦୦ ଗୁଣ ଏବଂ ଏହା ଏସିଡ୍ରେ ପରିପୂର୍ଣ୍ଣ।
ଭବିଷ୍ୟତରେ ପୃଥିବୀ ଉପରେ ମଧ୍ୟ ଜୀବନର କଠିନ ଚ୍ୟାଲେଞ୍ଜର ଆଶଙ୍କା କରି ଇସ୍ରୋ ମୁଖ୍ୟ କହିଥିଲେ କି, ଆମେ ଶୁକ୍ରଙ୍କୁ ବୁଝିବାକୁ ଚେଷ୍ଟା କରୁଛୁ। କାରଣ, ପୃଥିବୀର ଅବସ୍ଥା ମଧ୍ୟ ଦିନେ ଶୁକ୍ର ପରି ହୋଇପାରେ। ୧୦,୦୦୦ ବର୍ଷ ପରେ ଆମ ଗ୍ରହ ଏହାର ଗୁଣ ପରିବର୍ତ୍ତନ କରିପାରେ। ଆଜି ପୃଥିବୀ ଯେପରି ଅଛି, ପୂର୍ବରୁ ସେପରି ନ ଥିଲା। ବହୁ ସମୟ ପୂର୍ବେ ଏହା ରହିବା ଯୋଗ୍ୟ ବିଲ୍କୁଲ ନ ଥିଲା। କିନ୍ତୁ ଧୀରେ ଧୀରେ ପରିସ୍ଥିତି ବଦଳିଲା ଏବଂ ଆଜି ଏଠାରେ ଜୀବନ ହିଁ ଜୀବନ ଅଛି।
