ନୂଆଦିଲ୍ଲୀ: ଭାରତ ପାଇଁ ଓସ୍କାର ୨୦୨୩ ସ୍ୱତନ୍ତ୍ର ଓ ସ୍ମରଣୀୟ ହୋଇଛି । ଭାରତ ଏଥର ଓସ୍କାରରେ ଦୁଇଟି ପୁରସ୍କାର ଜିତିଛି | ‘ଦି ଏଲିଫ୍ୟାଣ୍ଟ ହ୍ବିସପରର୍ସ’ ଶ୍ରେଷ୍ଠ ଡକ୍ୟୁମେଣ୍ଟାରୀ ସର୍ଟ ଫିଲ୍ମ ଆଓ୍ବାର୍ଡ ଜିତିଥିବାବେଳେ ‘ଆରଆରଆର’ ଫିଲ୍ମର ନାଟୁ-ନାଟୁ ବେଷ୍ଟ ଅରିଜିନାଲ ସଙ୍ଗ୍’ ପୁରସ୍କାର ଜିତିଛି | ଓସ୍କାର ପୁରସ୍କାର ଜିତିବାରେ ନାଟୁ-ନାଟୁ ହେଉଛି ପ୍ରଥମ ଭାରତୀୟ ଫିଲ୍ମ ଗୀତ ।
ଓସ୍କାର ସଫଳତା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମେତ ଅନ୍ୟ ବଡ଼ ନେତା ଏବଂ ଅଭିନେତା ‘ଦି ଏଲିଫ୍ୟାଣ୍ଟ ହ୍ବିସପରର୍ସ’ ଓ ‘ଆରଆରଆର’ ଟିମକୁ ଅଭିନନ୍ଦନ ଜଣାଇଛନ୍ତି। ପ୍ରଧାନମନ୍ତ୍ରୀ ମୋଦୀ ନାଟୁ-ନାଟୁ ଗୀତକୁ ମଧ୍ୟ ପ୍ରଶଂସା କରିଛନ୍ତି।
ପ୍ରଧାନମନ୍ତ୍ରୀ ଟ୍ୱିଟ୍ କରି କହିଛନ୍ତି, “ଅସାଧାରଣ! ନାଟୁ-ନାଟୁଙ୍କ ଲୋକପ୍ରିୟତା ଗ୍ଲୋବାଲ୍। ଏହା ଏପରି ଏକ ଗୀତ ଯାହା ବର୍ଷ ବର୍ଷ ଧରି ସ୍ମରଣୀୟ ହୋଇ ରହିବ। ଏହି ସମ୍ମାନଜନକ ପୁରସ୍କାର ପାଇଁ ଏମ.ଏମ କିରବାନୀ, ଚନ୍ଦ୍ରବୋଷ ଏବଂ ପୂରା ‘ଆରଆରଆର’ ଟିମକୁ ଅଭିନନ୍ଦନ। ଭାରତ ବେଶ୍ ଉଲ୍ଲସିତ ଏବଂ ଗର୍ବିତ ମନେ କରୁଛି। ”
‘ଦି ଏଲିଫ୍ୟାଣ୍ଟ ହ୍ବିସପରର୍ସ’ ଟିମକୁ ମଧ୍ୟ ଅଭିନନ୍ଦନ ଜଣାଇ ପ୍ରଧାନମନ୍ତ୍ରୀ ମୋଦୀ ଲେଖିଛନ୍ତି ଯେ କାର୍ତ୍ତିକୀ ଗୋନସାଲଭସ୍ ଏବଂ ଗୁନିତ୍ ମୋଙ୍ଗାଙ୍କ ଚଳଚ୍ଚିତ୍ର ନିରନ୍ତର ବିକାଶ ତଥା ପ୍ରକୃତି ସହିତ ସାମଞ୍ଜସ୍ୟ ରକ୍ଷା ପୂର୍ବକ ବଞ୍ଚିବାର ମହତ୍ତ୍ୱ ଉପରେ ଆଲୋକପାତ କରିଛି।
ଆସାମ ମୁଖ୍ୟମନ୍ତ୍ରୀ ତଥା ବିଜେପି ନେତା ହିମନ୍ତ ବିଶ୍ବା ସରମା କହିଛନ୍ତି ଯେ ଭାରତ ବର୍ତ୍ତମାନ ବିଶ୍ୱ ସ୍ତରରେ ଚମକୁଛି। ଓସ୍କାର ପୁରସ୍କାର ପାଇଁ ସେ ନାଟୁ-ନାଟୁ ଗୀତ ଏବଂ ‘ଦି ଏଲିଫ୍ୟାଣ୍ଟ ହ୍ବିସପରର୍ସ’ ଡକ୍ୟୁମେଣ୍ଟାରୀ ଫିଲ୍ମକୁ ଅଭିନନ୍ଦନ ଜଣାଇଛନ୍ତି।
ନାଟୁ-ନାଟୁକୁ ଏକ ନିଆରା ଗୀତ ଭାବରେ ବର୍ଣ୍ଣନା କରି କଂଗ୍ରେସ ସାଂସଦ ଦୀପେନ୍ଦ୍ର ସିଂ ହୁଡା ଓସ୍କାର ପୁରସ୍କାରକୁ ପ୍ରତ୍ୟେକ ଭାରତୀୟଙ୍କ ପାଇଁ ଗର୍ବ ବୋଲି କହିଛନ୍ତି।
