ନୂଆଦିଲ୍ଲୀ: ୨୦୨୩ ଏସିଆ କପ୍ ପାଇଁ ଭାରତୀୟ ଦଳ ପାକିସ୍ତାନ ଯିବ ନାହିଁ । ବିସିସିଆଇ ସଚିବ ଜୟ ଶାହା ମଙ୍ଗଳବାର ଏହା ସ୍ପଷ୍ଟ କରିଛନ୍ତି । ଏହାଛଡ଼ା ଏସିଆ କପ୍ ୨୦୨୩ ସଂସ୍କରଣ ପାକିସ୍ତାନ ପରିବର୍ତ୍ତେ ନିରପେକ୍ଷ ଭେନ୍ୟୁରେ ଖେଳାଯିବ ବୋଲି ସେ କହିଛନ୍ତି । ଟିମ୍ ଇଣ୍ଡିଆ ଏହି ସିରିଜ୍ ପାଇଁ ପାକିସ୍ତାନ ଗସ୍ତ କରିପାରେ ବୋଲି ନିକଟରେ କଳ୍ପନା ଜଳ୍ପନା ପ୍ରକାଶ ପାଇଥିଲା ।
ମଙ୍ଗଳବାର ବିସିସିଆଇ ଏଜିଏମ୍ରେ ଅନେକ ଗୁରୁତ୍ୱପୂର୍ଣ୍ଣ ବିଷୟ ଉପରେ ଆଲୋଚନା କରାଯାଇଥିଲା। ଏଥିମଧ୍ୟରୁ ଏସିଆ କପ୍ ୨୦୨୩ ଅନ୍ୟତମ ଥିଲା | ଜୟ ଶାହ ବିସିସିଆଇର ସଚିବ ସହ ଏସୀୟ କ୍ରିକେଟ୍ ପରିଷଦ (ଏସିସି) ସଭାପତି ମଧ୍ୟ ଅଛନ୍ତି । ସେ ଏକ ବିବୃତ୍ତିରେ କହିଛନ୍ତି ଯେ ଏସିଆ କପ୍ ପାଇଁ ଆମେ ପାକିସ୍ତାନ ଯିବୁ ନାହିଁ ବୋଲି ନିଷ୍ପତ୍ତି ନେଇଛୁ । ଏସିଆ କପ୍ ୨୦୨୩ ଏକ ନିରପେକ୍ଷ ଭେନ୍ୟୁରେ ଖେଳାଯିବ ।
ଉଲ୍ଲେଖଯୋଗ୍ୟ ଯେ, ଚଳିତ ବର୍ଷର ଏସିଆ କପ୍ ଟି-୨୦ ୟୁଏଇରେ ଅନୁଷ୍ଠିତ ହୋଇଥିଲା । ଏସିଆ କପ୍ ୨୦୨୨ ପ୍ରଥମେ ଶ୍ରୀଲଙ୍କାରେ ହେବାର ଥିଲା । କିନ୍ତୁ ଶ୍ରୀଲଙ୍କାରେ ଆର୍ଥିକ ଓ ରାଜନୈତିକ ସଙ୍କଟ ଯୋଗୁଁ ଏହାକୁ ୟୁଏଇକୁ ସ୍ଥାନାନ୍ତର କରାଯାଇଥିଲା | ଏସିଆ କପ୍ ୨୦୨୨ରେ ଭାରତ ଏବଂ ପାକିସ୍ତାନ ମଧ୍ୟରେ ୨ଟି ମ୍ୟାଚ୍ ହୋଇଥିଲା । ଏଥିମଧ୍ୟରୁ ଭାରତ ଏବଂ ପାକିସ୍ତାନ ଗୋଟିଏ ଲେଖାଏଁ ଜିତିଥିଲେ । ଫାଇନାଲରେ ପାକିସ୍ତାନକୁ ହରାଇ ଶ୍ରୀଲଙ୍କା ଷଷ୍ଠ ଥର ପାଇଁ ଚାମ୍ପିଅନ୍ ହୋଇଥିଲା। ଏଥର ଏସିଆ କପ୍ ଟି-୨୦ ଫର୍ମାଟରେ ଖେଳାଯାଇଥିଲା ।
